Read Sukuma Bible 2015 – Bibilia Ilagano Lya Kale 2015 Balumi 15 Bible Online

Balumi 15 - Sukuma Bible 2015 – Bibilia Ilagano Lya Kale 2015 bible

Balumi 15

¹Ali lūūlū, a bise abo tūlī na nguzu shitwigeleelilwe kūbūbūūcha ū būgokolo wa bagokolo, ītī kwiyeja bise benekīlī dūhū.

²Būlī ūmò wise īīte yawiza kūlī nzenganwa ng'wiye, kūlwa kūnyeja na kūnzenga.

³Nguno nū Kilisito nang'hwe atīītile mhayo gwa kwiyeja wei ng'wenekīlī, alīyo gīt'ūmo gwandīkilwe gīkī, “Ī shidūki īsho wadūkagūlagwa bebe, shanigwīlaga nene.”

⁴Nguno būlī yene īyo yandīkilwe kūfuma kale, yandīkilwe kūlwa kūtūlanga, gīkī tūbize biyūmīlīja, na banhū ba kwisagīlwa kūlwa kūlūngūjiwa na shandīkwa.

⁵Ū Mulungu ūyo alī ng'wiyūmīlīja na nūngūja, leki ang'winhe kwidīlīla būlī ng'wene na biye gīt'ūmo shing'wigeleelilwe ū mulī Kilisito Yesu.

⁶Mudūle kūbiza na widomanīja, hama na long'we īmò; munkūje Mulungu ūyo alī Ise wa ng'wa Seeba wise Yesu Kilisito.

⁷Hūna lūūlū ng'wiyanukūla bing'we kū bing'we, gīt'ūmo nū Kilisito atwanukūlile, kūlwa ikūjo lya ng'wa Mulungu.

⁸Nguno nalīmuwīla gīkī, ū Kilisito akabiza ntūmami kūlwa Bayudaya, ayooleche ī ng'hana ya ng'wa Mulungu, na kwīshikīlīja īyo walī wabisagīja bakūlūgenji.

⁹Na kūlwa gīkī a banhū ba mahanga nabo bankumīlīje ū Mulungu, kūlwa nguno ya shigongo shakwe, gīt'ūmo gwandīkilwe gīkī, “Hūna lūūlū, nakūkūkumīlīja kū mahanga, na nakūlīkumīlīja ī lina lyako.”

¹⁰Na hangī alīhaya gīkī, “Bing'we banhū ba mahanga, yegagi hamò nabo a banhū bakwe.”

¹¹Hama hangī gīkī, “Banhū ba mahanga gose, nkumīlījagi ū Seeba; leka bankumīlīje we pye a banhū.”

¹²Na hangī ū Isaya alīhaya gīkī, “Gūkūbiza ho Nji go ng'wa Yese, hū ng'wene akwīmīīla kūlwa kūsuga mahanga, a mahanga gakūbiza na kwisagīlwa mulī we.”

¹³Ali lūūlū, ū Mulungu wa kwisagīlwa, leka ang'winhe būyegi bo mbika jose, hamò na mhola ū mu kūzunya; ū kwisagīlwa kwing'we kongeje kūkwīla kūlwa būdūla bo ng'wa Moyo Ng'wela.

¹⁴Nīyo hangī badūgū bane, ū nene ng'wenekīlī namanile hape gīkī, a bing'we mulī nayo mingī ī yawiza. Hama nīyo īkī mulī bitegeleja mu mihayo ya mbika jose, mudūgije nū kwihūgūla bing'we kū bing'we.

¹⁵Kwike ahene ī yīngī nang'wandīkīlaga mu būgimu būtaale, gītī kūng'wizūkīja kūlwa shigongo sha ng'wa Mulungu īsho ninhwa.

¹⁶Nguno nakīītwa kūbiza ntūmami wa ng'wa Kilisito Yesu kūlwa banhū ba mahanga; nīmo gwa būgabīji bo kūfunya shitambo sha Ng'hūlū Jawiza ja ng'wa Mulungu, gīkī a banhū ba mahanga banukūlwe, babize shitambo sheela kūlwa kwejiwa na Moyo Ng'wela.

¹⁷Na lūūlū, ū mulī Kilisito Yesu nalī nayo ī ya kwikumīlīgīja ū mu nīmo go ng'wa Mulungu.

¹⁸Kwike natūgima kūhaya shose shose, ūlū ītī īsho akūbeejaga dūhū ū Kilisito kūbītīla mulī nene, ū mu nīmo gwa kūbagunanha a banhū ba mahanga kūbiza bigwi, ībize mu kasomboolele, nūūlū mu katūmamīle;

¹⁹nūūlū mu būdūla bo koolecha shimanīkījo na mihayo ya kūkumya mu nguzu ja ng'wa Moyo. H'ūmo nīītīlile; naajisambaagije hose pyī ī Ng'hūlū Jawiza ja ng'wa Kilisito, kwandīja Yelusalemu kūjūshika Ilūlīko.

²⁰Nakūgemaga no no no kūjilomeela ī Ng'hūlū Jawiza ūko Kilisito ataalī kūhayiwa, natizūbiza wa kūja nakūzengaga higūlya ya nsingi ūyo gwamala kūtūūlwa na munhū ūngī.

²¹Alīyo gīt'ūmo gwandīkilwe gīkī, “Abo bataalī kūwīlwa mhola jakwe bakūbona, na a babo bataalī kwigwa bakwitegeleja.”

²²H'ī nguno yene nakūchaamagwa būlī makanza ūlū nahaya kwiza ū kū bing'we.

²³Kwike ī haha natī na ng'wanya hangī ū gwa kwikala ī mhandī ja kūūnū. Hūna lūūlū īkī yakwīlaga ī myaka nalī na ng'hūmbū ja kwiza ūko mulī,

²⁴ūlū nalabūūke kūja Spania nakwiza koi; nguno nalī na kwisagīlwa kūbīta ūko mulī ū mu lūgendo lwane namubone. Nakūlenda ning'we kakanza, ū būsabi wing'we būnilishe ho hado, hama mulanigunanhe nū kūshikīīla ko.

²⁵Alīyo ī haha nalīja Yelusalemu tame, kūbatwalīla beela shiigunanhīlo.

²⁶Bana Makedonia na bana Akaya bakabona ībeelelile kūsooga shikolo kūlwa nguno ya beela a bahabī, abo balī Yelusalemu.

²⁷Na ng'hana bakabeeja ū kūbona gīko, nguno ī chene balī na būgasa ū kūbo, īkī a banhū ba mahanga ūlū bakasangīla ū mu mihayo yabo ī ya Kiimoyo, hū kūhaya nabo balī na būgasa bo kūsangīla nabo ī shiigunanhīlo sha mu mīlī.

²⁸Na lūūlū, ūlū nalagūmale ū nīmo gwenūyo, nabize naamana hape gīkī bashanukūla ī shikolo shenīsho, nakūbūūka ū lūgendo lwa kūja ī Spania, nabīte koi ū kū bing'we.

²⁹Hama namanile gīkī ūlū nalize ūko mulī, nakūbiza nalī mu būshikanu bose wa lubango ja ng'wa Kilisito.

³⁰Nose ī haha badūgū bane, nalīng'wikūmbīlīja mulī Seeba wise Yesu Kilisito, na mu būtogwa bo ng'wa Moyo, gīkī mukomeele kūlomba hamò nane, ng'ūnilombela ū kūlī Mulungu.

³¹Napījiwe ū kū banhū ba Būyudaya abo bataalī kūzunya, nū nīmo gwane ū kū bana Yelusalemu balagwanukūle a beela.

³²Hama ūlū nūshika ū kū bing'we, nalalende ning'we mu kwifuula na būyegi kūlwa būtogwa bo ng'wa Mulungu.

³³Hūna lūūlū ū Mulungu wa mhola abize hamò ning'we bose. Alichene!