Read Sukuma Bible 2015 – Bibilia Ilagano Lya Kale 2015 Balumi 16 Bible Online

Balumi 16 - Sukuma Bible 2015 – Bibilia Ilagano Lya Kale 2015 bible

Balumi 16

¹Ali lūūlū, ūūyo kūko ilūmbū lise Foibe naamutūmīla, nang'hwe ngunanhi wa mu kanisa ya Kenkilia.

²Ūkūbeelela mung'wanukūle mulī Seeba, gīt'ūmo ībigeleelilwe beela; īmīīlagi hamò nang'hwe mungunanhe mu būlī mhayo ūyo alamulombe, nguno ū wei nang'hani wa banhū bingī; nū nene nalī ūmò wabo.

³Bagīshagi a ba Piliska nū Akula, a benabo batūmami bichane mulī Kilisito Yesu.

⁴A banhū benabo bakeega būpanga wabo kūlwa nguno ya būpanga bone. Nakūbalūmbaga no; nīyo ītī nene dūhū, alīyo nī kanisa ī jose ī ja banhū ba mahanga.

⁵Īgīshagi nī kanisa īyo īlī mu kaya yabo. Ngīshagi nū Epaineto ū ntogwa wane; ū ng'wenūyo al'itwajo lya kwandya kūlwa ng'wa Kilisito ū mu Asia.

⁶Ngīshagi nū Malia, ūyo walī ngunanhi wing'we ntaale;

⁷Bagīshagi na a badūgū bane a ba Andiloniko nū Yunia, abo baalī batungwa bichane. A benabo bamanīkile ū kū batūng'wa, hama nīyo batongi ū kūlī nene ū kūbiza mo ū mulī Kilisito.

⁸Ngīshagi nū ntogwa wane mulī Seeba ū Ampuliato;

⁹nū ntūmami ng'wichiswi mulī Kilisito ū Ubano ngīshagi, pyī nū ntogwa wane ū Staku.

¹⁰Nū Apele ū nkumūku kūlwa wishigwa mulī Kilisito, nang'hwe ngīshagi; bagīshagi a ba mu kaya ya ng'wa Alistobulo.

¹¹Nū ndūgū wane ū Helodiona ngīshagi; bagīshagi na a ba mu kaya ya ng'wa Nakiso abo balī mulī Seeba.

¹²Bagīshagi na a bashīke a bagagaja mu nīmo go ng'wa Seeba, a ba Tilufina nū Tilufosa; nū Pelesisi ngīshagi, nang'hwe nshīke ntūmami ntaale wa nīmo go ng'wa Seeba.

¹³Ngīshagi ū Lufo, ū nsolwa mulī Seeba, nū nina, ūyo nū nene alī mayū.

¹⁴Bagīshagi a ba Asinkilito, Fulegoni, Helime, Patuloba, Helima, pye na a badūgū abo bakikalaga hamò nabo.

¹⁵Bagīshagi na a ba Filologo nū Yulia, nū Nelea nū ilūmbūye, nū Olimpa, pye na a beela abo bakikalaga hamò nabo.

¹⁶Igīshagi mu kwibbipa kwela. Pyī ī kanisa ja ng'wa Kilisito jilīmugīsha.

¹⁷Bing'we badūgū bane, nalīng'wikūmbīlīja mubakangūke a bandya ba mihayo ya wilemeelwa; abo bakūtūūlaga sha kwipamya mu malange ayo ng'wamala kwilanga; lekanagi nabo a balī gīko.

¹⁸Nguno a banhū gītī benabo batantūmamīlaga Seeba wise Kilisito, bakatūmamīlaga nda jabo dūhū. Balemba lembi bang'holò ja banhū bawiza, kūlwa kalūngalūngīle kabo kakondooku ka kūlaalīkīja!

¹⁹Alīyo a bing'we ī haha ū wigwi wing'we būkumūkile kū banhū bose; nose nalī na būyegi kūlwa nguno ying'we, kwike natogilwe mubize bangū ū kū yawiza, alīyo ū kū yabūbi mubonekane mulī bachilū chilū.

²⁰Nang'hwe ū Mulungu wa mhola akūng'wangūhīla, antobagūlīle kū sīlīlī ya mhambala jing'we ū Shetani. Shigongo sha ng'wa Seeba wise Yesu Kilisito shibize hamò ning'we. Alichene.

²¹Ū ntūmami ng'wichane ū Timotheo alīmugīsha, na a badūgū bane a ba Luka nū Yasoni nū Sopatilo.

²²Nū nene Talitio ūyo nalī ng'wandīki wayo ī nyalūba yenīyī nalīmugīsha mulī Seeba.

²³Na Gayo, ūyo nalī ha ng'wakwe nang'hwe alīmugīsha, nīyo h'ūyo anilang'hanile; hama hū nang'hani wayo nī kanisa ī yose. Na Elasto, ū nang'hani wa hela ja mu nzengo, nang'hwe alīmugīsha, hamò na ndūgū Kwalito. [

²⁴Shigongo sha ng'wa Seeba wise Yesu Kilisito shibize hamò ning'we pye a bose, Alichene.]

²⁵Ali lūūlū, kūlī we ūyo adūgije kūmuguzuhya mu nzīla ya Ng'hūlū Jawiza ījo ninhwa nene, na būlomeeji ūbo Yesu Kilisito akūlomeelagwa, ūmo īloolekeja mihayo ya mbisīla īyo yalī ībisilwe makanza malīhu,

²⁶alīyo ī haha yafumbūlilwe; hama īkoolechiagwa mu nzīla ya shandīkwa sha bahangi gīt'ūmo alagīlile Mulungu wa shiku jose, gīkī pye a mahanga galangwe, gazunye gabize miigwi.

²⁷Kūlī Mulungu ūmò we wike wa masala, lībize ikūjo lya shiku jose mulī Yesu Kilisito: Alichene.