Read Sukuma Bible 2015 – Bibilia Ilagano Lya Kale 2015 Balumi 2 Bible Online

Balumi 2 - Sukuma Bible 2015 – Bibilia Ilagano Lya Kale 2015 bible

Balumi 2

¹Hūna lūūlū, ū bebe ūyo ūkūnamulaga ūngī, managa gīkī, nū bebe ūtī na sha kwibūūlīla; nīyo ūdeebe gīkī, ūmo ūkūnamulīlaga ng'wiyo hū ūkwilamulaga bebe ng'wenekīlī, nguno īyo ūkwībalaga kūbiza yabūbi, nū bebe ūkūyītaga.

²Alīyo tūmanile gīkī ū būlamuji bo ng'wa Mulungu ūbo akabūtūmamīlaga kūbalamula abo bakīītaga mihayo īlī gīko, ū wene būlī bo ng'hana.

³Ū bebe ūlī munhū dūhū, ī gīsī īkī ūkūbalamulaga abo bakwītaga mihayo īyo nū bebe ūkwīyītaga, ūkwiganikaga gīkī ūkūgwiliga ū nsango go ng'wa Mulungu?

⁴Nūūlū hamo ūkūbūdalahaga ū wiza bo ng'wa Mulungu, nū wiyūmīlīja bokwe, pyī nū būlindīīji bokwe? Ūtūmanaga gīkī ū wiza bokwe būlīkūduta wingīle mu kūgalūka?

⁵Alīyo īkī ūlī ngang'hanazu, nīng'holò yako ītatogilwe ū kūgalūka, managa gīkī ūkwibīkīlaga būpelanu a ha lūshikū lo būpelanu, aho būlamuji bo ng'wa Mulungu būkūkundūlīlwa mu būtūngīlīja.

⁶Nguno akūngabīla būlī ng'wene kūlenganīla na nhūmamīle yakwe.

⁷A biyūmīlīja mu kwīta yawiza, na kūkooba mihayo y'ikūjo na kūkumīlīja, a bachooji ba mihayo īyo ītī ya kūkenaagūka, a benabo akūbinha būpanga butashilaga.

⁸Alīyo abo bakashimīzīlaga mu nhūngwa ja malofu, a bachooji ba mihayo yabo ya benekīlī dūhū, abo balemile kūshimīzīla mu ng'hana, a bene bakūmalīlwa shiilī mu būpelanu būtaale!

⁹Būkūbiza ho būluhi na makoye mataale kūlwa būlī munhū ūyo akīītaga yabūbi, abize Nyudaya nūūlū w'ihanga līngī.

¹⁰Alīyo būlī ng'wene ūyo akīītaga mihayo yawiza, līkūbiza ho ikūjo na kūkumīlījiwa na mhola kūlwa nguno yakwe ū wa gīko, abize Nyudaya nūūlū w'ihanga līngī.

¹¹Nguno ū Mulungu atī na būsolanhya.

¹²Abo bakīītaga shibi alīyo batī na shilagīlo, bakūyagala mu būtūbiza na shilagīlo; na a babo bakīītaga shibi alīyo balī na shilagīlo, nabo bakūlamulwa mu nzīla ya shilagīlo.

¹³Ūkī ū kūlī Mulungu a batūngīlīja bat'abo bakagelelaga kūshidegeleka dūhū ī shilagīlo, alīyo a bīīti ba mihayo īyo yoolechiwe ū mu shilagīlo h'abo bakabalīlagwa būtūngīlīja.

¹⁴Nguno na a banhū ba mahanga abo batī ha sīlīlī ya shilagīlo ūlū bīīta īyo yidomanīgije na shilagīlo sha kasūmbīlwe, ū mu gīko babizaga shilagīlo kū boi benekīlī.

¹⁵Ū mu kwīta gīko bakoolechaga gīkī, a katongeelele ka shilagīlo kandīkile ū mung'holò jabo, nguno na a maganiko gabo gakabakaanīlaga, nūūlū kūbalwīlīla; īkī būlī ng'wene alī na wiyangūji bokwe ng'wenekīlī ūbo būkankaanīlaga.

¹⁶H'ūmo īkūbizīla nū mu lūshikū lo ng'wa Mulungu kwīlamula ī mihayo ya mbisīla ja banhū mu nzīla ya ng'wa Yesu Kilisito, ūmo joolekegije Ng'hūlū Jawiza ījo nakūjilomeelaga nene.

¹⁷Alīyo ū bebe ūlū ūkahayiagwa gīkī ūlī Nyudaya, na ūsendamīlile shilagīlo, hama ūkikumīlījaga gīkī ūmanile ū Mulungu;

¹⁸nī yīyo ayītogilwe wīmanile, nī yawiza ūmanīle ū kwīsola nguno ūlangilwe ī shilagīlo;

¹⁹ūmanile na gīkī ūlī ntongeeji wa babboku, n'isana lya ba mu giiti;

²⁰na gīkī ūlī ng'hūgūji wa bachilū chilū, na nangi wa banīgīnī, īkī ūshimanile ī shilagīlo, nī ng'hana wīdeebile.

²¹Hūna lūūlū, ū bebe ūyo ūlī nangi wa bangī, ūtilangaga ū bebe ng'wenekīlī? Ūkalomeelaga gīkī yaya ū kwiba, alīyo ū bebe ūkibaga?

²²Ūkahayaga gīkī yaya ū kūshihya, alīyo ū bebe ng'wenekīlī ūkashihyaga? Ū bebe ūtitogagwa na shiikolile sha kūlamiwa, alīyo ū kūnū ūja ūkwibaga sha mu maduku ga masamva?

²³Ū bebe ūkikumīlījaga kūlwa shilagīlo, ū kūnū ūndalaha ū Mulungu kūlwa kūshikenaagūla ī shilagīlo?

²⁴Nguno gwandīkilwe gīkī, “Ī lina lya ng'wa Mulungu līkūsondagūlagwa mu mahanga kūlwa nguno ying'we!”

²⁵Na ng'hana ī chene ū mhayo go kūsaalwa gūlī na solobo ūlū ūbiza ūlī nshikīlīja washo ī shilagīlo, alīyo ūlū ūbiza ūlī nkenaagūji washo ī shilagīlo, ū būsaalwa wako būkūbiza gītī būtūsaalwa!

²⁶Ī gīsī ū munhū nūūlū ūbiza atasaalilwe, alīyo akūshimīzīlaga mu katongeelele ka shilagīlo, ū mu mbika yakwe ya būtūsaalwa atūbalwa gīkī asaalilwe?

²⁷Ū munhū ūyo atasaalilwe ūlū ūshidima ī shilagīlo, akūkwenheleja nsango ū bebe ūyo ūsaalilwe, nī shandīkwa sha shilagīlo ūlī nasho alīyo ūtashidimile.

²⁸Ū Nyudaya higūlya gūlya dūhū atī Nyudaya ū ng'wenūyo, nū yūyo asaalilwe higūlya gūlya dūhū nang'hwe atasaalilwe.

²⁹Alīyo ū Nyudaya wa ng'hana, ng'wene alī wa būmunhū bo mu gatī, nū būsaalwa bo ng'hana būlī mu ng'holò, mhayo gwa mu moyo, ītī mu kūlondeela wandīke dūhū. Ū kūkumīlījiwa kwa ng'wa munhū ūyo alī gīko kūtafumaga kū banhū, kūkafumaga kūlī Mulungu!