Read Sukuma Bible 2015 – Bibilia Ilagano Lya Kale 2015 Balumi 3 Bible Online

Balumi 3 - Sukuma Bible 2015 – Bibilia Ilagano Lya Kale 2015 bible

Balumi 3

¹Nose hū kūhaya īlīho solobo kī ū kūlī munhū ū kūbiza Nyudaya? Nūūlū īlīho solobo kī ū mu kūsaalwa?

²Ūlīho mingī ī yawiza; nguno ī soolo ya mhayo hū bene abo bakinhwa ū mhayo go ng'wa Mulungu.

³Ī gīsī, ginehe hoi ūlū bamò babo būbiza batazunije? Hū kūhaya gīkī ū būtūzunya wabo būdūgije kūbūkenaagūla ū būsanyiwa bo ng'wa Mulungu?

⁴Ītī gīko na hado yaya! Leka ū Mulungu abize wa kūsanyiwa, alīyo būlī munhū abize nomolomo, gīt'ūmo gwandīkilwe gīkī, “Ū bebe wiyooleche ūlī ntūngīlīja ū mu kahayīle kaako, nū mu kalamulīle kaako ūbize ntindi.”

⁵Ī gīsī ū būkenaagūji wise ūlū wenheleja kūkumīlījiwa kwa būtūngīlīja bo ng'wa Mulungu, numho tūhaye ginehe ho a henaho? Gīkī ū Mulungu atī ntūngīlīja īkī akasaayaga? (A henaha nayomba mu kūtūmamīla kiganikīle ka banhū).

⁶Gūtī gīko na hado yaya! Ūlū chene numho ū Mulungu akūbalamula ginehe a ba mu sī?

⁷Hama lūūlū ī gīsī, ī ng'hana ya ng'wa Mulungu ūlū īlongeja kūkwīla kūlwa būlomolomo bone, nibūlī ū nene nataalī nūbūūlwa gīkī nalī nkenaagūji?

⁸Nibūlī natizūhaya ūmo bamò ba basondagūji bise bakūtwilembekejaga gīkī tūkūhayaga, “Twītagi dūhū ī shibi, īkwilonga mo ī misoga!” A benabo ū nsango gwabo gūtūngīlīgije!

⁹Ī gīsī lūūlū tūhaye ginehe? Hamo gīkī a bise tūbakīlile pye a bangī? Ītī gīko na hado yaya; nguno twamalaga kūhaya gīkī pye a banhū basugilwe na shibi, babize Bayudaya nūūlū ba mahanga gangī![1]

¹⁰Gīt'ūmo gwandīkilwe gīkī, “Atīho ntūngīlīja nūūlū ūmò,

¹¹atīho ng'witegeleja, atīho ūyo akankoobaga Mulungu.

¹²Pye batalile, a bose bakenaagūkile, atīho ūyo akīītaga yawiza, ndūhū nūūlū ūmò!

¹³Ī limilīlo lyabo līlī shigila shikundūkile, Ī ndīmi jabo bakajitūmamīlaga kūlemba lemba; Ī milomo yabo īkafunyaga būsūngū gītī bo ng'hoboko.

¹⁴Būlī ng'wene ū mu nomo okalile shidūki na mazumo.

¹⁵A magūlū gabo mangū kūsūūsūūba kūja kwita mininga.

¹⁶Būlī hene aho būbīta bakalekaga makoye na mayanga;

¹⁷Ī shimīzīle ya mhola batīmanile.

¹⁸Ū mu miso gabo batī na logohano kūlī Mulungu nūūlū hado!”

¹⁹Ali lūūlū, tūmanile gīkī pyī ī mihayo īyo īhayiwe mu shilagīlo, īhayiwe kūlwa banhū abo balī musho, gīkī būlī nomo gūhuumūjiwe, hama pye a ba mu sī bigeleelwe kūbiza ha sīlīlī ya būlamuji bo ng'wa Mulungu.

²⁰Hū kūhaya ū kū būtongi bokwe atīho ū wa kūbalīlwa būtūngīlīja kūlwa kūshikīlīja shilagīlo; nguno ū mu shilagīlo gūlīmo mhayo gwa kūmana shibi.

²¹Alīyo ī haha, ū būtūngīlīja bo ng'wa Mulungu ūbo būkaanīlilwe mu shilagīlo na mu bahangi, bomalile koolechiwa; kwike ītī mu nzīla ya shilagīlo.

²²Ū boi būlī būtūngīlīja bo ng'wa Mulungu, ūbo būlīho kūlwa bazunya bose mu nzīla ya kūnzunya Yesu Kilisito; būtīho būsolanhyiwa.

²³Nguno pye a banhū balī na shibi, balebile a h'ikūjo lya ng'wa Mulungu.

²⁴Alīyo bakūbalīlagwa būtūngīlīja dalali kūlwa shigongo shakwe, nguno ya būkomooji ūbo būlī mulī Kilisito Yesu;

²⁵ūyo Mulungu akamfunya kūbiza shitambo sha kwenha būsangī kūlwa mininga gakwe mu nzīla ya kūzunya, ū mhayo ūyo akagwīta kūlwa wiyūmīlīja bokwe, ūboolecha ū būtūngīlīja bokwe ūbo botūmamaga nī kale mu kūleka kūshibalīla nsango nī shibi īsho shītagwa ng'wikanza lyene.

²⁶Ū haha ū Mulungu akūboolechaga ū būtūngīlīja bokwe, gīkī abize ntūngīlīja na wa kūng'wisaabīla būtūngīlīja būlī ng'wene ūyo ūnzunya Yesu.

²⁷Ī gīsī lūūlū, ī haha būlī halī ū wikumīlīja? Ū wene būpamīlilwe hanze. Kūlwa shilagīlo kī, sha shītwa? Na hado yaya, īlī kūlwa shilagīlo sha kūzunya.

²⁸Nose lūūlū tūlībona hape gīkī, ū munhū akabalīlagwa būtūngīlīja kūlwa nguno ya kūzunya, mhayo ūyo gūtafumaga mu kūshikīlīja shilagīlo.

²⁹Ūlū chene numho kolaga ū Mulungu alī Mulungu wa Bayudaya dūhū, atī wabo a banhū ba mahanga a gangī? Yaya, alī wabo na a ba mahanga a gangī!

³⁰Nguno alīho Mulungu ūmò wike; ūyo akūbabalīla būtūngīlīja kūlwa kūzunya pye a banhū; babize basaalilwe nūūlū babize batasaalilwe, bose pye mu nzīla ya kūzunya gīko dūhū.

³¹Hū kūhaya lūūlū tūshikenaagūle dūhū ī shilagīlo kūlwa nguno ya kūzunya? Gūtajile gīko na hado yaya, ī shilagīlo ī shene tūshidimile gete.