Read Sukuma Bible 2015 – Bibilia Ilagano Lya Kale 2015 Balumi 5 Bible Online

Balumi 5 - Sukuma Bible 2015 – Bibilia Ilagano Lya Kale 2015 bible

Balumi 5

¹Hūna lūūlū īkī tūbalīlilwe būtūngīlīja kūlwa kūzunya, tūlī na mhola ū kūlī Mulungu, mu nzīla ya ng'wa Seeba wise Yesu Kilisito.

²Ū mulī we ū ng'wenūyo, tūlugūlīlilwe mīta gwa kwingīla ū mu wiza ūbo twīmīīlile mubo kūlwa kūzunya; na tūkūyegaga kūlwa kūliisagīlwa ī likūjo lya ng'wa Mulungu.

³Hama nīyo ītī gīko dūhū, alīyo tūkūyegaga nūūlū aho tūkūluhiagwa, nguno tūmanile gīkī ū būluhi būkinhaga wiyūmīlīja.

⁴Ū wiyūmīlīja būkaguzuhyaga, ī nguzu jikinhaga kwisagīlwa.

⁵Hama ū kwisagīlwa kūtīko kūtūdimya minala, nguno ū Mulungu wamala kūpumunhīla būtogwa bokwe ū mu myoyo yise kūlwa ng'wa Moyo Ng'wela ūyo watwinha.

⁶Īkī nūūlū aho twalī tūtaalī bagokolo, alīyo aho lyang'wa ī likanza, ū Kilisito ūcha kūlwa banhū babūbi.

⁷Ū munhū īlī shilambu no ū kwifunya kūnchīlīla munhū ūngī, nūūlū akabiza ntūngīlīja; hamo ūlū munhū wawiza alīho ūyo ashikile kūgima kwifunya kūnchīlīla!

⁸Alīyo ū Mulungu ū ng'wene atoolekegije ū būtongwa bokwe ūmo atūtogelilwe mu gīkī, ū Kilisito akatūchīlīla a bise aho twalī tūtaalī banhū ba shibi.

⁹Hūna lūūlū īkī tūbalīlilwe būtūngīlīja mu nzīla ya mininga gakwe, hū kūhaya ū mulī we tūkūpījiwa, twīnge ū mu būpelanu bo ng'wa Mulungu.

¹⁰Īkī ūlū aho twalī tūtaalī banishi gūkadūlīka gwa kwītwa a bise kūbiza na būsangī nang'hwe ū Mulungu, mu nzīla ya kūcha kwa Ng'wana wakwe, hūna lūūlū ī haha īkī tūlī na būsangī nang'hwe, tūkūpījiwa ū mu būpanga bokwe.

¹¹Na hangī ītī gīko dūhū, alīyo tūkūyegelaga ū mulī Mulungu kūlwa nguno ya ng'wa Seeba wise Yesu Kilisito, ūyo kūlwa nguno yakwe ī haha twamalile kūbiza na būsangī hamò na Mulungu.

¹²Hūna lūūlū, ūmo shibi shikingīlīla mu sī mu nzīla ya ng'wa munhū ūmò, nī licha līkingīla mu nzīla ya shibi, lyūbakūbanīja pye a banhū; nguno pye balī na shibi.

¹³Nīyo ī shibi shilīho kūfuma kale, na a haho shalī shitaalī kūbiza ho shilagīlo ū mu sī; nūūlū īkī ī shibi shitabalagwa aho shitīho shilagīlo.

¹⁴Alīyo ī licha līsugile kwīngīīla kūlī Adamu kūshisha kūlī Musa, nīyo lyalī lībasugile na a babo batīītile shibi sha kūlenganīla na būkenaagūji bo ng'wa Adamu, ūyo walī būlolelo bokwe ūyo walī ahelilwe kwiza.

¹⁵Alīyo ū būhūbi būtī gīt'ūmo shilī ī shakwinhwa; nguno ūlū gīkī bingī bakingīla mu kūcha kūlwa būhūbi bo ng'wa munhū ūmò, ī shigongo sha ng'wa Mulungu nī shakwinha īsho shifumile mu shigongo sha ng'wa Munhū ūmò, ū Yesu Kilisito, kūlwa nguno ya bingī, shilī shitaale no shikīlanīgije.

¹⁶Hama ī shakwinhwa shitabizile gīt'ūmo galī a matwajo ga shibi shakwe ū munhū ūyo ūmò; nguno ū būlamulwa ūbo būlīho kūlwa būhūbi bo ng'wa munhū ūmò, būkatwalaga mu nsango; alīyo ī shakwinhwa īsho shilīho kūlwa būhūbi bo banhū bingī, shikwingījaga mu būtūngīlīja.

¹⁷Nguno ūlū kūlwa būhūbi bo ng'wa munhū ūmò ī licha līsugile mu nzīla yakwe ū munhū ng'wenūyo, īlī kūtinda no abo bakūshanukūlaga ī shigongo ī shitaale, nī shakwinhwa sha būtūngīlīja; a bene bakūbiza basugi ū mu būpanga, mu nzīla ya ng'wa Munhū ūmò, ū Yesu Kilisito.

¹⁸Hūna lūūlū, gīt'ūmo pye a banhū babalīlilwe nsango kūlwa būhūbi bo ng'wa munhū ūmò, īlī gīko nū mu shītīle sha būtūngīlīja ī sha ng'wa Munhū ūmò, a bose bakūbalīlagwa būtūngīlīja wa būpanga.

¹⁹Na hangī gīt'ūmo banhū bingī bakīītwa kūbiza ba shibi kūlwa būshitiigwa bo ng'wa munhū ūmò, īlī gīko nū mu wigwi bo ng'wa Munhū ūy'ūmò, bingī bakwītagwa kūbiza batūngīlīja.

²⁰Alīyo ī shilagīlo shikiza kūlwa gīkī bongeje kūkwīla ū būhūbi; kwike aho shakwīla ī shibi, ī shigongo hū shūkwīla na kūtinda ho.

²¹Ūbize gīkī ūmo shibi shilī na būsugi mu nzīla ya kūcha, nī shigongo nasho ū mulī Seeba wise Yesu Kilisito shisuge mu nzīla ya būtūngīlīja, kūshisha mu būpanga butashilaga.