Read Sukuma Bible 2015 – Bibilia Ilagano Lya Kale 2015 Balumi 6 Bible Online

Balumi 6 - Sukuma Bible 2015 – Bibilia Ilagano Lya Kale 2015 bible

Balumi 6

¹Hū kūhaya tūhaye ginehe ho a henaho, tūdūūke mu shibi gīkī ī shigongo shongeje kūkwīla?

²Na hado yaya; ī gīsī ūlū tūchile ū kū shibi, numho tūkūbiza bapanga ginehe hangī ū musho?

³Nūūlū hamo mutamanile gīkī pye abo tūbatīījiwe mulī Kilisito Yesu, tūbatīījiwe mu kūcha kwakwe?

⁴Hū kūhaya ū mu kūbatīījiwa tūkajīkwa hamò nang'hwe twingīla mu kūcha; ībize gīkī, ūmo Kilisito akajūūka kūfuma mu bafu mu nzīla y'ikūjo lya ng'wa Ise, gīko na a bise tūshimīzīle mu būpanga būpya.

⁵Nguno ūlū tūsangījiwe hamò nang'hwe ū mu kūcha kwakwe, tūkūbiza hamò nang'hwe nū mu kūjūūka kwakwe.

⁶Tūmanile gīkī ū būmunhū wise ū bo kale bomala kūkong'wa ha nsalaba hamò nang'hwe, ū mīlī gwa shibi gūkenaagūlwe, tūtizongeja hangī kwikala mu būsese bo shibi.

⁷Nguno ūyo achile ng'wene atungūlilwe ū kū mihayo ya shibi.

⁸Hūna lūūlū, ūlū tūchile hamò nang'hwe ū Kilisito, tūzunije gīkī tūkūbiza bapanga hamò nang'hwe.

⁹Nguno tūmanile gīkī ū Kilisito wamala kūjūūka kūfuma mu bafu, atīko kūcha lūkangala lūngī, ī licha lītīko kūnsuga hangī.

¹⁰Ū mu kūcha kwenūko akashichīlīla ī shibi lūkangala lūmò lwenūlo dūhū, alīyo ī haha ū mu būpanga, alī mpanga kūlī Mulungu.

¹¹Na a bing'we īng'wigeleelilwe ng'wibone gīkī muchile ū kū shibi, alīyo ū mulī Kilisito Yesu mulī bapanga kūlī Mulungu.

¹²Hūna lūūlū, ī shibi shitizūsuga ū mu mīlī gwing'we ū gwa kūcha, nose ng'wikale mukūzunyaga kūshikīlīja mihayo ya kwikūmva kwa mīlī.

¹³Na hangī yaya nūūlū kūfunya ibudīka lyose lyose lya mīlī gwing'we, gīkī lībize shitūmamīlo kū mihayo ītī ya būtūngīlīja, kūlwa kwīta shibi. Alīyo ifunyagi kūlī Mulungu, mubize gītī mulī bapanga kūfuma mu bafu, na a mabudīka ga mibīlī ying'we gabize shilanga sha būtūngīlīja kūlwa ng'wa Mulungu.

¹⁴Nguno ī shibi shitūmusuga a bing'we, īkī mutī ha sīlīlī ya shilagīlo, alīyo mulī ha sīlīlī ya shigongo.

¹⁵Numho hū kūhaya ginehe ho a henaho? Hamo gīkī tūdūgije kwīta dūhū ī shibi, īkī tūlī ha sīlīlī ya shigongo? Ītī gīko na hado yaya!

¹⁶Mutamanile gīkī ūlū ng'wifunya kūbiza basese ba kūng'wigwa ose ose, numho ng'wabizaga basese bakwe ūyo mukūng'wigwaga ng'wenūyo? Ni ībizage kwitūūla ha sīlīlī ya shibi īsho shikingījaga mu kūcha, nūūlū ha sīlīlī ya wigwi ūbo būkingījaga mu būtūngīlīja!

¹⁷Kwike ū Mulungu alūmve, nguno nūūlū īkī ng'walī basese ba shibi ī kale, alīyo mukidohya ū mung'holò jing'we ng'ūbiza bigwi ū kū mbika ya malange ayo mukinhwa gamutongeele.

¹⁸Hūna aho ng'wīnjiwa ū mu būsese bo shibi, ng'wītwa kūbiza basese ha sīlīlī ya būtūngīlīja.

¹⁹Nalīlūngalūnga ning'we mu mbika ya kalūngalūngīle ka banhū bose, nguno ya būgokolo bo būmunhū wing'we. Nose hū kūhaya gīkī, ūmo ng'wagafunījaga a mabudīka ga mibīlī ying'we ī kale kū būsese wa būsoso na būbi, gīkī ng'wīte ya malofu, ī haha gafunyagi lūūlū a mabudīka ging'we genayo gabize mu būsese ha sīlīlī ya būtūngīlīja, gejiwe.

²⁰Nguno aho ng'walī basese ba shibi ng'walī mu wiyabī, ūbo būtī bo mu būtūngīlīja.

²¹Ī gīsī ū ng'wikanza lyenīlo ng'wapandīkaga solobo kī? Tūhaya ī haha ī mihayo yenīyo īkūmudimyaga minala dūhū ūlū ng'wīyizūkwa, nguno ū kū ng'halīlo yaho līlīho icha!

²²Alīyo īkī ī haha mutungūlilwe ū mu būsese bo shibi, ng'wingījiwa mu būsese bo ng'wa Mulungu, mulī nayo ī solobo ying'we; hū kwejiwa, ī ng'halīlo yaho būpanga butashilaga.

²³Nguno ī mheela ya shibi īlī kūcha, alīyo ī shakwinha sha ng'wa Mulungu, shilī būpanga butashilaga mulī Kilisito Yesu Seeba wise.