Read Sukuma Bible 2015 – Bibilia Ilagano Lya Kale 2015 Balumi 7 Bible Online

Balumi 7 - Sukuma Bible 2015 – Bibilia Ilagano Lya Kale 2015 bible

Balumi 7

¹Nūūlū hamo shi badūgū bane mutamanile ī gīkī ī shilagīlo shikabizaga shinsugile ū munhū aho ataalī mpanga dūhū? Ū gwenūyū nalībawīla abo bashimanile ī shilagīlo.

²Īlī gīt'ūmo nkīma akabizaga atungilwe na shilagīlo sha kwikala na ngoshi aho ataalī mpanga, ū ngoshi ūlū ūlinda ūcha, ū nkīma ng'wenūyo wīngaga ū mu shilagīlo sha ngoshi wakwe.

³Alīyo ū ngoshi ūlū ataalī mpanga hūna ū nkīma ng'wenūyo ūneka, ūja ūūkatoolwa na ngosha ūngī, akwitanwa nshihani; ūlū ūcha ū ngoshi akūbiza watungūlagwa ū mu shilagīlo shenīsho, nūūlū akatoolwa na ngosha ūngī atūbiza nshihani.

⁴H'ūmo īlī nū kū bing'we badūgū bane; a bing'we muchile ū kū shilagīlo īkī mulī mu mīlī go ng'wa Kilisito, mubize ba ng'wa ūngī, ūyo akajūūchiwa kūfuma mu bafu; gīkī tūntwagīje matwajo Mulungu.

⁵Nguno aho twalī tūtaalī tūlondeela nhūngwa ja mīlī, ū kwikūmva kwa shibi ūko kwatūmamaga ū mu mibīlī yise kūlwa nguno ya shilagīlo, kwalītwagījaga matwajo ī licha.

⁶Alīyo ī haha tūtīmo ū mu shilagīlo, tūchile ū kū shikolo īsho shalī shitūtungile ī kale, tūdūle kūtūmama mu katongeelelwe kapya ka kūfuma kūlī Moyo, yaya a katongeelelwe a ka kale, a ka kūtongeelwa na wandīke.

⁷Ī gīsī tūhaye ginehe hangī? Gīkī ī shilagīlo h'ī shibi? Na hado yaya! Nguno ūlū ni ītī mu nzīla ya shilagīlo ni natashimanile ī shibi; nū būbi wa kwikūmva ni natabūmanile ūlū ni shitī shilagīlo kūhaya gīkī, “Yaya ū kwikūmva.”

⁸Alīyo ī shibi shikashitūmamīla ī shilagīlo, ū mulī nene shūtūūla būlī mbika ya kwikūmva; nguno ūlū gatīho malange ī shibi shichile.

⁹Nose hū kūhaya gīkī, naalī mpanga aho naalī natī ha sīlīlī ya malange; alīyo aho shiza shilagīlo, ī shibi shūpīmbūka,

¹⁰ū nene nūcha. Na lūūlū ī shilagīlo īsho shalī shiigelile kūnenhela būpanga, shūningīja mu kūcha ū nene.

¹¹Nguno ī shibi shikapandīka ng'wanya gwa kūnilemba lemba mu nzīla ya shilagīlo, shūnibūlaga.

¹²Hūna lūūlū a malange galī meela, na gatūngīlīgije, hama gawiza; nī shilagīlo sheela na shitūngīlīgije, nīyo shawiza.

¹³Hū kūhaya gīkī ū mhayo gwawiza gūkabiza gwenha icha ū kūlī nene? Ītī gīko na hado yaya, alīyo ū mu kwiyoolecha gīkī ī shibi shilī shabūbi ng'hana, shikagūtūmamīla ū mhayo ū gwawiza, shūnenhela icha ū nene. Na lūūlū ū mu nzīla ya shilagīlo, ī shibi shūbonekana gīkī shilī shabūbi kūheeba!

¹⁴Nguno tūmanile gīkī a malange galī ga Kiimoyo, alīyo ū nene nalī wa nhūngwa ja kūlondeela mīlī; nagūjiwe kū būsese bo shibi, h'īsho shinisugile.

¹⁵Nguno natagūmanaga ūyo nakagwītaga, nose natagwītaga ūyo natogilwe kūgwīta, alīyo ūyo nagūkolilwe h'ūyo nakagwītaga.

¹⁶Hūna lūūlū īkī nakagwītaga ūyo natagūtogilwe, ū mu gīko nakizunīlījaga na a malange, gīkī galī gawiza.

¹⁷Hū kūhaya natī nene ūyo nakīītaga, alīyo ī shibi īsho shikikalaga mulī nene!

¹⁸Nguno namanile gīkī ū mulī nene, ū mu būmunhū bone, būtikalaga mo wiza; īkī ū kūtogwa natogilwe, alīyo ū kwīta ū gwawiza nalemeelilwe.

¹⁹Nakalemeelagwa gete ū kwīta ī yawiza īyo nītogilwe, alīyo ī yabūbi īyo natītogagwa h'īyo nakīyītaga!

²⁰Hūna lūūlū, ūlū nakagwītaga ū mhayo ūyo natagūtogilwe, numho natī nene ūyo nakīītaga; alīyo ī shibi īsho shikikalaga ū mulī nene.

²¹Nose nakūbonaga gīkī, ū mulī nene galīmo malange ayo gakūninhaga ng'hūmbū ja kwīta yawiza, alīyo būlīmo na būbi.

²²Nguno ū mu gatī ya būmunhū bone, nagayegelile a malange ga ng'wa Mulungu.

²³Kwike nakūbonaga! Malange gangī, nago galīho gishishinīkile ū mu mīlī gwane,[2] gakwilwishaga na a malange ga mu maganiko gane, ganīīta kūbiza nsese kū malange ga shibi īsho shilīmo ū mu mīlī gwane

²⁴Aga, nashila būlī! Nani akūniguna nagūpūlūgūke ū mīlī gwa kūcha gwenūyū?

²⁵Alīyo ū Mulungu alūmve ū mulī Seeba wise Yesu Kilisito. Nguno ū būgima bo mhayo būlī gīkī, ū nene ū mu maganiko gane, nakagatūmamīlaga malange ga ng'wa Mulungu. Alīyo ū mu nhūngwa ja mīlī, nalī ha sīlīlī ya malange ga shibi!