Read Sukuma Bible 2015 – Bibilia Ilagano Lya Kale 2015 Balumi 8 Bible Online

Balumi 8 - Sukuma Bible 2015 – Bibilia Ilagano Lya Kale 2015 bible

Balumi 8

¹Ali lūūlū, ī haha gūtīho nsango ū kū banhū abo balī mulī Kilisito Yesu.

²Nguno ū mulī Kilisito Yesu, ī shilagīlo sha ng'wa Moyo shanitungūlile, shūnīnja ū mu shilagīlo sha shibi na kūcha.

³Īkī ū mhayo ūyo gwalī gūtadūlīkanile kwītwa mu nzīla ya shilagīlo, īsho shitī na nguzu kūlwa nguno ya būgokolo wa mīlī, ū Mulungu wagwītile aho wantūma ū Ng'wana wakwe kwiza, alī mu suso ya mīlī gwa shibi kūlwa nguno ya shibi; ū mu mīlī gwenūyo ūshinha nsango ī shibi.

⁴Ū mu bise yūshikīlījiwa īyo īgongilwe na būtūngīlīja bo mu shilagīlo, a bise abo tūtashimīzīlaga mu nhūngwa ja mīlī, abo tūkashimīzīlaga mu nhūngwa ja Kiimoyo.

⁵Nguno abo balī na kikalīle ka kūlondeela nhūngwa ja mīlī, bakadīlīlaga ya mīlī. Alīyo abo balī na kikalīle ka kūlondeela nhūngwa ja Kiimoyo, bakadīlīlaga ya ng'wa Moyo Ng'wela.

⁶Ī liganiko lya nhūngwa ja mīlī, lījīlīīlile mu kūcha, alīyo ī liganiko lya nhūngwa ja kūfuma kūlī Moyo līkenhaga būpanga na mhola.

⁷Nguno ī liganiko lya nhūngwa ja mīlī līlī lya wanishi ū kūlī Mulungu, lītī na widohya ū kū shilagīlo sha ng'wa Mulungu; nīyo lītūdūla ū kwīta ī gīko na hado yaya!

⁸Nose abo bakashimīzīlaga mu nhūngwa ja mīlī batūdūla ū kūnyeja ū Mulungu.

⁹Kwike a bing'we mutī ba nhūngwa ja mīlī, mulī ba nhūngwa ja ng'wa Moyo, nguno ū Moyo wa ng'wa Mulungu akikalaga mu bing'we. Alīyo ūlū ose ose atī nang'hwe ū Moyo wa ng'wa Kilisito, ū ng'wenūyo atī wakwe.

¹⁰Hūna lūūlū ū Kilisito ūlū alī mu bing'we, ū mīlī gwing'we gūchile kūlwa nguno ya shibi, alīyo ū moyo gūlī mpanga kūlwa nguno ya būtūngīlīja.

¹¹Nīyo ū Moyo wakwe ūyo akanjūūcha Kilisito kūfuma mu bafu ūlū wikala mo ū mu bing'we, ūyo akanjūūcha Kilisito ng'wenūyo akwīyinha būpanga nī mibīlī ying'we ī ya kūcha, mu nzīla ya ng'wa Moyo ūyo alī mu bing'we.

¹²Hūna lūūlū badūgū bane, tūlī na būgasa, gwike ītī kūlwa mīlī, gīkī twikale mu nhūngwa ja mīlī.

¹³Nguno ūlū ng'wikala mu nhūngwa ja mīlī numho ng'wakūmbūla kūcha, alīyo ūlū ng'ūshibūlaga ī shītīle sha mu mīlī kūlwa nguzu ja ng'wa Moyo, mukūbiza bapanga.

¹⁴Nguno pye abo bakatongeelagwa na Moyo wa ng'wa Mulungu, balī baana ba ng'wa Mulungu.

¹⁵Ūkī mutanukūlile moyo gwa būsese, gīkī mushoke hangī kwikala mu booba; alīyo ng'wamalile kūng'wanukūla Moyo wa kūng'wīta kūbiza baana; ū mulī wei tūkalīlaga “Aba,” Baba.

¹⁶Ū wei ū Moyo akakaanīlaga hamò nī myoyo yise gīkī tūlī baana ba ng'wa Mulungu.

¹⁷Nose ūlū tūlī baana, hū kūhaya tūlī bingīji, bingīji ū kūlī Mulungu, bingīji hamò nang'hwe ū Kilisito; ūlū tūluhiwa hamò nang'hwe, gīkī nū kūgūngūhiwa tūlagūngūhiwe hamò nang'hwe.

¹⁸Ū nene nakūbūbalaga ū būluhi w'ikanza lya haha gīkī būtigelile ū kūgelanījiwa nī likūjo īlo līkoolechiwa kūlwa nguno yise.

¹⁹Nīyo ī shiseeng'wa shilindanile mu kwisagīlwa kūtaale kūshisha līshike ī likanza lya koolechiwa a baana ba ng'wa Mulungu, bamanīke.

²⁰Nguno ī shiseeng'wa shilī ha sīlīlī ya būsugi bo mihayo ītī na solobo, ītī kūlwa būtogwa washo, alīyo kūlwa nguno yakwe ūyo ashitūūlile a ha sīlīlī ya būsugi wenūbo, mu kwisagīlwa.

²¹Nī shiseeng'wa nasho shikūtungūlwa, shīnge ū mu būsese wa būkenaagūki, shingīle mu wiyabī w'ikūjo lya baana ba ng'wa Mulungu.

²²Tūmanile gīkī pyī ī shiseeng'wa shikūgang'hīlaga na kūsaatwa hataale kūshisha nī haha yenīyī!

²³Hama ītī gīko dūhū, alīyo na a bise abo tūlī na matwajo ga kwandya ga ng'wa Moyo, nise tūkūgang'hīlaga ū mu būmunhū wise ū bo mu gatī, nguno tūgūlindīīlile na ng'hūmbū nhaale ū mhayo gwa kwītwa a bise kūbiza baana, hū kūkomoolwa kwa mīlī gwise.

²⁴Nguno tūpījiwe kūlwa kwisagīlwa; ī gīsī ū kwisagīlwa ūlū kwandya kūbonwa, angū numho kūtī kwisagīlwa, nguno ū munhū akūshiisagīlwa ginehe īsho alīshibona?

²⁵Alīyo ūlū tūtūshibonaga īsho tūshiisagīlilwe, tūkūshilindīīla mu wiyūmīlīja būtaale.

²⁶Nīyo hangī ū Moyo akatūgunanhaga ū mu būgokolo wise, nguno a bise tūtamanile ū kūlomba gīt'ūmo shitwigeleelilwe, alīyo ū Moyo akatūlombelaga wei ng'wenekīlī, nīyo mu būgang'hīji ūbo būtadūgije kūsomboolwa.

²⁷Hama ū Ngīsīlīja wang'holò ja banhū alīmanile ī liganiko lya ng'wa Moyo, ūyo akabalombelaga a beela gīt'ūmo Mulungu atogelilwe.

²⁸Tūmanile gīkī, ū kū banhū abo bantogilwe Mulungu, abo bitanwa mu kasolele kakwe, pyī ī shikolo shikatūmamaga mu būsangī būmò kūlwa kwenha yawiza.

²⁹Nguno abo abamanile kūfuma kale hū bene abo abasolile kūfuma kale, gīkī babize mu suso ya Ng'wana wakwe; ū wei ū Ng'wana abize tangi mu badūgū bingī.

³⁰Hama abo abasolile kūfuma kale hū bene abo abitanile; abo abitanile hū bene abo ababalīlile būtūngīlīja, abo ababalīlile būtūngīlīja hū bene abo abagūngūhije.

³¹Nose tūhaye mhayo kī ū mu yose yenīyī? Ū Mulungu ūlū alī kū lwandī lwise, nani ūyo akūtūchaama?

³²Ūyo atangugīlile Ng'wana wakwe ng'wenekīlī gete, alīyo akamfunya kūlwa nguno yise pye a bose, akūleka ginehe ū kūtwinha dalali pyī ī shikolo hamò nang'hwe?

³³Nani ūyo adūgije kūbabūūla a basolwa ba ng'wa Mulungu? Nguno ū Mulungu h'ūyo akūbabalīlaga būtūngīlīja!

³⁴Al'ū wa kūbasola būbi nani? Ū Nombeji wise ū ng'wene alī kū nkono gwa būlyo gwa ng'wa Mulungu; h'ū Kilisito Yesu ūyo akacha, hama na kūtinda ho a henaho, ūjūūka!

³⁵Nani ūyo adūgije kūtūlekanya nabo ū būtogwa bo ng'wa Kilisito? Hamo ūlū būluhi, nūūlū makoye, nūūlū kūzwangana, nūūlū nzala, nūūlū būzuuka, nūūlū nhabaala, nūūlū līlūshū?

³⁶H'ūmo gwandīkīlilwe; gīkī, “Līīmi ji tūkūbūlagagwa kūlwa nguno yako, tūbalilwe gītī tūlī ng'holo ja kūsīnzwa!”

³⁷Alīyo ū mu yose īyī tūlī batindi bataale, ū mulī we ūyo atūtogilwe.

³⁸Nguno namanile hape gīkī, nūūlū kūcha, nūūlū būpanga, nūūlū bamalaika, nūūlū basugi, nūūlū īsho shilīho, nūūlū īsho shilabize ho, nūūlū mabūdūla;

³⁹nūūlū mihayo ya higūlya no, nūūlū ya kū shimu, nūūlū shiseeng'wa shingī shose shose, shitīho īsho shidūgije kūtūlekanya nabo ū būtogwa bo ng'wa Mulungu, ūbo būlī mulī Kilisito Yesu Seeba wise.