Read Sukuma Bible 2015 – Bibilia Ilagano Lya Kale 2015 Balumi 9 Bible Online

Balumi 9 - Sukuma Bible 2015 – Bibilia Ilagano Lya Kale 2015 bible

Balumi 9

¹Nalīhaya gwa ng'hana mulī Kilisito, natūlomalomaga; nū moyo gwane gūlīnikaanīla mulī Moyo Ng'wela,

²gīkī būlī lūshikū ū mung'holò yane nalī na būpīna, na kūsaatwa kūtaale no.

³Nguno ū nene ng'wenekīlī ni nilombela hambū hambū nūūlū kūzung'wa, nabize hanze ya ng'wa Kilisito kūlwa nguno ya baana ba ng'wise, a badūgū bane ū mu mīlī;

⁴h'a Baisilaeli, abo mhayo gwa kwītwa kūbiza baana gūlī gwabo, nī likūjo, nū būlagane, nū gwa kwinhwa shilagīlo, na a kalamīje ako kigeleelilwe, nī ya wisagījiwa; pyī ī yose yabo.

⁵Pye na a bakūlūgenji a basolwa balī babo, hama ū mu kabyalīlwe ka mīlī, nū Kilisito afumile mubo; ūyo alī Mulungu wa bose, na nkumīlījiwa wa shiku jose: Alichene.

⁶Kwike ahene ū mhayo gwa ng'wa Mulungu gūtachile mpandagīlo, nguno batī Baisilaeli pye abo bafumile mulī Isiraeli.

⁷Nūūlū hangī ītī gīkī pye abo bafumile mu būbyīle wa ng'wa Abulahamu balī baana; nguno gūhayiwe gīkī, “Ū būbyīle wako būkwitanīlwa mulī Isaka.”

⁸A makūlū gaho galī gīkī, a baana ba mu mīlī batī baana ba ng'wa Mulungu, alīyo a baana ba kwisagījiwa h'abo babalīlilwe ū mu būbyīle.

⁹Nguno ū mhayo gwa wisagīja gūhayile gīkī, “Nakūshoka ikanza gītī lyenīlī, hūna ū Saala akūpandīka ng'wana.”

¹⁰Hama nīyo gūtī gīko dūhū, alīyo nū Lebeka nang'hwe akabūūcha nda ya kūfuma kūlī ngosha ūmò, ū sīswe nkūlū ū Isaka.

¹¹A baana aho bataalī kūbyalwa, bataalī kwīta mhayo gose gose gwawiza nūūlū gwabūbi, yalī gīkī kashikīīle a kasolele ka būgabanhya bo ng'wa Mulungu;

¹²mhayo ūyo gūtalondeelaga shītīle, alīyo gūlīho kūlwakwe ū Nsoji. Hūna lūūlū ū Lebeka akawīlwa gīkī, “Ū ntaale akūntūmamīla ū ndo.”

¹³Gīt'ūmo gwandīkilwe gīkī, “Ū Yakobo nantogilwe, alīyo ū Esau nankolilwe.”

¹⁴Ī gīsī a henaho tūhaye ginehe ho? Gīkī ū Mulungu atī ntūngīlīja? Ītī gīko na hado yaya.

¹⁵Nguno nū kūlī Musa alīhaya gīkī, “Nakūnkūlīlwa ūyo nalankūlīlwe, na nakūnsaatwa ūyo nalansaatwe.”

¹⁶Nose ū mhayo gwenūyū gūtakūūbīlījaga gīkī ūyū nganja kūtinda, nūūlū gīkī hamo mpeeji no; ū goi gūlī mu kasolele ka ng'wa Mulungu, ūyo akachīlaga shigongo.

¹⁷Nguno ū mu shandīkwa akawīlwa ū Falao gīkī, “Ū bebe nakūtūūlile ho kūlwa nguno ya mhayo gwenūyū, gīkī nabooleche ū būdūla bone ū mulī bebe, na gīkī ī lina lyane līkumūchiwe hose pyī ū mu sī.”

¹⁸Hūna lūūlū akankūlīlagwa ūyo ūtogwa kūnkūlīlwa wei ng'wenekīlī, alīyo hangī akang'wītaga kūbiza ngūnu ūyo ūtogwa kūng'wīta kūbiza ngūnu.

¹⁹Namanile ūkūnibūja gīkī, “Hama nibūlī lūūlū ataalī ūsola banhū būbi, nani ūyo adūgije kūgūhangīja ūyo agūhelile?”

²⁰Yaya ītūjaga gīko! Ū bebe ūlī munhū dūhū; ī gīsī ū bebe ūlī nani nose wandye kwishokeja na Mulungu? Ī shibūmva shishikile kūng'wīla ū mūmbi washo gīkī, “Nibūlī ūlīnibeeja gīko?”

²¹Angū, ū mūmbi atī na būdūla bo kūbūmba shiseme sh'ikūjo nūūlū sha gīko gīko dūhū, ū kwīngīīla ū ng'wibūmba ī līmò lyenīlo dūhū?

²²Nūūlū gūlīho mhayo kī ho, ūlū gīkī ū Mulungu walī atogilwe koolecha būpelanu bokwe, nī gīkī adūgije kūbiza na wiyūmīlīja būtaale ū kū shiseme sh'ipelanya, īsho ashibeegije kūlwa kūkenaagūlwa?

²³Nūūlū hangī gūlīho mhayo kī ūlū ūbiza walī atogilwe koolecha būsabi w'ikūjo lyakwe, ū kū shiseme sha kūchīlwa shigongo īsho shibeejiwe kūfuma kale na kale kūlwa nguno y'ikūjo lyakwe?

²⁴Ī shiseme shenīsho tūlī bise benekīlī, abo wamala kūtwitana; ītī ba kūfuma mu Bayudaya dūhū, alīyo na a ba kūfuma mu mahanga gangī.

²⁵Gīt'ūmo alīhayīla mulī Hosea gīkī, “Nakūbitana banhū bane abo batī banhū bane, nū yūyo walī atī na wa kūntogwa nakūng'witana nganja.

²⁶Nū kūko bawīlagwa gīkī, ‘A bing'we mutī banhū bane,’ bakwitanwa balī baana ba ng'wa Mulungu mpanga.”

²⁷Ū Isaya nang'hwe alīlīla akūbahayaga a Baisilaeli gīkī, “Ū wingī wa Baisilaeli nūūlū būkabiza būlī gītī maseni ga ha nyanza, nahene būkūpīla būshiigo wabo dūhū!

²⁸Nguno ū Seeba alībeeja mhayo ūyo akūgūshikīlīja wangū ū mu sī.”

²⁹Hama na hangī gīt'ūmo ū Isaya ng'wenūyo walī wahaya a ha wandījo gīkī, “Ūlū ni atatūlekelile būshiigo ū Seeba wa mabita, ni twabiza gītī Sodoma, ni tūlī bakūgelanījiwa na Gomola!”

³⁰Ī gīsī lūūlū tūhaye ginehe? Gūlī gīkī, a banhū ba mahanga abo baalī batabūkoobaga ū būtūngīlīja, ū būtūngīlīja baabūpandīkile; kwike būtūngīlīja bo kūfuma mu kūzunya.

³¹Lelo a Baisilaeli abo bakūgemaga kūkooba būtūngīlīja bo kūfuma mu shilagīlo, a bene baduumile ū kūshishikīlīja ī shilagīlo.

³²Nibūlī? Īlī kūlwa nguno batūtūmamīlaga kūzunya, alīyo bakūgaganījaga kūkooba mu nzīla ya shītwa; hūna lūūlū bipamile a h'iwe lya kwipamya.

³³Īlī gīt'ūmo gwandīkilwe, “Managa gīkī, nalītūūla mu Sayuni iwe lya kwipamya; shiganga sha kūgwisha, ūyo ūlīsanya atūding'wa minala.”