Read Sukuma Bible 2015 – Bibilia Ilagano Lya Kale 2015 1 Bakolinto 1 Bible Online

1 Bakolinto 1 - Sukuma Bible 2015 – Bibilia Ilagano Lya Kale 2015 bible

1 Bakolinto 1

¹Nene Paulo, ūyo nakitanwa kūbiza ntūng'wa wa ng'wa Kilisito Yesu, kūlwa būtogwa bo ng'wa Mulungu; na ndūgū wise Sostene.

²Kū kanisa ya ng'wa Mulungu īyo īlī Kolinto, banhū abo beejiwa mulī Kilisito Yesu, bitanwa kūbiza beela; na a bose abo bakūlitanaga lina lya ng'wa Seeba wise Yesu Kilisito, ūyo alī Seeba wabo na wise.

³Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisito.

⁴Nakūnūmbaga ū Mulungu wane gwa gwa gwa kūlwa nguno ying'we, kūlwa shigongo īsho wang'winha mulī Kilisito Yesu.

⁵Nguno ū mulī we mulī na būsabi būtaale, ū mu kalūngalūngīle nū mu witegeleja bose,

⁶gīt'ūmo būkaanīji bo ng'wa Kilisito bomalile koolechiwa mu bing'we.

⁷Nguno mutī na būgehelwa mu shakwinhwa shose shose aho mutaalī mulīlindīīlile ī likanza lya koolechiwa kwa ng'wa Seeba wise Yesu Kilisito.

⁸Nīyo h'ūyo akūmuhandatīja kūshisha kū būkalīkījo, mubize mutī na shilingo ū mu lūshikū lo ng'wa Seeba wise Yesu Kilisito.

⁹Ū Mulungu ng'wene nsanyiwa, ūyo wang'witana a bing'we kwingīla mu būsangī wa Ng'wana wakwe Yesu Kilisito Seeba wise.

¹⁰Bing'we badūgū bane, nalīng'wikūmbīlīja mu lina lya ng'wa Seeba wise Yesu Kilisito, gīkī mubize na widomanīja ū mu kalūngalūngīle. Yaya ū kūbiza na būgabanīki ū mu bing'we! Ni ībizage ho gwīnda ū mu maganiko ging'we nū mu kalomanīle king'we.

¹¹Nguno badūgū bane, ū nene naamanyiwe na banhū ba ha ng'wa Kuloe gīkī, būlīho wilemeelwa ū mu bing'we.

¹²Ūyo nalīgūhaya gūlī gīkī, būlī ng'wene ū mu bing'we akūhayaga, ūyū gīkī, “Ū nene nalī o ng'wa Paulo,” na ūngī, “Ū nene nalī o ng'wa Apolo,” na ūngī hangī, “Nalī o ng'wa Kefa,” hama na ūngī hangī gīkī, “Ū nene nalī o ng'wa Kilisito!”

¹³Bing'we, ū Kilisito wagabanīkile? Ū Paulo akakong'wa ha nsalaba kūlwa nguno ying'we? Nūūlū mukabatīījiwa mu lina lya ng'wa Paulo?

¹⁴Nalī na būyegi nguno natamatīīgije nūūlū ūmò wing'we, ūlū atī Kilisipo na Gayo dūhū.

¹⁵Hūna lūūlū munhū ose ose atīko kūhaya gīkī mukabatīījiwa mu lina lyane.

¹⁶Na bangī abo nakababatīīja baalī ba mu kaya ya ng'wa Stefana; natamanile ūlū balīho na bangī ba kūkīla a ha benabo abo nababatīīja.

¹⁷Nguno ū Kilisito atanitūmile ū nene kūja nūbatīīja, alīyo kūja nūlomeela Ng'hūlū Jawiza; nīyo hangī ītī mu mihayo ya masala sala, gūtizūsūūkīlījiwa ū nsalaba go ng'wa Kilisito.

¹⁸Īkī ū mhayo gwa nsalaba gūlī gwa būchilū chilū ū kū banhū abo bajile mu kūyagala, alīyo ū kū bise abo tūlī bapījiwa, būlī būdūla bo ng'wa Mulungu.

¹⁹Nguno yandīkilwe gīkī, “Nakūgakenaagūla a masala ga ba masala, nū witegeleja wa bitegeleja.”

²⁰Ali lūūlū, alī halī ū wa masala? Alī halī ū nangi? Alī halī ū ng'halalī ū mu shikū īji? Angū, ū Mulungu atagagalūkije a masala ga mu sī kūbiza būchilū chilū?

²¹Nguno a ba mu sī balemeelilwe ū kūng'witegeleja na masala gabo ū Mulungu ū mu masala gakwe, īkī ū wei ū Mulungu gūkanyeja gwa kūbūtūmamīla ū būchilū chilū ūbo būkūlomeelagwa kūbapīja abo bakūzunyaga.

²²Alīyo a Bayudaya bagongile shimanīkījo, a Bayunani bachooji ba masala.

²³Kwike a bise tūkūnomeelaga Kilisito ūyo akakong'wa ha nsalaba, mhayo ūyo gūkūbipamyaga a Bayudaya, hama ū kū banhū ba mahanga gūlī gwa būchilū chilū.

²⁴Alīyo ū kū basolwa, ni babizage Bayudaya nūūlū Bayunani, ū Kilisito alī būdūla bo ng'wa Mulungu na masala ga ng'wa Mulungu.

²⁵Nguno ū būchilū chilū bo ng'wa Mulungu, būlī na masala kūtinda a masala ga banhū, nū būgokolo bo ng'wa Mulungu nabo būlī na nguzu kūtinda ī nguzu ja banhū.

²⁶A bing'we badūgū bane mumanile gīkī, aho mulitanwa baalī batī bingī ū mu bing'we a ba masala ga mu mīlī, na a ba būdūla baalī batī bingī, pye na a babo bigelile kūkūjiwa nabo baalī batī bingī.

²⁷Alīyo ū Mulungu abasolile a bachilū chilū ba mu sī, gīkī abadimye minala a ba masala, nī shikolo ī shigokolo ū mu sī nasho shilī shisolwa shakwe, gīkī ashidimye minala ī sha nguzu.

²⁸Na hangī ū Mulungu ashisolile ī shikolo sha mu sī ī shigokolo, nī shisho shidalahilwe, īsho shitīho; gīkī ashidimye minala īsho shilīho.

²⁹Ū mu gīko atūdūla kwilonga ose ose wa kwikumīlīja a ū kūlī Mulungu.

³⁰Hūna lūūlū a bing'we mulī bakwe ū mulī Kilisito Yesu, ūyo kūlwa nguno yise wītwa kūbiza masala ga kūfuma kūlī Mulungu, hamò na būtūngīlīja na wela na būkomooji;

³¹Ībize gīt'ūmo gwandīkilwe gīkī, “Ū ng'wikumīlīja, ni ikumīlījage mulī Seeba.”