Read Sukuma Bible 2015 – Bibilia Ilagano Lya Kale 2015 1 Bakolinto 10 Bible Online

1 Bakolinto 10 - Sukuma Bible 2015 – Bibilia Ilagano Lya Kale 2015 bible

1 Bakolinto 10

¹Bing'we bang'wise, natatogilwe ng'wikale mutamanile gīkī, a bakūlūgenji bise baalī ha sīlīlī y'ilunde pye a bose, nū mu nyanza bakabīta pye a bose;

²pye būbatīījiwa mulī Musa, ng'wilunde na mu nyanza.

³Hama pye balyaga shilīwa sha mbika īmò, sha kūfuma ū kūlī Moyo.

⁴Na hangī pye bang'waga shakūng'wa sha Kiimoyo, nguno bang'waga kūfuma mu shiganga sha Kiimoyo īsho shalī hamò nabo;[3] ī shiganga shene shalī h'ū Kilisito ng'wenekīlī.

⁵Alīyo a bingī babo batanyegije ū Mulungu, būshilīla kū matogolo.

⁶Hūna lūūlū ī yenīyī īkaja gīko, būbize ho būlolelo kūlwa nguno yise, tūtizūbiza ba kwikūmva yabūbi gīt'ūmo bīītīlaga a boi.

⁷Na hangī yaya ū kūbiza balamya ba mashiikolile gīt'ūmo bīītīlaga bamò babo, ūmo gwandīkilwe gīkī, “A banhū bakigasha kūlya na kūng'wa, hūna būbūūka kūbina!”

⁸Hama dūtizīīta būjingi gīt'ūmo bamò babo bakīītīla, kūshisha lūshikū lūmò būhūlūlūka banhū shihūmbī makūmi abīlī na shidatū!

⁹Nūūlū hangī tūtizūbiza ba kūngema ū Seeba gīt'ūmo bamò babo bakangema; būyūbūlagwa na mayoka!

¹⁰Hama yaya nū kūduguma, gīt'ūmo bamò babo bakadugumīla, būyagajiwa na nyagaja!

¹¹Ali lūūlū, ī mihayo yenīyo īkabilongela a benabo, yūbiza būlolelo; hama yandīkwa kūlwa kūtūhūgūla a bise abo jatūpandīkile ī shikū ja kū būkalīkījo.

¹²Nose ūyo īmīīlile ni ilang'hanage atizūgwa.

¹³Kūtaalī kūng'wizīīla kūgeng'wa, ūlū ītī gīt'ūmo kūkabizīīlaga banhū na kale. Kwike ū Mulungu alī ng'wishigwa no, atīko ū kūmulekanīja mugeng'we kūtinda ūmo būlī ū būdūla wing'we; alīyo ū mu kūgeng'wa kwenūko, akūbeeja nī nzīla ya kūpīlīla, mudūle ū kwiyūmīlīja.

¹⁴Hūna lūūlū badūgū bane, lekanagi nayo ī mihayo ya witongeleja.

¹⁵Nalīwīla banhū bitegeleja, īlolagi chiza īyo nalīyīhaya yenīyī.

¹⁶Ī shikombe sha sangīla īsho tūkanūmbaga Mulungu kūlwasho, angū shitī sha būsangī mu mininga ga ng'wa Kilisito? Nū ngatī ūyo tūkagūmegaga, nago gūtī gwa būsangī mu mīlī go ng'wa Kilisito?

¹⁷Nose lūūlū īkī ū ngatī gūlī gūmò, hū kūhaya na a bise abo tūlī bingī tūlī mīlī gūmò, nguno pyī tūkasangīlaga ngatī gūmò.

¹⁸Biganikīlagi dūhū nūūlū a Baisilaeli ba mu mīlī, angū abo bakashilyaga ī shitambo, batī basangīji ba ha ng'walīlo?

¹⁹Ī gīsī ū mhayo ūyo nalīgūhaya ni gūlī ginehe? Hamo gīkī ī shitambo sha ha witongeleja shikagunanhaga? Nūūlū gīkī ī shikolo īsho shikalamiagwa shilī na būdūla bo kwīta mhayo gose gose?

²⁰Ū mhayo ūyo nalīgūhaya gūlī gīkī, ī shitambo īsho shikafunyiagwa gakafunījiagwa masamva, atafunījiagwa Mulungu; na lūūlū ū nene natatogilwe a bing'we mubize na būsangī na masamva.

²¹Mutūdūla kūng'wa shikombe sha ng'wa Seeba na shikombe sha masamva; mutūdūla kūsangīla ha meza ya ng'wa Seeba na ha meza ya masamva!

²²Nūūlū hamo tūtogilwe kūnsaayīcha ū Seeba! A bise tūlī na nguzu ja kūntinda ū wei?

²³“Pyī ī shikolo shizunīlīgije, alīyo h'ītī gīkī ī shose shilī na solobo; na ng'hana pyī ī shikolo shizunīlīgije, alīyo nahene ī shose shitazengaga.”

²⁴Atizūbiza ho munhū wa kwikala akūkoobaga shakwe we ng'wenekīlī dūhū; alīyo ng'ūbakoobela nī sha biching'wi.

²⁵Lyagi būlī nyama ījo jikajinjiagwa mu sokoni, yaya ū kwikala ng'ūbūja būja nose kwingīja makoye mu moyo.

²⁶Nguno ī sī īlī ya ng'wa Seeba, nī shisho shokalile mo.

²⁷Hūna lūūlū, a banhū abo batī bazunya ūlū būng'wegeleja ha shilīwa, ning'we ng'ūbiza mutogilwe ū kūja, lyagi būlī shikolo īsho mulatengelwe; yaya ū kūbūgīlīja būgīlīja mutiziyenhela makoye mu moyo.

²⁸Kwike ūlū wigela munhū ose ose wa kūmuwīla gīkī, “Ī shenīshi shalī shafunyiagwa kūbiza shitambo,” lekagi ū kūlya kūlwa nguno yakwe ū ng'hayi ng'wenūyo, na kūlwa nguno ya wiyangūji wa mu moyo.

²⁹Nalīhaya wiyangūji wa mu moyo gwakwe ūyo; būtī wako ū bebe, nguno nibūlī ū wiyabī bone būlamulwe kūlwa makoye ga mu moyo go ng'wa munhū ūngī?

³⁰Ī gīsī, ū nene ūlū nalīsangīla kūlya shilīwa mu kūlūmba, nibūlī niyenheleje kūsondagūlwa kūlwa nguno ya shilīwa īsho nalīlūmba kūlwasho?

³¹Hūna lūūlū, ūlū mulīlya nūūlū mulīng'wa, nūūlū mulībeeja mhayo gose gose; beejagi pyī ī yose kūlw'ikūjo lya ng'wa Mulungu.

³²Yaya ū kūbipamya a banhū; ni babizage Bayudaya nūūlū ba mahanga gangī, pyī nūūlū ī kanisa ya ng'wa Mulungu.

³³Ītagi gīt'ūmo nakwītīlaga nene mu mihayo yose. Nakwītaga pyī ī yose ītī kūlwa kūkooba solobo yane nene ng'wenekīlī, alīyo kūlwa banhū bingī, gīkī bapījiwe.