Read Sukuma Bible 2015 – Bibilia Ilagano Lya Kale 2015 1 Bakolinto 2 Bible Online

1 Bakolinto 2 - Sukuma Bible 2015 – Bibilia Ilagano Lya Kale 2015 bible

1 Bakolinto 2

¹Hūna lūūlū badūgū bane, ū nene aho nakiza ū kū bing'we gīkī namulomeele ī mbisīla ya mhayo go ng'wa Mulungu, natizile kūyomba ning'we mu kalūngalūngīle ka kūgaliila galiila, mu nyasala sala.

²Nguno naalī namala kwizunīlīja nūgūsha, gīkī natizūmana mhayo nūūlū gūmò ū mu bing'we ūlū atī Yesu Kilisito kwike, nīyo mu kūkong'wa kwakwe ha nsalaba.

³Aho naalī hamò ning'we, naalī mu būgokolo na booba, na kūdetema kūtaale.

⁴Hama pyī ū būsombooji nū būlomeeji wane, walī būtī mu mihayo ya masala ga kūduta banhū; alīyo mu koolecha katūmamīle ka ng'wa Moyo, na mu būdūla.

⁵Nguno naalī natogilwe ū kūzunya kwing'we kūsendamīle būdūla bo ng'wa Mulungu, ītī masala ga banhū.

⁶Na ng'hana ī chene ū kū banhū abo bakomeelile, tūkūlūngalūngaga ya masala; kwike gatī masala ga ng'wikanza īlī, nūūlū gatī ga basugi ba ng'wikanza īlī, abo balījīlīīla mu kūshila.

⁷Alīyo tūkūlūngalūngaga mu masala ga ng'wa Mulungu mbisīla īyo ībisilwe; īyo kūfuma kale kūko ikanza lītaalī kūshika, ū Mulungu walī ayītūūlile ho kūlwa nguno y'ikūjo lise.

⁸Ī mbisīla yenīyo, atīho nūūlū ūmò ū mu basugi ba ng'wikanza īlī ūyo ayīmanile, nguno ūlū ni bīmanile ni batankomile ha nsalaba ū Seeba w'ikūjo.

⁹Alīyo īlī gīt'ūmo gwandīkilwe; gīkī, “Mihayo īyo liso lītaalī kwībona, nūūlū gūtū gūtaalī kwīyigwa; na ītaalī nūūlū kwingīla mu moyo go ng'wa munhū; mihayo īyo Mulungu abalonja longegije abo bantogilwe we.”

¹⁰Kwike ū Mulungu watūkundūlīlile a bise mu nzīla ya ng'wa Moyo wakwe; īkī ū Moyo akagīsīlījaga pyī ī yose ūmo īgelelile, pyī nī mihayo ya ng'wa Mulungu īyo yibisile.

¹¹Angū, alīho nani ū mu banhū ūyo ashikile kūmana mihayo ya ng'wa munhū ūlū ītī moyo gokwe dūhū ū munhū ng'wenūyo? H'ūmo īlī nū mu mihayo ya ng'wa Mulungu, atīho ūyo ayīmanile ūlū atī Moyo wa ng'wa Mulungu gwike.

¹²Alīyo a bise tūtanukūlile moyo gwa mu sī, twang'wanukūla Moyo wa kūfuma kūlī Mulungu; tūbize na būdūla bo kūshiitegeleja ī shakwinha īsho Mulungu akūtwinhaga.

¹³Ūyo tūkwīsomboolaga ītī mu mihayo ya kūlangwa mu masala ga banhū, alīyo ya kūlangwa na Moyo; ī yoi īlī ya Kiimoyo, na tūkūyideedeng'hanyaga mu Kiimoyo.

¹⁴Kwike ū munhū wa nhūngwa ja mu sī, atīko ū kwīyanukūla ī mihayo ya ng'wa Moyo wa ng'wa Mulungu. Nguno ū kūlī wei īlī ya būchilū chilū dūhū, na hangī atīko ū kwīmana; nguno ī yoi īkitegelejiagwa mu Kiimoyo dūhū.

¹⁵Nīyo ū munhū ūyo akatongeelagwa na Moyo, adūgije kwīyitegeleja pyī ī mihayo, alīyo ū wei atīko kwitegelejiwa na ose ose.

¹⁶Nguno nani ūyo alīmanile ī liganiko lya ng'wa Seeba, gīkī adūle kūnanga? Alīyo a bise tūlī nalyo ī liganiko lya ng'wa Kilisito.