Read Sukuma Bible 2015 – Bibilia Ilagano Lya Kale 2015 2 Bakolinto 9 Bible Online

2 Bakolinto 9 - Sukuma Bible 2015 – Bibilia Ilagano Lya Kale 2015 bible

2 Bakolinto 9

¹Kwike ahene natī na nguno ya kwikala nūng'wandīkīla ī mihayo ya kūbagunanha beela yenīyī.

²Nguno nabūmanile ū būgaagaanu wing'we, ūbo nose būkūnenhelejaga kwikumīlīja kū bana Makedonia kūlwa nguno ying'we. Nakūbawīlaga gīkī, ī Akaya ī yene īmalīīlile kwīngīīla ng'wakīzo; nose ū būkalalwa wing'we wabamishije bingī.

³Hūna lūūlū nalībatūma a badūgū benaba gīkī ū wikumīlīja wise kūlwa nguno ying'we būtizūbiza bo dalali ū mu mhayo gwenūyū, musangwe muligolanya gīt'ūmo namalaga kūhaya gīkī, musangwe mumalīīlile.

⁴A bana Makedonia batiziza hamò nane bamusange mutaalī ū kūmalīja ī milonjo tūkagooka; natūhayaga mukūgooka bing'we, nguno tūmusanije no.

⁵H'ī nguno yene naabonile īlī yawiza kūbalomba a badūgū batonge ko, bize balonje lonje ī mihayo ya winhi wenūbū, ūbo ng'wamala kwisagīja kūfuma kale; gīkī būbize winhi ng'hana, gūtī mhayo gwa kūhadīkījiwa.

⁶Ī yoi ījile gīkī, ūyo ūbība mu nyagugīji akūgesa sha nyagugīji, nū yūyo ūbība mu wiza ng'holò akūgesa īsho shiigeleelilwe wiza ng'holò.

⁷Būlī ng'wene ni afunyage gīt'ūmo alībonela mung'holò yakwe; ītī mu būzongu zongu nūūlū kwibona gītī alīhadīkījiwa. Nguno ū Mulungu akayejiagwa na būlī ng'wene ūyo akafunyaga mu būyegi.

⁸Ū Mulungu adūgije kūjīīta pyī ī lubango jimukwīlīle, mubize na shikolo sha būlī mbika sha kūng'wigela mu yose būlī lūshikū, shimukwīlīle no no no kūlwa būlī nīmo gwawiza.

⁹Gīt'ūmo gwandīkilwe gīkī, “Asambagije shakwinha hose pye; hū ng'wene akabanong'haga a bahabī, ū būtūngīlīja bokwe būlī wa būja na būja.”

¹⁰Hūna lūūlū ūyo akang'winhaga mībi mbīyū na shilīwa sha kūlya, na a bing'we akūng'winha ī mbīyū. Hama a matwajo ging'we ga būtūngīlīja akūgakwīja gabize mingī;

¹¹mubize basabi mu yose, na biza ng'holò mu būlī shikolo; mhayo ūyo gūkwenheleja alūmve Mulungu kūlwa nguno yise.

¹²Īkī ū nīmo ūyo mulīgwīta gwenūyū gūtagelelile ha kūgunanha beela dūhū, alīyo gūlongeja kūbeela no kūlwa būlūmbi ūbo akūfunījiagwa Mulungu.

¹³Banhū bakūnkumīlīja Mulungu kūlwa nguno ya kūgūbona ū nīmo gwenūyū, nū widohya wing'we ū mu kūjikaanīla ī Ng'hūlū Jawiza ja ng'wa Kilisito, nū wiza ng'holò wing'we ū mu kūsangīla nabo, hamò na a banhū a bangī.

¹⁴Nīyo bakūbiza balombeji bing'we; hama bakūbiza na ng'hūmbū ja kūmubona kūlwa nguno ya wingī bo shigongo sha ng'wa Mulungu īsho shilī hamò ning'we.

¹⁵Mulungu alūmve kūlw'inong'ho lyakwe īlo līlī lyawiza kūkīla kasomboolele.