Read Sukuma Bible 2015 – Bibilia Ilagano Lya Kale 2015 Bagalatia 4 Bible Online

Bagalatia 4 - Sukuma Bible 2015 – Bibilia Ilagano Lya Kale 2015 bible

Bagalatia 4

¹Ūyo nalīgūhaya gūlī gīkī, ū ng'wingīji aho ataalī nīgīnī, atikīlile na nsese nūūlū īkī pyī ī shikolo shilī shakwe.

²Alī ha sīlīlī ya baleji na balang'hani basho ī shikolo, kūshisha līshike ī likanza īlo lītūūlilwe nū ise.

³H'ūmo gūlī nū kū bise, aho twalī tūtaalī banīgīnī twalī mu būsese, ha sīlīlī ya būsugi bo mu sī.

⁴Alīyo aho lyang'wa ī likanza, ū Mulungu akantūma ū Ng'wana wakwe, ūbyalwa na nkīma, ūbyalwa ha sīlīlī ya shilagīlo,

⁵abakomoole abo balī ha sīlīlī ya būsugi bo shilagīlo, twītwe kūbiza baana.

⁶Nose lūūlū īkī mulī baana, ū Mulungu wantūmile Moyo wa Ng'wana wakwe ū mung'holò jise; ū Moyo ng'wenūyo akwitananaga “Aba,” makūlū gaho “Baba.”

⁷Ali lūūlū, ū bebe ūtī nsese, ūlī ng'wana gete. Hūna lūūlū īkī ūlī ng'wana, ūlī na wingīji ū kūlī Mulungu.

⁸Kwike ī kale aho ng'walī mutaalī kūmana ū Mulungu, ng'walī balamya ba mashiikolile ayo gatī mamulungu!

⁹Alīyo ī haha īkī muumanile ū Mulungu; ī gete tūhaye gīkī ū Mulungu amumanile a bing'we, nibūlī mulīshoka kū numa hangī kū mihayo migokolo ya kū būnīgīnī, īyo ītī na gwa kūpya gwa kūdūla kūmuzenga? Mutogilwe kūbiza basese bayo hangī?

¹⁰Ūkī ng'wandije na kūyūdīlīla mihayo ya kūkūja shikū ndebe na myeji na myaka, na makanza gangī na gangī!

¹¹Ūlū nang'wiganika nalogoha, natizūbiza hamo nanogelaga dalali dūhū, ū mu būtūmami bone ū kū bing'we!

¹²Badūgū bane, nalīng'wikūmbīlīja mubize gīt'ūmo nalī ū nene, nguno ū nene nalī gīt'ūmo mulī a bing'we, mutaalī kūnikenya mhayo gose gose.

¹³Mumanile gīkī ī kwandya nakamulomeela ī Ng'hūlū Jawiza kūlwa nguno naalī na makoye ū mu mīlī gone.

¹⁴Alīyo nūūlū īkī ng'walī mu būgeng'wa būtaale kūlwa nguno ya makoye ga mīlī gone, nahene mutanidalahile, nūūlū mutaniswile mate na kūnilekanīja! Mukananukūla gītī mulīng'wanukūla malaika wa ng'wa Mulungu, nūūlū gītī nalī Kilisito Yesu!

¹⁵Ū būfula wing'we wenūbo, bojile halī? Nguno nalīmukaanīla gīkī ūlū ni yalī īdūlīkanile nūūlū kūkobola miso ging'we, ni ng'wagakobola ng'ūninha nene!

¹⁶Hamo nabizile ng'wanishi wing'we īkī nakūmuwīlaga ī ya ng'hana?

¹⁷A benabo ī chene bamukalalilwe ng'hana; alīyo ītī mu būtūngīlīja, batogilwe kūmulekanya na a bise.

¹⁸Ū mhayo gwa būnwani ū gwene gwawiza ūlū gūlī mu būtūngīlīja, nīyo īlī chiza ū kwīta gīko gwa gwa gwa; ītī kūgonga ūlū nalīho hamò ning'we dūhū.

¹⁹Bing'we baana bane, mulīnilumya būsūngū kūshisha ilonge hangī ū Kilisito ū mu bing'we!

²⁰Ū haha nalikūmva na kūgalūcha ī lilaka ūlū ni nalī hamò ning'we; nguno nalīlemeelwa ūmo nang'wītīle!

²¹Aliniwīlagi a bing'we abo mutogilwe kūbiza ha sīlīlī ya shilagīlo; angū, mutashiigwaga ūmo shihayīlile ī shilagīlo?

²²Nguno gwandīkilwe gīkī ū Abulahamu walī na bitūnja babīlī, ūmò walī wa nkīma nsese, ūngī wa ng'wanisaale.

²³Ū wa nkīma ū nsese akabyalwa gīt'ūmo kalī kajīle ka mīlī, alīyo ū wa ng'wanisaale akabyalwa mu kwisagījiwa.

²⁴Ī mihayo yenīyī īlī shigemeng'hejo sha kūtoolekeja malagane abīlī, līmò lya kūfuma kū lūgūlū lo Sinai, īlo līkabyalaga baana ba mu būsese; hū nkīma ū Hagali.

²⁵Nguno ū Hagali alī gītī lūgūlū lo Sinai ūlo lūlī mu sī ya Balabu; akūlenganījiwa na Yelusalemu ya haha, nguno īlī mu būsese hamò na a baana bayo.

²⁶Lelo ī Yelusalemu ya kwigūlya, ī yene īlī mu wiyabī; hū ng'wene ū niniswe a bise.

²⁷Nguno gwandīkilwe gīkī, “Yegaga ū bebe ūyo ūlī ngūmba, ūyo ūtabyalaga. Bebe ūyo ūtaalī kūlung'wa būsūngū, hamukaga no no no, ūtūle na lūpūndū. Nguno a baana bakwe ūyo atatoolilwe balī bingī, kūtinda a bakwe ūyo atoolilwe.”

²⁸Nose a bing'we badūgū, mulī baana ba kwisagījiwa gīt'ūmo walī Isaka.

²⁹Hūna lūūlū, ūmo ng'wana wa kūbyalwa mu nhūngwa ja mīlī wanuhījaga ū ng'wana wa kūbyalwa mu nguzu ja ng'wa Moyo, h'ūmo īkūjīlaga nī haha.

³⁰Alīyo ī shandīkwa shihayile ginehe? “Mpeejage ū nkīma ū nsese nū ng'witūnja wakwe, nguno ū ng'witūnja wa nsese atīko kūbiza na wingīji hamò nū ng'witūnja wa ng'wanisaale!”

³¹Hūna lūūlū bang'wise, a bise tūtī baana bakwe ū nkīma ū nsese, tūlī ba ng'wanisaale.