Read Sukuma Bible 2015 – Bibilia Ilagano Lya Kale 2015 Bagalatia 6 Bible Online

Bagalatia 6 - Sukuma Bible 2015 – Bibilia Ilagano Lya Kale 2015 bible

Bagalatia 6

¹Badūgū, ūlū munhū ose ose ūgwa mu būhūbi būlebe, a bing'we abo mulī ba nhūngwa ja kūtongeelwa na Moyo, ngalūchagi mung'wīnje mo. Kwike ng'wīte mu moyo gwa widohya, kūnū na a bing'we mulilang'hana mutizingīla mu kūgeng'wa.

²Ng'wibūūkīja miligo bing'we benekīlī na benekīlī, mushishikīlīje ī shilagīlo sha ng'wa Kilisito.

³Nguno ūlū munhū akwiyiganikīlaga wei ng'wenekīlī gīkī alī shikolo sha solobo alīyo gashi atī chene, ū ng'wenūyo akwilembaga wei ng'wenekīlī.

⁴Būlī munhū ni ilolage kūfuma mu milīmo yakwe wei ng'wenekīlī, hūna ikumīlīje mu nzīla ya milīmo yakwe wei dūhū; yaya ū kwikumīlīja kūlwa milīmo ya bangī.

⁵Nguno būlī ng'wene akwibūūkīja ifulushi lyakwe wei ng'wenekīlī!

⁶Ū nangwa ūyo akūlangagwa mhayo, ni asangīlage nū nangi wakwe pyī ī shikolo ī shawiza.

⁷Bing'we, mutilembage; ū Mulungu atī wa kūgīmva nyachilū, nguno būlī munhū akūgesa gīt'ūmo akūbībīlaga.

⁸Ūyo akūbībaga sha kūyeja mīlī gokwe, akūgesa būkenaagūku ū mu mīlī gokwe gwenūyo. Ūyo akūbībaga mu kūtongeelwa na Moyo, akūgesa būpanga butashilaga kūfuma kūlī Moyo.

⁹Yaya ū kwinogolelwa ū kwīta ī yawiza, nguno ūlū tūtagwile ng'holò, tūkūgesa ng'wikanza lyayo.

¹⁰Hūna lūūlū tūbīītīla yawiza pye a banhū ūlū tūlī nago ū ng'wanya, ī no no no a bazunya bichiswi.

¹¹Natogilwe mubone ūmo nang'wandīkīla nene ng'wenekīlī na nuguta nhaale nhaale.

¹²Pye abo batogilwe kūbonekana mu mihayo ya mīlī h'abo bakūmuhadīkījaga kūsaalwa, nguno batatogilwe ū kūluhiwa kūlwa nsalaba go ng'wa Kilisito.

¹³Alīyo nahene, nūūlū abo basaalilwe batashidimile ī shilagīlo; kwike batogilwe musaalwe a bing'we, gīkī babonele ho mhayo gwa kwikumīlīgīja ū mu mīlī gwing'we.

¹⁴Alīyo ū nene natī na sha kwikumīlīgīja, ūlū ītī nsalaba go ng'wa Seeba wise Yesu Kilisito; nguno ū kūlī nene ī mihayo ya mu sī īchile kūlwa nsalaba. Nū nene ū kū ya mu sī nachile kūlwa nsalaba gwenūyo.

¹⁵Nguno ū mhayo gwa kūsaalwa nūūlū kūleka kūsaalwa gūtī na solobo yose yose, ū mhayo ū ntaale gūlī kūbiza shiseeng'wa shipya.

¹⁶Mhola na shigongo shibize hamò nabo a Baisilaeli ba ng'wa Mulungu, abo bakūtongeelagwa na mhayo gwenūyū ū mu kashimīzīle kabo.

¹⁷Nalīmalīja mu kūhaya gīkī, atizilonga munhū ūngī wa kūnikoya hangī, nguno ū mu mīlī gone ū nene, nalī na malanda kūlwa nguno ya ng'wa Yesu.

¹⁸Shigongo sha ng'wa Seeba wise Yesu Kilisito shibize hamò ning'we badūgū: Alichene.