Read Sukuma Bible 2015 – Bibilia Ilagano Lya Kale 2015 Baefeso 2 Bible Online

Baefeso 2 - Sukuma Bible 2015 – Bibilia Ilagano Lya Kale 2015 bible

Baefeso 2

¹Kwike a bing'we ng'walī muchile ī kwandya, kūlwa būkenaagūji na shibi shing'we;

²mihayo īyo ng'washimīzaga muyo a makanza gene, aho ng'walondeelaga nhūngwa ja mu sī, na ng'watongeelagwa nū nsugi wa mabūdūla ga myoyo misoso, ūyo alī Moyo nsoso ng'wenekīlī, na akūtūmamaga nī haha ū mu baana ba būshitiigwa!

³Pye na a bise ī kwandya twalī mu lūkwa lūmò nabo, twashimīzīlaga mu mihayo ya kwikūmva kwa mīlī gwise, na hangī īyo twabeejaga yalī ya kūyeja mīlī na maganiko gise dūhū; ū mu nhūngwa jise twalī baana b'ipelanya gīt'ūmo balī a bangī.

⁴Alīyo ū Mulungu īkī nsabi wa shigongo, hangī atūtogilwe na būtogwa būtaale,

⁵nūūlū aho twalī tūchile kūlwa būjimīīji wise, akatwīta kūbiza tūlī bapanga hamò na Kilisito, (mupījiwe kūlwa shigongo).

⁶Ūtūjūūcha hamò nang'hwe ū Kilisito Yesu, hūna ūtwigasha hamò nang'hwe mu mapandī ga ng'wigūlū,

⁷gīkī ū ng'wikanza īlo līliza atoolekeje ūmo būlī ū būsabi bo shigongo shakwe ūbo būtī na sha kūgelanījiwa, kūlwa wiza ūbo alī nabo kū bise ū mulī Kilisito Yesu.

⁸Nguno mupījiwe kūlwa shigongo, kūlwa kūzunya; ū mhayo gwenūyū gūtafumile mu bing'we benekīlī, līl'inong'ho lya ng'wa Mulungu.

⁹Hama nīyo gūtafunyiwe kūlwa nguno ya shītwa, nose atizilonga nūūlū ūmò wa kwikumīlīja.

¹⁰Nguno tūlī shiseeng'wa sha ng'wa Mulungu, tūbeejiwe mulī Kilisito Yesu kūlwa shītwa shawiza, īsho ashilonja longije kūfuma kale gīkī tūshimīzīle musho.

¹¹Hūna lūūlū, a bing'we banhū ba mahanga ū mu shibyalīlwe, abo mukahayiagwa gīkī mutasaalilwe, na a babo basaalilwe būsaalwa bo mu mīlī, bo kwītwa na makono;

¹²izūkagwi gīkī ī kwandya ng'walī mutī na Kilisito, ng'walī babisa ū kwihanga lya Baisilaeli, hangī ng'walī mutamanīkile ū mu malagane ga wisagījiwa, ng'walī mutī na sha kwisagīlwa, hama ng'walī mutī na Mulungu ū mu sī!

¹³Alīyo ī haha ū mulī Kilisito Yesu, a bing'we abo ng'walī kūle ī kwandya, ng'wegelejiwe kūlwa mininga ga ng'wa Kilisito.

¹⁴Nguno ū wei h'ūyo alī mhola yise, hū ng'wene ūyo wabīīta a babīlī kūbiza ūmò.[1] Ū lisenge lya wanishi īlo lyalī lītūlekanije ūlīkambagūla mu mīlī gwakwe.

¹⁵A malange ga mu shilagīlo ūgīnja, pyī nī mbika ja kahelele ījo jalī jitūūlilwe ho; ūbeeja munhū ūmò mpya mulī we ng'wenekīlī, a ha ng'wanya gwabo abo baalī batī na būsangī; ūbiza watūūla mhola.

¹⁶Ūbūbūlaga ū wanishi kūlwa kūtūsangīja kūlī Mulungu pye a bose mu mīlī gūmò, mu nzīla ya nsalaba!

¹⁷Wiza akūlomeelaga mhola ū kū bing'we abo ng'walī kūle, nū kūbo abo baalī hihī nū kwene mhola.

¹⁸Nguno ū mulī we, pye a bose tūdūgije kūshika ū kūlī Sīswe mu nzīla ya ng'wa Moyo ūmò.

¹⁹Ali lūūlū, mutī babisa na bashimīzi, alīyo mulī bazengi hamò nabo a beela. Mulī banhū ba mu kaya ya ng'wa Mulungu gete.

²⁰Muzengilwe ha nsingi gwa batūng'wa na bahangi, ū Kilisito Yesu ng'wenekīlī alī Iwe lya kwīgoloolela ī numba.

²¹Ū numba ī yose īkūbanījiwe chiza mulī wei; nīyo ū mulī wei īkongejaga kūkūla na kūbiza hekalu neela mulī Seeba.

²²Na a bing'we muzengilwe hamò ū mulī wei, mubize wikalo bo ng'wa Mulungu mu nzīla ya ng'wa Moyo wakwe.