Read Sukuma Bible 2015 – Bibilia Ilagano Lya Kale 2015 Baefeso 3 Bible Online

Baefeso 3 - Sukuma Bible 2015 – Bibilia Ilagano Lya Kale 2015 bible

Baefeso 3

¹Kūlwa nguno yenīyī, ū nene Paulo nalī ntungwa wa ng'wa Kilisito Yesu kūlwa nguno ying'we a bing'we banhū ba mahanga.

²Nalisagīlwa ng'wagwigwa ū nīmo ūyo ninhwa kūlwa nguno ying'we; ū gwa kūshoolecha ī shigongo sha ng'wa Mulungu.

³Nguno ū nene nakakundūlīlwa, noolekejiwa mihayo ya mbisīla, gīt'ūmo nang'wandīkīlile mu shiguhī.

⁴Ū mu kwīsoma ī yenīyī, mukūbūbona ū witegeleja bone ūmo nīmanīlile ī mbisīla ya ng'wa Kilisito.

⁵Ū yoi yalī ītamanīkile ū kū banhū ū mu shibyalīlwe ī sha kale, alīyo ī haha yafumbūlilwe ū kū batūng'wa na a bahangi bakwe beela, mu nzīla ya ng'wa Moyo.

⁶Ī mbisīla yene īlī gīkī, a banhū ba mahanga nabo balī na būsangī ū mu wingīji, nū mu mīlī; hama ū mulī Kilisito Yesu nabo banukūji ba wisagījiwa mu nzīla ya Ng'hūlū Jawiza.

⁷Ū nene hū nakīītwa kūbiza ntūmami wago ū nīmo gwenūyū, gīt'ūmo kalī kanong'hele ka shigongo sha ng'wa Mulungu, īsho nakīlūkīlwa kūlenganīla na katūmamīle ka būdūla bokwe.

⁸Na ng'hana ī chene ū nene nalī ndo wa bado ū mu beela pye a bose, alīyo nakinhwa ū nīmo gwenūyū kūlwa shigongo, gīkī nabalomeele a banhū ba mahanga ī mhola ja būsabi bo ng'wa Kilisito, ūbo būkīlile kamanīlwe.

⁹Na hangī nooleche ūmo īkūtūmamīlaga ī mbisīla yenīyo, īyo yalī ībisilwe kūfuma kale na kale mulī Mulungu, ūyo alī nseemi wa shose.

¹⁰Gūhelilwe gīko kūlwa gīkī, ū ng'wikanza lya haha, ū wingī bo masala ga ng'wa Mulungu būmanīke mu nzīla ya kanisa, ū kū basugi na a batongeeji ba mu mapandī ga ng'wigūlū.

¹¹H'ūmo kalī a kalongeje kakwe ka shiku jose, mhayo ūyo wagūshikīlīgije mulī Kilisito Yesu Seeba wise.

¹²Ū mulī we ū ng'wenūyo, tūlī na kwisandaala kūtaale, na tūdūgije kūshika ū kūlī Mulungu mu būshisha ng'holò kūlwa kūnzunya.

¹³Ali lūūlū, nalīmulomba mutizūgwang'holò īkī nakūluhiagwa kūlwa nguno ying'we. Ī yose yenīyo īlī kūlw'ikūjo ling'we.

¹⁴Nose lūūlū kūlwa nguno ya mhayo gwenūyū, nakūntugījaga mazwi ū Sīswe,

¹⁵ūyo shibyalīlwe shose shifumile kūlī we; ī shose īsho shilī ng'wigūlū nū mu sī.

¹⁶Nakūnombaga gīkī ūmo būsabi w'ikūjo lyakwe būlī, amuguzuhye na nguzu ja ng'wa Moyo wakwe ū mu būmunhū wing'we ū bo mu gatī.

¹⁷Ū Kilisito ikale ū mung'holò jing'we kūlwa kūzunya; nīyo nakūmulombelaga gīkī mukome miji, ng'wīmīīle ū muhandatīle mu būtogwa.

¹⁸Musangīle nabo pye a beela ū kūwitegeleja ū būtogwa bo ng'wa Kilisito; ūmo būlī ū būgalī galī wabo, nū būlīhu, nū būgūngūhu, nū būshimu wabo.

¹⁹Muwitegeleje ū būtogwa bo ng'wa Kilisito ūbo būliganije masala ga banhū; hama mushikanyiwe mu būshikanu bose bo ng'wa Mulungu.

²⁰Ali lūūlū, ū kūlī we ūyo adūgije kwīta būlī mhayo mu nzīla ya būdūla bo katūmamīle kakwe, kūkīla ūmo kalombele kise kalī, nūūlū ūmo tūkiganikīlaga;

²¹ū kūlī we ū ng'wenūyo lībize ho ikūjo ū mu kanisa nū mulī Kilisito Yesu, kūshisha shibyalīlwe shose sha shiku jose: Alichene.