Read Sukuma Bible 2015 – Bibilia Ilagano Lya Kale 2015 Bafilipi 1 Bible Online

Bafilipi 1 - Sukuma Bible 2015 – Bibilia Ilagano Lya Kale 2015 bible

Bafilipi 1

¹Nene Paulo na Timotheo, basese ba ng'wa Kilisito Yesu: Kū beela bose abo balī mulī Kilisito Yesu, abo bazengile Filipi; hamò na a baasikofu,[1] na a bagunanhi.

²Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisito.

³Nakūnūmbaga ū Mulungu wane būl'ikanza ūlū nang'wizūkwa a bing'we;

⁴nīyo būlī gwa ūlū nalīlomba nakūmulombelaga na būyegi,

⁵nguno ya būsangī wing'we, ū mu nīmo gwa kūjilomeela ī Ng'hūlū Jawiza, kūfuma ha wandījo kūshisha nī haha.

⁶Namanile hape gīkī ūyo wandya nīmo gwawiza ū mu bing'we akongeja kūgwīta kūshisha kū būkalīkījo, ū mu lūshikū lo ng'wa Kilisito Yesu.

⁷Ū nene īnigeleelilwe kūng'wiganikīla gīko pye a bing'we ū mu mhayo gwenūyū, nguno mulī ha moyo gwane gete; īkī pye a bose mukūsangīlaga hamò nane ū mu būtungwa bone nū mu kūjilwīlīla ī Ng'hūlū Jawiza, pyī nū mu kwīyoolecha ī ng'hana yajo.

⁸Nīyo ī haha naamukūmbūlile no kūlwa būtogwa bo ng'wa Kilisito Yesu; ū Mulungu nkaanīji wane ū mu mhayo gwenūyū.

⁹Hama nakūlombaga gīkī ū būtogwa wing'we bongeje no no no ū kūkwīla, mushike mu būshikanu wa būmani na witegeleja bose.

¹⁰Mubize na būdūla bo kwīkomanya ī mihayo, banhū batūngīlīja abo batīko kūdalahwa ū mu lūshikū lwa ng'wa Kilisito.

¹¹Nīyo ū mulī Kilisito mubize na matwajo mingī ga būtūngīlīja kūlw'ikūjo lya ng'wa Mulungu, na kūlwa kūkumīlījiwa kwakwe.

¹²Badūgū bane, natogilwe mumane gīkī ī mihayo īyo yanilongelile yenīyī, yabizile ya kūjitwala kū būtongi ī Ng'hūlū Jawiza.

¹³Nose ū būtungwa bone bomanīkile ū ng'wikūlū, pyī nū kū bangī, gīkī natungilwe kūlwa nguno ya ng'wa Kilisito.

¹⁴Nīyo ū būtungwa bone wenūbū boguzuhije banhū bingī ū mulī Seeba, na lūūlū bandije kūgūlomeela na būgimu ū mhayo.

¹⁵Ahene balīho bangī bakūnkumūchaga ū Kilisito kūlwa nguno ya wilu na wilwisha, alīyo bangī mu moyo gwape.

¹⁶A benaba bakūlomeelaga mu būtogwa, īkī bamanile gīkī natūūlilwe ho kūlwa nguno ya kūjilwīlīla ī Ng'hūlū Jawiza.

¹⁷Alīyo a bangī abo, a bene bakūnkumūchaga ū Kilisito kūlwa nguno ya wilwisha, ītī mu būtūngīlīja, balī na maganiko ga kūnongegeja makoye ū mu būtungwa bone.

¹⁸Kwike nahene gūlīho mhayo kī ho? Ūlū alīkumūchiwa Kilisito ū nene natūlonja, ni ībizage mu wibeeleja nūūlū mu ng'hana. Ū Kilisito ng'wene ni alomeelagwe dūhū; ū mu mhayo gwenūyū nalī na būyegi ū mu moyo gwane, hangī nakongeja no ū kūyega.

¹⁹Namanile hape gīkī ū mhayo gwenūyū gūkūgalūka gūbize gwa kūnipīja; ū Moyo wa ng'wa Yesu Kilisito akūnigunanha, nguno na a bing'we mukūnilombelaga.

²⁰Ū nene ī ng'hūmbū jane ī nhaale, nū kwisagīlwa kwane kūlī gīkī, shitizilonga shose shose sha kūnenheleja kūgwa mu magooke. Alīyo ū Kilisito akumīlījiwe ū mu mīlī gwane mu būshisha ng'holò bose, ībize mu būpanga, nūūlū mu kūcha.

²¹Nguno ū kūlī nene ū kūbiza mpanga ng'wene Kilisito, hama ū kūcha īlī solobo.

²²Hūna lūūlū ūlū gīkī ū kwikala mu mīlī gakwigela matwajo, numho natūgūmanaga ū gwa kūsola.

²³Ūlīnishiteleja būbīlī wayo, nguno nalī na ng'hūmbū ja kwīnga naje nakikale na Seeba, ū gwene gūlī gwawiza no kūtinda.

²⁴Alīyo hangī ū gwa kwikala ū mu mīlī, gūlī ntaale no kūlwa nguno ying'we.

²⁵Nose īkī nazunije gīkī h'ūmo īlī, nalīmana nakūbiza mpanga, nikale hamò ning'we pye a bose, gīkī ng'ongeje kūsunang'hīla kūja kū būtongi, mubize na būyegi ū mu kūzunya kwing'we.

²⁶Ū mu kūbiza hamò ning'we ū nene, mukūpandīka nguno ya kongeja kwikumīlīja ū mulī Kilisito Yesu.

²⁷Kwike dūhū shimīzagi gīt'ūmo jilangīlile Ng'hūlū Jawiza ja ng'wa Kilisito. Ūbize gīkī ūlū nūshika ko, namusange mukwītaga gīko. Nūūlū nūlemeelwa ū kūshika ko, nahene najiigwe ī mhola jing'we, gīkī ng'wīmīīlile na moyo gūmò; mukwigunanhaga nang'holò īmò ū mu wilwisha ūbo mulī nabo kūlwa kūjizunya ī Ng'hūlū Jawiza.

²⁸Nīyo mutī na shose shose sha kogoha kūfuma kū bilwisha bing'we. Ū gwenūyū gūlīboolekeja hape a bene gīkī balī mu kūyagala, alīyo a bing'we mulī mu būpīji, nīyo wa kūfuma kūlī Mulungu.

²⁹Nguno ū mhayo gwenūyū mutinhilwe gīkī mugelele kūnsanya dūhū ū Kilisito, alīyo nū kūluhiwa kūlwa nguno yakwe.

³⁰H'ūmo ng'wanibonelaga ū nene ū mu wilwisha ūbo naalī nabo, ūbo nī haha mukwigwaga gīkī nataalī nabo.