Read Sukuma Bible 2015 – Bibilia Ilagano Lya Kale 2015 Bafilipi 3 Bible Online

Bafilipi 3 - Sukuma Bible 2015 – Bibilia Ilagano Lya Kale 2015 bible

Bafilipi 3

¹Ū gwa kūmalīja badūgū bane gūlī gīkī, yegelagi mulī Seeba; ū nene natīko ū kūnoga ū kwikala nishokeela kūng'wandīkīla mihayo h'ī yenīyo dūhū, nguno īkūmulang'hana.

²Bakangūkagi a banhū a bahūnga, a ba nhūngwa gītī ja mva, abo basendamīlile mhayo gwa kūsaalwa.

³Nguno a bise h'abo tūsaalilwe, a bise abo tūkalamyaga mu kūtongeelwa na Moyo wa ng'wa Mulungu, na tūkayegelaga mulī Kilisito Yesu; abo tūtasendamīlile mīlī.

⁴Īkī ūlū mhayo gwa kūsendamīla mīlī dūhū, nūūlū ū nene nagūdūgije; ūlū alīho munhū asendamīlile mihayo ya mīlī, ū nene nalī kū būtongi ū mu yenīyo.

⁵Nakasaalwa nataalī ng'weleele wa shikū inaane, nalī w'ihanga lya Bayudaya gete, wa lūganda lo ng'wa Benjamini. Ng'hebulania wa Bahebulania, ū mu kashimīzīle ka mu shilagīlo naalī Mfalisayo.

⁶Ū mu būjangīīzu naalī nuhya wa kanisa, hama ū mu būtūngīlīja ūbo būfumile mu shilagīlo, naalī natī na shilingo!

⁷Alīyo ī mihayo īyo yaninhaga solobo, ī haha nakwībalaga kūbiza ya būjimīīja kūlwa ng'wa Kilisito.

⁸Hangī nīyo na kūtinda ho a henaho, nguno pyī ī mihayo nakwībalaga kūbiza ya dalali kūlwa wiza būtaale wa kūmana Kilisito Yesu Seeba wane, ūyo kūlwa nguno yakwe naajimīīja pyī ī shikolo. Nīyo nakūshibalaga kūbiza gītī maashi, gīkī nampandīke ū Kilisito,

⁹na nabonekane nalī mulī we, ītī kūlwa būtūngīlīja bone bo mu shilagīlo; alīyo kūlwa kūnzunya Kilisito, kūlwa būtūngīlīja bo ng'wa Mulungu ūbo būfumile mu kūzunya.

¹⁰Natogilwe naamane wei ng'wenekīlī, pyī nū būdūla bo kūjūūka kwakwe, nū būsangī wa kūluhiwa hamò nang'hwe. Nū nene nabize gīt'ūmo alī ū wei ū mu kūcha kwakwe;

¹¹gīkī ūlū yūdūlīkana, nane nalawanukūle ū būjūūko bo bafu.

¹²H'ītī kūhaya gīkī ū nene naamalile kūheeba, nūūlū gīkī naashikile a ha ngelelo ya būshikanu, alīyo nataalī nakūzegejaga, nane nagūdime ūyo Kilisito Yesu anidimile kūlwa nguno yago.

¹³Badūgū bane, ū nene ng'wenekīlī natibalaga gīkī namala kūdima, alīyo gūlīho gūmò dūhū ūyo nakūgwītaga, kwība ī ya kū numa, na kūnanamīīla ya kū būtongi.

¹⁴Ū būlīngīsīji bone būlī gīkī nashipandīke ī shakwinhwa sha kwigūlya, gīt'ūmo kalī kitanīle ka ng'wa Mulungu mulī Kilisito Yesu.

¹⁵Hūna lūūlū pye abo tūlī bashikanu tūbizagi nago ū mhayo gwenūyū; hama nūūlū mukabiza mulī n'iganiko līngī, ū Mulungu akūmukundūlīla nī lyenīlo nalyo.

¹⁶Kwike ī haha tūshimīzīlagi ū mu mhayo ūyo twamalile kūgūpandīka.

¹⁷Bing'we badūgū, bizagi balondeeji bane; ng'ūbitegeleja abo bakūshimīzaga gīt'ūmo būlī būlolelo ūbo tūkamulekela.

¹⁸Nguno nakūmuwīlaga gwa gwa gwa; hangī nī haha nalīmuwīla, nīyo mu kūlīla, gīkī balīho bangī ū mu shimīzīle yabo balī banishi ba nsalaba go ng'wa Kilisito.

¹⁹A banhū benabo ī ng'halīlo yabo īlī kūyagala, ī nda jabo hū mulungu wabo, ī mihayo īyo yigelile kūbadimya minala h'īyo bakīkumīlījaga, a maganiko gabo galolile kū shikolo sha mu sī.

²⁰Alīyo a bise ū būjigajiga wise būlī ng'wigūlū, hama nīyo ū kūfuma ko ū kwenūko, tūnindīīlile mpīja Seeba Yesu Kilisito;

²¹ūyo akūgūgalūcha ū mīlī gwise ūyo gūtī n'ikūjo gūbize gīt'ūmo gūlī gwakwe ū gw'ikūjo, kūlenganīla na būdūla bokwe ūbo akatūmamīlaga kūshitūūla ha sīlīlī yakwe pyī ī shikolo.