Read Sukuma Bible 2015 – Bibilia Ilagano Lya Kale 2015 Bakolose 3 Bible Online

Bakolose 3 - Sukuma Bible 2015 – Bibilia Ilagano Lya Kale 2015 bible

Bakolose 3

¹Hūna lūūlū ūlū ng'wamala kūjūūchiwa hamò na Kilisito, īkoobagi īyo īlī kwigūlya, ūko alī ū Kilisito, igashije kū nkono gwa būlyo go ng'wa Mulungu.

²A maganiko ging'we galogejagi kū mihayo ya kwigūlya, yaya ū kū ya mu sī.

³Nguno a bing'we muchile, nīyo ū būpanga wing'we būbisilwe mulī Mulungu hamò na Kilisito.

⁴Ūlū lyūshika ī likanza lya koolechiwa ū Kilisito ūyo alī būpanga wise, na a bing'we hū mukwilonga ū ng'wikūjo hamò nang'hwe.

⁵Ali lūūlū, jibūlagagi ī nhūngwa jing'we ī ja kashimīzīle ka mu sī, gītī, būjingi, būsoso, būhahaalīzu, kwikūmva kwabūbi, kwikūmva sabo, (ūyo gūlī mhayo gwa kūlamya shikolo).

⁶Nguno ū būpelanu bo ng'wa Mulungu būkabizīīlaga a bashitiigwa kūlwa mihayo yenīyo.

⁷Na a bing'we h'ūmo ng'washimīzīlaga aho ng'walī mutaalī ū mu mihayo yenīyo.

⁸Alīyo ī haha īponyagi gete ī mihayo gītī, būpelanu, būkalī, būbi; nū mu milomo ying'we wīnge ū būsondagūji nū būdūkani.

⁹Yaya ū kwilemba, nguno ng'wanzuulile ū munhū wa kale hamò nī shītīle shakwe,

¹⁰ng'ūnzwala munhū mpya, ūyo akongejaga kūbeejiwa būpya ū mu witegeleja, ongeje kūbiza mu suso ya nsūmbi wakwe.

¹¹Ū mu mhayo gwenūyū atīho wa kūbalwa gīkī ūyū Nyunani nūūlū Nyudaya; ūyū asaalilwe nūūlū atasaalilwe, nūūlū gīkī ūyū misa, ūyū muna mahanga, ūyū nsese, ūyū ntungūlwa, alīyo ū Kilisito alī shose mu bose.

¹²Hūna lūūlū a bing'we basolwa, abo mulī beela na batogwa ba ng'wa Mulungu, zwalagi nhūngwa ja kwisaatwa, kwichīla shigongo, widohya, būlyehu na wiyūmīlīja.

¹³Ng'wiyūmīlīja būlī ng'wene ū kū biye, nīyo ng'wilekeja ūlū alīho munhū alī na mhayo gwa kūnsaayīla ng'wiye, na a bing'we ng'wiyītīla gīt'ūmo wang'wītīla a bing'we ū Seeba.

¹⁴A higūlya ya yose yenīyo tūūlagi ho būtogwa, nguno ū wene būkūbanīgije pyī ī yose mu būshikanu bose.

¹⁵Hūna lūūlū ī mhola ya ng'wa Kilisito īsuge ū mu ng'holò jing'we, gīt'ūmo kitanīlwe king'we kalī mu mīlī gūmò; na bizagi banhū ba kūlūmba.

¹⁶Nū mhayo go ng'wa Kilisito gūbize mo ū mu bing'we, nīyo gūmukwīlīle. Mudūle kūyilanga na kwihūgūla bing'we benekīlī na benekīlī mu witegeleja bose, mu Zabuli na mīmbo, na mīmbo ga mu moyo; hamò na kūng'wīmbīla Mulungu na būyegi ū mung'holò jing'we.

¹⁷Nīyo būlī gwene ūyo mukūgwītaga, ībize mu kayombele nūūlū mu shītwa; pye yītagi mu lina lya ng'wa Seeba Yesu, kūnū mukūnkumīlījaga Mulungu Sīswe mulī we.

¹⁸A bing'we bakīma ng'widohya ū kū bagoshi bing'we gīt'ūmo shiigelile kūlī Seeba.

¹⁹Na a bing'we bagosha batogagwi a bake bing'we, nīyo yaya ū kūbakalīhīla.

²⁰A bing'we baana ng'ūbigwa mu yose a babyaji bing'we, nguno ū mhayo gwenūyū gūlī gwawiza ū kūlī Seeba.

²¹Na a bing'we bababa yaya ū kūbasaayīcha a baana bing'we batizūgwa ng'holò.

²²A bing'we basese ng'ūbigwa mu yose a basīng'we būgonzo mu mīlī, ītī ng'wikanza īlo balīmubona dūhū, gītī bachooji ba kūyeja banhū, alīyo ng'ogohagi Seeba nang'holò īmò.

²³Būlī gwene ūyo mulīgwīta gwītagi kūfuma mu gatī ya ng'holò, gītī mulīntūmamīla Seeba, yaya ū kūbiza gītī mukūbatūmamīlaga banhū.

²⁴Managi gīkī mukwanukūla mheela ya wingīji kūfuma kūlī Seeba, nguno mukūntūmamīlaga Seeba Kilisito.

²⁵Alīyo ūyo akwītaga yabūbi, akwanukūla īyo yigeleelilwe būbi wa nhūmamīle yakwe, būtīho būsolanhyiwa a ha gatī ya banhū.