Read Sukuma Bible 2015 – Bibilia Ilagano Lya Kale 2015 Yoshwa 13 Bible Online

Yoshwa 13 - Sukuma Bible 2015 – Bibilia Ilagano Lya Kale 2015 bible

Yoshwa 13

¹Ū Yoshwa aho wanamhalala wakwīja ī myaka ya būlamu, ū SEEBA ūng'wīla gīkī, “Ū bebe wakūlaga ī haha, alīyo ītaalī īlīho sī ngalī no ī ya kūding'wa.

²Ī sī īyo ītaalī kūding'wa yīyī: Py'a mabbaala ga Bafilisiti na a ga Bageshuli,

³kwandīja kū mongo gwa Shihooli, kīya ya Misili, kūja sukuma kū lūbīmbī lwa Ekuloni, ī sī yose yenīyo ītaalī yūbalwa kūbiza ya Bakanaani, (alīyo ī sī ya Bafilisiti, īkwikalīlagwa na basugi batanò mu mizengo ya, Gaza, Ashidodi, Ashikeloni, Gaasi, na Ekuloni; ī yose yenīyo ībalilwe gīkī ya Bakanaani);

⁴ū kūfuma ī dakama, pyī ī sī ya Bakanaani, kwīngīīla Alaba ya banhū ba Sidoni kūjūshika Afeki, kū sī ya Baamooli,

⁵nī libbaala lya Bagebali, nī Lebanoni ī yose kūja kīya, kūfuma Baali-gadi kū ntulumenho gwa lūgūlū lwa Helimoni, kūjūshika kū nzīla ya Hamasi.

⁶Alīyo abo bakikalaga mu sī ja maalūgūlū, kwandīja mhandī ja Lebanoni kūja Misilefoti-maini, hū kūhaya pye a Basidoni, a bene nakūbīnja nene ū kū būtongi wa Baisilaeli. Kwike ū bebe ītīnagūlage dūhū ī sī yenīyo kūlwa wingīji wa a Baisilaeli gīt'ūmo naakūlagīīlīla.

⁷Hūna ūkwīgabanhya ū kū ng'anda ījo kenda nī nusu ya lūganda lwa Manase, bapandīke ū wingīji wabo.”

⁸Ī nusu ī yīngī ī ya lūganda lwa Manase baamala kwanukūla ū wingīji wabo hamò na banhū ba lūganda lwa Lubeni na lwa Gaadi. Ū Musa ū ntūmami o ng'wa SEBA wamala kūbinha ū kū kīya ya mongo gwa Yolodani, gīt'ūmo wei ng'wenekīlī akabahelela.

⁹Ī lipandī lyenīlo līkūbanīgije mabbaala ga kwandīja Aloe, kūshisha kū lūgegu lwa mongo gwa Alinoni; na kūfuma kū nzengo ūyo gūlī ha gatī gatī ya ntubīlo gwa mongo gwenūyo, nī mbūga ya Madeba pyī ī yose kūshisha Diboni.

¹⁰Hūna nī mizengo ī yose īyo yalī ya ng'wa Sihoni ntemi wa Baamooli, ūyo ikūlū lyakwe lyaalī Heshiboni, bbihī na lūbīmbī lwa Baamoni.

¹¹Nī Gileadi īlīmo ū ng'wibbaala lyenīlo, ī sī ya banhū ba Geshuli na Maaka; nū lūgūlū ū lose ū lwa Helimoni nī Bashani ī yose, kūjūshika Saleka,

¹²hū kūhaya pyī ī sī ya Bashani, īyo yalī mu būtemi o ng'wa Ogi, ūyo wikalo w'ikūlū lyakwe walī Ashtalooti na Edilei. Ū munhū ng'wenūyo walī ūmò wa Balefai abo baalī baashiigīīla; abo Musa akabapyena wīsola ī sī yabo.

¹³Kwike a Baisilaeli bakaleka ū kūbapeeja a banhū ba Geshuli na a ba Maaka, hū kūhaya nī lelo īy'a banhū babo bakwikalaga hamò na a Baisilaeli.

¹⁴Alīyo a banhū ba lūganda lwa Lawī atabinhile ū wingīji, nguno ī shakwinha sha kūpemva īsho shikafunyiwagwa kūlwa ng'wa SEEBA Mulungu wa Baisilaeli, shilī wingīji wabo, gīt'ūmo wabisagīīgīja.

¹⁵Īyī h'ī sī īyo Musa akabinha banhū ba lūganda lwa Lubeni, gīt'ūmo būdūgū wabo walī būlī:

¹⁶Kwandīja Aloe kūshisha kū lūgegu lwa mongo gwa Alinoni, na kūfuma kū nzengo ūyo gwalī ha gatī gatī ya ntubīlo gwa mongo gwenūyo; nī mbūga ya Madeba

¹⁷kūshisha Heshiboni nī mizengo ī yose ī ya mu mbūga yenīyo; yūkūbanījiwa nī Diboni, Bamosi-baali, Beti-baali-meoni;

¹⁸Yahazi, Kedemoti, Mefaati,

¹⁹Kiliataimu, Sibuma, Zeleti-shaha, īyo īlī ha kaalūgūlū mu sī ya ntubīlo,

²⁰Beet-peoli, nī mitulumenho ya lūgūlū lwa Pisiga, nī Beet-yeshimoti,

²¹nī mizengo ī yose ī ya mu mbūga yenīyo, nī sī īyo yalī ya ng'wa Sihoni ntemi wa Baamooli, ūyo ikūlū lyakwe lyaalī Heshiboni. Ū Musa akampyena hamò na a batwale[11] Ba Bamidiani ba, Evi, Lekemu, Zūūli, Hūūli na Leba; nabo a benabo baalī basugi, nīyo baalī na banwani biiye ū Sihoni, na bikalaga ū mu sī yenīyo.

²²Ū Balaamu ū nchūūja, ū ng'witūnja o ng'wa Beoli; nang'hwe a Baisilaeli bakamūlaga bo līlūshū.

²³Ū lūbīmbī lwa banhū ba lūganda lwa Lubeni lwalī lūshikile a ha lūgegu lwa mongo gwa Yolodani. Ī mizengo yenīyo hamò na a magūngūli gayo hū walī wingīji wa banhū ba lūganda lwa Lubeni, gīt'ūmo būdūgū wabo walī būlī.

²⁴Īyī h'ī sī īyo Musa akabinha banhū ba lūganda lwa Gaadi, gīt'ūmo būdūgū wabo walī būlī:

²⁵Kwandīja Yazeeli; pyī ī mizengo ya mu Gileadi nī nusu ya sī ya Baamoni kūshisha Aloe bbihī na Laba.

²⁶Na kūfuma Heshimoni kūshisha Lamati-misipa na Betonimu; na kūfuma Mahanaimu kūshisha kū sī ya Debili,

²⁷nī sī y'inyalala; nī mizengo ya Beti-halani, Beti-nimula, Sukoti, na Zafoni, īyo yalī yasaagīīla kū būtemi o ng'wa Sihoni, ū ntemi wa Heshiboni (ī sī īyo īlī lwandī lwa kīya ya mongo gwa Yolodani, īyo ījile yūūkakuumīla ha Nyanza ya Galilaya).

²⁸Ī mizengo yenīyī na a magūngūli gayo hū yalī sī ya wingīji wa banhū ba lūganda lwa Gaadi, gīt'ūmo būdūgū wabo walī būlī.

²⁹Īyī h'ī sī īyo Musa akabinha banhū ba nusu ya lūganda lo Manase; ī nusu ya shibyalīlwe sha numba ya ng'wa Manase, gīt'ūmo būdūgū wabo walī būlī:

³⁰Ī sī yene yalī īkūbanīgije mapandī ga kwandīja Mahanaimu nī Bashani ī yose, pyī ī sī īyo yalī īsugilwe na Ogi ntemi wa Bashani; nī mizengo pyī ī ya ng'wipandī lya Yaili ū mu sī ya Bashani, īlī mizengo makūmi atandatū.

³¹Nī nusu ya Gileadi, hamò nī mizengo ya Ashitalooti na Edilei (mizengo y'ikūlū lya ng'wa Ogi ū mu Bashani). Ī sī yenīyo bakinhwa banhū ba shibyalīlwe sha ng'wa Makili ng'witūnja o ng'wa Manase, gīkī ībize wingīji wa nusu ya banhū ba lūganda lwa Makili, gīt'ūmo būdūgū wabo walī būlī.

³²Ū wenūbū hū ū wingīji gīt'ūmo Musa akabagabanhīja aho ataalī nabo a Baisilaeli mu mbūga ja Moabu, kū nkīlo gwa Yolodani, kīya ya nzengo gwa Yeliko.

³³Alīyo ū Musa atabinhile wingīji bose bose a Balawī, nguno ū SEEBA Mulungu wa Baisilaeli hū ng'wene alī wingīji wabo, gīt'ūmo wabisagīīgīja.