Read Sukuma Bible 2015 – Bibilia Ilagano Lya Kale 2015 Yoshwa 14 Bible Online

Yoshwa 14 - Sukuma Bible 2015 – Bibilia Ilagano Lya Kale 2015 bible

Yoshwa 14

¹Na lūūlū ī sī īji hū jene ījo Baisilaeli bakapandīka kūbiza wingīji wabo ū mu sī ya Kanaani. Bakagabanhyiwa na Elieza ū ngabīji, hamò na Yoshwa ng'witūnja o ng'wa Nuni, mu kūgunanhwa na batongeeji ba ndūgū ja Baisilaeli.

²Ī ng'anda īji kenda na nusu jikagabanhyiwa ū wingīji wajo mu nzīla ya kweesa mbale, gīt'ūmo SEEBA walī walagīīlīla mu nzīla ya ng'wa Musa.

³Ū Musa walī wamala kūbinha a banhū ba ng'anda īj'ibīlī na nusu ū wingīji wabo kū ntambūko gwa kīya ya mongo gwa Yolodani, alīyo a Balawī walī atabinhile ū wingīji hamò na a bichaabo.

⁴Nguno a bitūnja ba ng'wa Yosefu ū Manase nū Efulaimu-baalī bashika magele abīlī ga ng'anda. Na lūūlū a Balawī batanukūlile ngabo ū mu wingīji wa sī, ī mizengo ī yene bakanukūla būpandīka ha kwikala, na a madīīmīlo ga madaale ga ng'holo na ng'ombe jabo bakapandīka.

⁵Hūna a Baisilaeli bīīgabanha lūūlū ī sī, gīt'ūmo SEEBA waalī wanagīīla Musa.

⁶A banhū ba Yuda būng'wegeela ū Yoshwa aho bataalī Giligaali, ū Kekebu ng'witūnja o ng'wa Yafune wa lūdūgū lwa Bakeni ūng'wīla ū Yoshwa gīkī, “Ūdeebile ūmo SEEBA walī wang'wīlīla ū Musa ū munhū o ng'wa Mulungu aho tūlī Kadeeshi-balinea, ū mu mihayo yako ū bebe hamò nū nene.

⁷Ī shikū jene Musa ntūmami o ng'wa SEEBA akanitūma kūfuma Kadeeshi-balinea kwiza kūdata sī, naalī na myaka makūmi anè. Aho nashoka nūng'wenhela mhola ja kūlenganīla nū mumo yalī īzunīgije ī ng'holò yane.

⁸Alīyo a badūgū bane, abo baalī baaja hamò naane, būbakanga a banhū bogoha; ū nene nanondeelaga SEEBA Mulungu wane na ng'holò īmò.

⁹Hūna lūūlū ū mu lūshikū lwenūlo ū Musa ūnilahīlīla alīhaya, ‘Ī sī īyo mhambala jaako jīpandaga īkūbiza ya wingīji wako, hamò na a baana bako weleelo bose, nguno wanondeelaga ū SEEBA Mulungu wane na ng'holò īmò.’”

¹⁰Al'ī haha angū ūlībona gīkī ū SEEBA wagūshikīlīgije ūyo walī waniisagīja, ūūyū wanilang'hanile pyī ī myaka makūmi anè ī yose īyī, kūfuma aho akang'wīlīla Musa ng'wikanza lya Baisilaeli kūyeela yeela ū ng'witogolo; ī lelo nalī na myaka makūmi anaane n'ītanò.

¹¹Alīyo nataalī na nguzu gīt'ūmo naalī aho Musa wanitūmīlaga; ī nguzu ījo nalī najo ī haha jidūgije kūnigunanha nūūlū kūja mu būlūgū gīt'ūmo nīītīlaga dūhū ū mu shikū jenījo.

¹²Alilūūlū, ninhage ī sī ya lūgūlū yenīyī gīt'ūmo akaniisagīja ū SEEBA ū mu lūshikū lwenūlo. Bebe ng'wenekīlī ūkigwa ī gīkī balīho Baanaki, abo mizengo yabo īlī mitaale; hama īlī na ngītīli ja nguzu; alīyo nakūbapeeja dūhū kūlwa būgunanhi o ng'wa SEEBA, gīt'ūmo wei ng'wenekīlī ahayīlile.

¹³Hūna ū Yoshwa ūmfuuha ū Kelebu ū ng'witūnja o ng'wa Yefune, ūng'winha ng'hana ī Hebuloni kūbiza ya wingīji wakwe.

¹⁴Kūfuma ikanza lyenīlo ī Hebuloni yūbiza ya ng'wa Kelebu ng'witūnja o ng'wa Yefune, wa mu lūdūgū lwa Bakeni; nguno wanondeelaga na ng'holò īmò ū SEEBA Mulungu wa Baisilaeli.

¹⁵(Ī Hebuloni yitanagwa ī kwandya Kiliati-alaba, kūlwa kūng'wizūkwa Alaba ūyo walī abalilwe kūbiza munhū ntaale ū mu Baanaki.) Hūna ī sī yifuula ū būlūgū.