Read Sukuma Bible 2015 – Bibilia Ilagano Lya Kale 2015 Yoshwa 16 Bible Online

Yoshwa 16 - Sukuma Bible 2015 – Bibilia Ilagano Lya Kale 2015 bible

Yoshwa 16

¹Ū lūbīmbī lwa sī īyo akahelelwa Yosefu lwalī lwandīgije kū mongo gwa Yolodani ipandī lya Yeliko, kū kīya ya minzī ga Yeliko; hūna ū kwīngīīla a henaho lūūbīta ng'witogolo, lūūgoloola kūja kū sī ja magūlya ga Beeteli.

²Ū kūfuma ī Beeteli (h'ī Luzu) lūūgoloola kūja Atalooti kū sī ya Baaki;

³hūna lūūtulumenha lwikile ng'weli dūhū lūūkakuumīla lūbīmbī lwa Bayafileti, lūūkashika kū ntulumenho, kū sī ya Beti-holoni; hama lūūlūmbūlīla kūja Gezeeli, lūūkashilīla kū Nyanza.

⁴Na lūūlū a banhū ba shibyalīlwe sha ba Manase na Efulaimu a bitūnja ba ng'wa Yosefu, banukūla ū wingīji wabo.

⁵Īyī h'ī sī īyo yaalī ya lūganda lwa Efulaimu, gīt'ūmo ndūgū jabo jalī jilī: Ū lūbīmbī lwa sī ya wingīji wabo, ū kū kīya lwalī kwandīja ipandī lya Atalooti-adaali kūshisha Beeti-holoni ya kū magūlya,

⁶hūna lūūkolobela kūja kū Nyanza. Ī lipandī lya sukuma gwalīko nzengo gwa Mikimetati; hūna ū kwīnga ko ū kwenūko, ū lūbīmbī lwenūlo lūūgoloola lūjile kīya dūhū, kūīlīīla Tana-shilo; lūūbīta lūlīyikilimbīja kūja kīya lūūkashika Yanoa.

⁷Lwīnga ī Yanoa lūūlola Atalooti na Naala, lūūkabīta lūkwīyikilimbījaga ī Yeliko lūjile kūgadya mu mongo gwa Yolodani.

⁸Lwiyinamīka lūlolile ng'weli kūfuma Tapua, lūūkashika kū longa lwa ng'wa Kana, lūūkakalīkīla mu Nyanza. Ū wenūbū hū walī wingīji wa banhū ba lūganda lwa Efulaimu, gīt'ūmo ndūgū jabo jalī jilī.

⁹Ū mu wingīji wenūbo yaalī ībalīlilwe mo na mizengo hamò na a magūngūli gayo, īyo baalī baahelelwa a banhū ba lūganda lwa ng'wa Efulaimu; alīyo yūbiza īsangījiwe mu sī ya wingīji wa banhū ba lūganda lwa Manase.

¹⁰Kwike a banhū ba lūganda lwa Efulaimu batabapeegije a Bakanaani abo bikalaga mu Gezeeli; na lūūlū kūshisha lelo īyī, Bakanaani bakikalaga hamò na a banhū ba lūganda lwa ng'wa Efulaimu, kwike bakatūmamaga milīmo ya būsese wa kūhadīkījiwa.