Read Sukuma Bible 2015 – Bibilia Ilagano Lya Kale 2015 Yoshwa 2 Bible Online

Yoshwa 2 - Sukuma Bible 2015 – Bibilia Ilagano Lya Kale 2015 bible

Yoshwa 2

¹Hūna aho balī ha Shitimu henaho, ū Yoshwa ng'witūnja o ng'wa Nuni ūtūma mu mbisīla bagosha babīlī; ūbawīla gīkī, “Jaagi mukīīdate ī sī yenīyo; ī no no no ī Yeliko.” Hūna būja būkingīla mu numba ya nkīma ūmò malahya, lina lyakwe witanagwa Lahabu; būlenda henaho.

²Ū ntemi wa Yeliko ūwīlwa gīkī, “Alidegelekaga ī lelo ī būjikū bizaga ūmu bamò ba Baisilaeli kwīdata ī sī.”

³Na lūūlū ū ntemi wa Yeliko ūtūma banhū ū kū ng'wa Lahabu alīhaya, “Bafunyage hanze a banhū abo bizaga bingīla mu ng'wako; nguno a benabo bizaga kwīdata pyī ī sī.”

⁴Alīyo ū nkīma ng'wenūyo akasangwa wabasolaga a bagosha benabo būbīlī wabo ūbabisa. Na lūūlū ūshosha alīhaya gīkī, “Na ng'hana baalī bizaga bagosha babīlī a henaha, alīyo natadeebile ūko baalī baafumaga.

⁵Aho lyagwa ī līīmi, lyashika ikanza lya kūlugalwa mita gwa nzengo, baalī bīnga, nūleka ū kūdeeba ūko baalī baalola. Bakūūbījagi wangū, naliganika mukūbapandīka dūhū.”

⁶(Alīyo walī wabalinhya kwigūlya ya numba[1] yakwe hūna ūbakundīkīja mantī ga kitaani gaalī ū kwigūlya ya numba.)

⁷Na ng'hana abo baalī baatūng'wa būdima nzīla balībakūūbīja kūīlīīla kū mongo gwa Yolodani, būkashika ū kū būkīlīlo wa mongo gwenūyo. Aho bīnga dūhū a bakūūbīja benabo, gūlugalwa ū mita gwa nzengo.

⁸A badati benabo aho bataalī kūlaala, ū nkīma ng'wenūyo ūlinha ū kwigūlya ūko baalī.

⁹Ūbawīla, “Ū nene namanile gīkī ū SEEBA wang'winhile bing'we ī sī yenīyī. Nīyo nī lyogohya ling'we lyatūminije no; nose pye a bikaji ba ng'wenūmu baahaahūkile[2] no, kūlwa nguno ya kūng'ogoha bing'we.

¹⁰Nguno ī mhola jing'we jatūpandīka, ī gīkī ū SEEBA akamubeegeja nzīla aho mulīfuma Misili, ūgakamya a minzī ga mu Nyanza Yaaza, ng'ūpandīka ha kūbītīla. Pyī nī mihayo ya kīya ū kū nkīlo gwa Yolodani, īyo mukabīītīla ba Sihoni na Ogi, a batemi a babīlī ba Baamooli, abo mukabakenaagūla gete.

¹¹Aho twayigwa ī yenīyo jūbbaha ī ng'holò jise, būlī ng'weene ūmala gete ū gwa kūpya kūlwa nguno ying'we; nguno ū SEEBA Mulungu wing'we hū ng'wene ūyo alī Mulungu ū kwigūlya ū ng'wigūlū, nī hasī ū mu sī.

¹²Alilūūlū, nalīng'wikūmbīlīja muniilahīlīle kūlī SEEBA, gīkī mukwīyītīla yawiza ī kaya ya ng'wise, nguno nū nene nang'wītīlaga yawiza. Hama nīyo ninhagi shimanīīkījo sha ng'hana gete,

¹³sha koolecha gīkī mutūmūlaga ū baba nū mayū, na a baana bang'wise bagosha na bakīma, na a banhū ba mu kaya jabo pye a bose; na gīkī mukūtūpīja ū būpanga wise, tūtizūūcha.”

¹⁴A banhū benabo būng'wīla gīkī, “Twaweega ū būpanga wise kūlwa būpanga wing'we! Ūlū ng'ūleka ū kūgūkumūcha ū nīmo gwise gwenūyū, a bise tūkūng'wītīla yawiza na ya wishigwa būtaale no ī likanza lya ng'wa SEEBA kūtwinha ī sī yenīyī.”

¹⁵Na lūūlū ūbabītīja h'iddilisha, ūbicha bo lūgoye, nguno ī numba īyo wikalaga, ī ndugu ya lwandī ū lūmò yaalī ndugu ya nzengo gwenūyo.

¹⁶Hūna ūbawīla gīkī, “Jaagi kū ngūlū, batizūmupandīka abo balīmukooba; jagi mukibise kwenūko shikū idatū kūshisha bashoke, hanuma lūūlū hū mukūja ūko ng'wafumile.”

¹⁷A banhū benabo būng'wīla ū nkīma ng'wenūyo, “A bise tūtūbiza na shilingo ū mu shilahīlo īsho watwilahīja shenīshi,

¹⁸ūlū gīkī a h'ikanza lya kwingīla ū mu sī yenīyī tūūleka kūsanga wagūtungaga ū ngwasho gwaza ūyū, a h'idilisha īlo watwikīja lyenīlī; na a babyaaji bako, ū so nū noko, ūsangwe wabingījaga ū mu numba yako, hamò na a baana ba ng'wing'we bagosha na bakīma, nī kaya ya ng'wing'we ī yose.

¹⁹Ūlū munhū ūfuma ū mu numba yenīyī ūja hanze kūcheyeeka mu mabbalabbala, a mininga gakwe gakūbiza higūlya ya ntwe gwakwe wei ng'wenekīlī; a bise tūtūbiza ba kūsolwa būbi. Alīyo ūlū munhū alī mu kaya hamò nang'ho, hūna nkono gose gose gūnkuumya, a mininga gakwe gakūbiza ha mitwe yise.

²⁰Kwike ū bebe ūlū ūlagūkumūche ū nīmo gwise gwenūyū, tūkūbiza twataligūka ū mu shilahīlo īsho watwilahījaga.”

²¹Nang'hwe ūbashokeja alīhaya, “Mulītūngīlīja n'ījaaage gīt'ūmo ng'wahayīla gīko.” Hūna ūbaleka būja; nang'hwe ūgūtunga ū ngwasho gwaza a h'idilisha lyenīlo.

²²Aho bīnga a henaho būlinha kūja kū ngūlū, būkikala kwenūko kūshisha shikū idatū; a bakūūbīja babo būkooba pye a hose ū mu bbihī bbihī ya nzīla, būbagayiwa būshoka kaya.

²³Hūna nabo a bagosha a babīlī benabo bika ū mu ngūlū būshoka, būūkakīla a ha būkīlīlo wa mongo, būja ū kūlī Yoshwa ng'witūnja o ng'wa Nuni, būūkang'winha pyī īyo īkabilongela.

²⁴Būng'wīla ū Yoshwa gīkī, “Ū SEEBA wītūūlile mu makono gise gete pyī ī sī yenīyo, a ba nhū a bose ūmo bagelelile bakūdetemaga dūhū ī haha kūlwa kūtogoha bise.”