Read Sukuma Bible 2015 – Bibilia Ilagano Lya Kale 2015 Yoshwa 21 Bible Online

Yoshwa 21 - Sukuma Bible 2015 – Bibilia Ilagano Lya Kale 2015 bible

Yoshwa 21

¹Nabo a bataale ba kaya ja Balawī būng'wegeela ū ngabīji Elieza nū Yoshwa ng'witūnja o ng'wa Nuni, na a bataale a bangī a bang'anda jingī ī ja Baisilaeli.

²Ī shikū jenījo balī Shilo mu sī ya Kanaani, aho baabeegeela būbawīla, “Ū SEEBA walī walagīja mu nzīla ya ng'wa Musa gīkī mutwinhe nise mizengo ya kwikala mo, hamò na madīīmīlo ga mitugo jise.”

³Na ng'hana a Baisilaeli būshikīlīja gīt'ūmo SEEBA walī walagīja, būbinha a Balawī kūfuma ū mu sī ja wingīji wabo mizengo īyī hamò na madīīmīlo gayo:

⁴Ī mbale ya kwandya yūbagwīla ba mu kaya ya ng'wa Kohati. A Balawī abo baalī ba shibyalīlwe sha ngabīji Alooni binhwa mizengo ikūmi n'idatū kūfuma mu banhū ba ng'anda ja ba Yuda, Simioni na Benjamini.

⁵A bangī a ba shibyalīlwe sha ng'wa Kohati bakinhwa mizengo ikūmi kūfuma mu kaya ja banhū ba ng'anda ja ba Efulaimu, Dani na nusu ya lūganda lwa ng'wa Manase.

⁶A ba shibyalīlwe sha ng'wa Gelishoni a bene bakinhwa mizengo ikūmi n'idatū kūfuma mu kaya ja banhū ba ng'anda ja ba Isakaali, Asheli, na Nafutali, nī nusu ya lūganda lwa ng'wa Manase ī ya Bashani.

⁷A ba shibyalīlwe sha ng'wa Melali kūlenganīla nū mumo jalī ndūgū jabo banukūla mizengo ikūmi n'ībīlī kūfuma kū banhū ba ng'anda ja ba Lubeni, Gaadi, na Zabuloni.

⁸Na lūūlū a Baisilaeli būbagabanhya a Balawī ī mizengo yenīyī, hamò na a madīīmīlo gayo, gīt'ūmo SEEBA walī walagīja mu nzīla ya ng'wa Musa.

⁹Ū kūfuma ū mu ng'anda ja ba Yuda na Simioni, bīīgaba ī mizengo īyī kūlenganīla nū mumo gaalī a mina gayo.

¹⁰(Ī mizengo īyī būgabīlwa Balawī ba mu kaya ya ng'wa Kohati, abo baalī ba shibyalīlwe sha ng'wa Alooni, nguno ī mbale ya kwandya īkabagwīīla boi).

¹¹Ū kūfuma mu sī ya magūlya ga lūganda lwa ng'wa Yuda, binhwa nzengo gwa Kiliati-alaba (h'ī Hebuloni) hamò na madīīmīlo gaago, (ū Alaba walī nkūlūgeji wa Baanaki).

¹²Alīyo a malaale na a magūngūli ayo gaalī gagūpīndije ū nzengo gwenūyo baalī bamala kūng'winha Kelebu ng'witūnja o ng'wa Yefune kūbiza sabo yakwe.

¹³Na lūūlū a ba shibyalīlwe sha ngabīji Alooni binhwa Hebuloni (ūyo gwalī nzengo gwa kūpeelela ūlū munhū ūbūūlwa gīkī wabūlagaga), na Libuna,

¹⁴Jatili, Esitemoa,

¹⁵Holoni, Debili,

¹⁶Aini, Juta, na Beti-shemeshi; mizengo kenda hamò na madīīmīlo gayo kūfuma ū mu ng'anda būbīlī wajo jenīji.

¹⁷Ū kūfuma ū mu lūganda lwa ng'wa Benjamini binhwa mizengo ya Gibeoni, Geba,

¹⁸Anasosi, hamò na Alimoni; mizengo īnè na madīīmīlo gayo.

¹⁹Ī mizengo ya bagabīji ba mu kaya ya ng'wa Alooni ī yose yalī ikūmi n'idatū, hamò na madīīmīlo gayo.

²⁰A Balawī a bangī a ba shibyalīlwe sha ng'wa Kohati bakinhwa mizengo kūfuma mu sī ya banhū ba shibyalīlwe sha lūganda lwa ng'wa Efulaimu.

²¹Ū kūfuma ū mu sī ya magūlya ga lūganda lwa ng'wa Efulaimu binhwa Shekemu (ūyo nago gwalī nzengo gwa kūpelela ūlū munhū ūbūūlwa gīkī wabūlagaga), na Geza,

²²Kibuzaimu, na Beti-holoni; mizengo īnè hamò na madīīmīlo gayo.

²³Hama ū kūfuma ū mu lūganda lwa ng'wa Dani binhwa mizengo ya Eliteke, Gibesoni,

²⁴Aijaloni, Gati-limoni; mizengo īnè hamò na madīīmīlo gayo.

²⁵Nū kūfuma ū mu nusu ya lūganda lwa ng'wa Manase banukūla Taanaki na Gati-limoni; mizengo ībīlī hamò na madīīmīlo gayo.

²⁶Ī mizengo ī yose ikūmi yenīyī hamò na a madīīmīlo gayo bakinhwa banhū ba ndūgū ja ng'wa Kohati abo baalī baasaagīīla.

²⁷A Balawī ba mu kaya ya ng'wa Gelishomu a bene ū kūfuma ū mu nusu ī yīngī ī ya lūganda lwa ng'wa Manase bakinhwa nzengo gwa Golani, mu sī ya Bashani (nago gwalī nzengo gwa kūpeelela ūlū munhū ūbūūlwa gīkī wabūlagaga), binhwa na Beeshitala; mizengo ībīlī hamò na madīīmīlo gayo.

²⁸Ū kūfuma ū kū lūganda lwa ng'wa Isakaali banukūla Kishioni, Dabela,

²⁹Jalimuti, na Enganimu; mizengo īnè hamò na madīīmīlo gayo.

³⁰Ū kūfuma ū kū lūganda lwa ng'wa Asheli banukūla Mishali, Abudoni

³¹Helikati na Lehobu; mizengo īnè hamò na madīīmīlo gayo.

³²Ū kūfuma ū kū lūganda lwa ng'wa Nafutali banukūla Kedeshi ya Gileadi (nago gwalī nzengo gwa kūpeelela ūlū munhū ūbūūlwa gīkī wabūlagaga), Hamosi-dooli, na Kalita; mizengo idatū hamò na madīīmīlo gayo.

³³Ī mizengo ī yose īyo bakinhwa banhū ba mu kaya ya ng'wa Gelishomu yaal'ikūmi n'idatū hamò na madīīmīlo gayo.

³⁴A ba mu kaya ya ng'wa Melali (a Balawī abo baalī baasaagīīla) a bene ū kūfuma ū kū lūganda lwa ng'wa Zabuloni binhwa Yokineamu, Kalita,

³⁵Dimuna, na Nahalali; mizengo īnè hamò na madīīmīlo gayo.

³⁶Ū kūfuma ū kū lūganda lwa Lubeni binhwa Beza, Yahazi,

³⁷Kedemoti na Mefaati; mizengo īnè hamò na madīīmīlo gayo.

³⁸Ū kūfuma ū kū lūganda lwa Gaadi binhwa Lamoti mu sī ya Gileadi (nago nzengo gwa kūpeelela ūlū munhū ūbūūlwa gīkī wabūlagaga), Mahanaimu,

³⁹Heshiboni, na Yazeeli; mizengo īnè hamò na madīīmīlo gaaayo.

⁴⁰Ī mizengo ī yose īyo bakahelelwa banhū ba kaya ja ng'wa Melali, a Balawī abo baalī baasaagīīla, yalī ikūmi n'ībīlī.

⁴¹Ī mizengo ī yose ī ya Balawī ū mu sī īyo bakīdima Baisilaeli, yalī makūmi anè, n'īnaane hamò na a madīīmīlo gayo.

⁴²Ī mizengo yenīyī būlī gwene gwalī na madīīmīlo gayo, gagūpīndīlīgije; h'ūmo yaalī pyī ī mizengo.

⁴³Hūna lūūlū ū SEEBA ūbiza wabinha ng'hana a Baisilaeli pyī ī sī īyo walī wabisagīja kūbinha bakūlūgenji babo, bīdima bikala mo būlembeela. Ū mu banishi babo atigelile nūūlū ūmò wa kūbīīmīla; ū SEEBA akabatūūla pye a banishi babo mu nkono gwabo.

⁴⁴Ū kwisagīja kwa ng'wa SEEBA ū kwawiza ū kū banhū ba numba ya ng'wa Isilaeli, pyī ū kose kūkashikīīla.

⁴⁵Gūtalebile mhayo nūūlū gūmò gwaho.