Read Sukuma Bible 2015 – Bibilia Ilagano Lya Kale 2015 Yoshwa 22 Bible Online

Yoshwa 22 - Sukuma Bible 2015 – Bibilia Ilagano Lya Kale 2015 bible

Yoshwa 22

¹Hūna ū Yoshwa ūbitana a banhū ba lūganda lwa ng'wa Lubeni nū lwa ng'wa Gaadi, na a ba nusu ya lūganda lwa ng'wa Manase;

²ūbawīla gīkī, “Ng'wabeegije ū kūshikīlīja pyī īyo Musa ntūmami o ng'wa SEEBA walī walagīla, nū nene ng'wūniigwa mu yose īyo naalūmulagīlaga kwīta.

³Ī haha jakwīlaga ī shikū ū mulī kūūnū, alīyo mutabalekanīgije a badūgū bing'we; ng'wagūshikīlīgije chiza ū nīmo ūyo SEEBA Mulungu wing'we walī wamuhelela kūgwīta.

⁴Na lūūlū īkī ū SEEBA Mulungu wing'we wabifuugije na badūgū bing'we gīt'ūmo walī wisagīja, ī haha mudūgije kūshoka kaya kū sī ying'we īyo Musa ntūmami o ng'wa SEEBA wang'winha, ū kū ntambūko gwa mongo gwa Yolodani.

⁵Kwike ilang'hanagi, mubize bitegeleja ū mu kūshimizīle ū mu kahelele nū mu shilagīlo īsho wang'winha Musa ntūmami o ng'wa SEEBA, ū kūntogwa ū SEEBA Mulungu wing'we, na kūshimizīla mu nzīla jakwe jose, nū kūshikīlīja ī ya shilagīlo shakwe, na kūdiimana nang'hwe mu būshikaanu wa ng'hana, na kūntūmamīla we na ng'holò īmò mu būpanga wing'we bose.”

⁶Hūna ū Yoshwa ūbafuuha hama ūbalaga būja kaya kū mizengo yabo.

⁷(Ī nusu ya banhū ba lūganda lwa ng'wa Manase ī yīmò, ū Musa walī wamala kūbinha sī ipandī lya Bashani, hama ī nusu ī yīngī Yoshwa ūbinha ī sī, kū ntambūko gwa ng'weli ya mongo gwa Yolodani hamò na a baana ba ng'wabo a bangī.) Na lūūlū ū Yoshwa aho wabalaga kūja kaya, akabafuuha mbango

⁸alībawīla gīkī, “Shokagi kaya, mushike najo ī sabo jing'we jenīji; jagi na madaale mataale ga mitugo, hamò feza, zahabu, shaba na chūūma; na myenda mingī. Ūlū mulashike ko mubagabūlīle na a baana ba ng'wing'we ī shikolo īsho ng'wasolile nding'wa kūfuma kū banishi bing'we.”

⁹Na lūūlū a ba lūganda lwa Lubeni, nū lwa ng'wa Gaadi, nī nusu ya lūganda lwa Manase, būbaleka a Baisilaeli Shilo ya Kanaani, būshoka Gileadi kū sī yabo īyo baalī binhwa, gīt'ūmo shilagīlo sha ng'wa SEEBA shalī shihayīlile kūbītīla mulī Musa.

¹⁰A banhū benabo aho baashika Geliloti kū mongo gwa Yolodani, alīyo būbiza bataalī mu sī ya Kanaani, būzenga ng'walīlo ntaale haho bbihī nū mongo gwa Yolodani.

¹¹A Baisilaeli aho bigwa gīkī baazengile ng'walīlo ipandī lya Geliloti kū lūbīmbī lwa sī ya Kanaani, ū kū lwandī lwa sī ya Baisilaeli,

¹²a Baisilaeli a bose biibilingīla Shilo kūlonja mihayo ya būlūgū gīkī babasange ko bakalwe būlūgū nabo.

¹³Na lūūlū a Baisilaeli būntūma Finehasi ng'witūnja wa ngabīji Elieza gīkī aje ī Gileadi, ū kū banhū ba lūganda lwa ng'wa Lubeni, nū lwa ng'wa Gaadi, nī nusu ya lūganda lwa ng'wa Manase.

¹⁴Ūja hamò na banhū ikūmi, bataale ba ng'anda jabo; munhū ūmò būlī lūganda lwa Baisilaeli, nīyo būlī ng'wene ūbiza walī ntaale wa lūdūgū lwa ng'wawe ū mu ndūgū ja Baisilaeli.

¹⁵Aho bashika ī Gileadi ū kū banhū ba lūganda lwa ng'wa Lubeni na lwa ng'wa Gaadi, nī nusu ya lūganda lwa ng'wa Manase, būbawīla,

¹⁶“Pye a Baisilaeli balīhaya gīkī, ‘Ng'wandije kinehe nose ng'wīta mhayo gwa kūng'olekeja būgomi wabūbi gīko ū SEEBA Mulungu wa Baisilaeli? Mudūgije kinehe ū kūgalūka ī haha yenīyī ng'ūneka ū SEEBA ng'ūgoma ng'wizengela ng'walīlo gwing'we?

¹⁷Ū būbi wa Peoli ūbo būkatūgwīīla tūūluha, tūtaalī dūhū ū kwigeja? Nguno kūshisha nī lelo īyī tūtaalī ū kwiyeeja ū kūfuma ū mu būkenaagūji wenūbo nūūlū īkī a banhū ba ng'wa SEEBA bakagwīlwa ihūūya lyabūbi!

¹⁸A bing'we ning'we hū ng'ongeja kūgalūka dūhū na kūneka ū SEEBA? Mutamanile gīkī ī lelo yenīyī ūlū ng'wīta būshitiigwa ng'ūneka ū SEEBA, ī ntondo akūbapelanīla pye a Baisilaeli?

¹⁹Ūlū mulībona gīkī ī sī ying'we ītī neela, gūkīlagi ū mongo ng'wize kūūnū kū sī ya ng'wa SEEBA, ūko līlī ī liheema; nzūgi twisangīje tūkūgabanha ī sī īyo īlīho. Alīyo ū gwa kūngomela SEEBA, na kūtūlemeela na a bise ng'wibeegeja ng'walīlo gwing'we ning'we, kūleka ū ng'walīlo go ng'wa SEEBA Mulungu wise, yaya gete ī gīko.

²⁰Ū Akani wa kū ng'wa Zela aho akīīta wibītīlīja, ūsola shikolo īsho shalī shiigelile kūfunyiwa kūlwa ng'wa SEEBA, atabenhelegije nsango pye a Baisilaeli? Angū ū būhūbi wakwe būtagelelile kūmūlaja wei iyene dūhū!’”

²¹Nabo a banhū ba lūganda lwa ng'wa Lubeni nū lwa ng'wa Gaadi nī nusu ya lūganda lwa ng'wa Manase būbashokeja a bataale ba ndūgū ja Baisilaeli būhaya,

²²“Ū wa būdūla bose, ng'wene Mulungu! Hū ng'wene ū SEEBA! Ū wa būdūla bose, ng'wene Mulungu! Hū ng'wene ū SEEBA! Ng'wenūyo h'ūyo amanile gete! Na a Baisilaeli ni badeebage! Ū mhayo gwenūyū ūlū gūfumile mu būgomi nūūlū būshitiigwa kūlī SEEBA, ī lelo yenīyī tūmalagi pye, mutizūtūsaaja nūūlū hado.

²³Ūlū twizengelile ng'walīlo gwise benekīlī gīkī tūgalūke tūneke SEEBA twandye kūyūfunya shakwinha sha kūpemva aha, na shakwinha sha būsu, nūūlū kūyūfunīja ho shakwinha sha būsangī, SEEBA ng'wenekīlī ni atwinhage nsango!

²⁴Ītī gīko na hado yaya; ū mhayo gwenūyū twagwītile kūlwa kogoha gīkī lūshikū lūmò a banhū ba shibyalīlwe shing'we bakūbawīla a ba shibyalīlwe shiise gīkī, ‘A bing'we ning'we mulī na kī ū kūlī SEEBA Mulungu wa Baisilaeli?

²⁵Mulībona gīkī ū SEEBA watūūla mongo gwa Yolodani kūbiza lūbīmbī a ha gatī yise na a bing'we a ba lūganda lwa ng'wa Lubeni na lwa ng'wa Gaadi! A bing'we mutī na sha kūsola ū kūlī SEEBA!’ Hūna ū mu gīko a banhū ba shibyalīlwe shing'we badūgije kūbagwisha ng'holò a baana bise nose booya ū kūng'ogoha ū SEEBA.

²⁶H'ī nguno yene tūkiwīla gīkī, ‘Twigolanyagi tūzenge ng'walīlo, alīyo gūtizūbiza gwa kūfunīja ho shakwinha sha kūpemva, nūūlū shitambò sha mbika yose yose.’

²⁷Ū goi gūbize gwa būkaanīji a ha gatī yise na a bing'we, nū kū shibyalīlwe īsho shilaakūūbīje hanuma yise koolecha gīkī ū SEEBA tūkūnamīja kwipandī lyakwe lyeela, h'ūko tūkūmfunīja ī shakwinha shise sha kūpemva, nī shitambò nī shakwinha sha būsangī. Ū mu gīko ū kū shikū ja kū būtongi a baana bing'we batūdūla ū kūbawīla a bise gīkī, ‘A bing'we mutī na shose shose ū kūlī SEEBA.’

²⁸A bise tūkahooya tūūbona gīkī, ‘A benaba ūlū būtūwīla ū mhayo gwenūyo, nūūlū būbawīla banhū ba shibyalīlwe shise, tūkūhaya gīkī, Gūlolagi ū ng'walīlo gwa kwikola nū ng'walīlo go ng'wa SEEBA, ūyo bakūlūgenji bise baagūbeeja kūlwa būkaanīji. Batagūbeegije kūlwa nguno ya kūfunīja ho shakwinha sha kūpemva nūūlū shitambò shose shose, alīyo kūlwa būkaanīji a ha gatī yise na a bing'we.’

²⁹A bise ngilo gete ū kūngomela ū SEEBA na kūgalūka tūneke ī lelo īyī. Tūtīko kwizengela ng'walīlo gwa kūfunīja ho shakwinha sha kūpemva, na shakwinha sha būsu, nūūlū shitambò shose shose, ūlū ītī ū ng'walīlo go ng'wa SEEBA Mulungu wise dūhū, ūyo gwīmīīlile kū būtongi w'iheema lyakwe.”

³⁰Ū ngabīji Finehasi na a batongeeji ba Baisilaeli, a bataale ba kaya ja Baisilaeli, aho biigwa īyo bakīhaya a banhū ba lūganda lwa ng'wa Lubeni nū lwa ng'wa Gaadi, na a ba nusu ya lūganda lwa ng'wa Manase, būyega.

³¹Ū Finehasi ū ng'witūnja wa ngabīji Elieza ūbawīla a banhū ba lūganda lwa ng'wa Lubeni nū lwa ng'wa Gaadi, na a ba nusu ya lūganda lwa ng'wa Manase gīkī, “Ī lelo twadeeba gīkī ū SEEBA alī hamò nise, nguno gashi ū mhayo gwenūyo mutagwītile kūlwa kūngomela SEEBA. Ī haha ng'wīpījaga ū mu nkono go ng'wa SEEBA ī Isilaeli.”

³²Hūna ū Finehasi ū ng'witūnja wa ngabīji Elieza, na a batongeeji ba Baisilaeli bīnga ī Gileadi, ū kū banhū ba lūganda lwa ng'wa Lubeni, na a ba lūganda lwa ng'wa Gaadi, būshoka Kanaani; būjitwala ī mhola jenījo ū kū Baisilaeli.

³³Aho baajiigwa ī mhola jenījo bakayega no būnkumīlīja Mulungu; booya ū kūhooyela ya kūja kū būlūgū kwilwisha, na kwīkenaagūla ī sī ūko bakikalaga a ba lūganda lwa ng'wa Lubeni na a ba lūganda lwa ng'wa Gaadi.

³⁴A banhū ba lūganda lwa ng'wa Lubeni na a ba lūganda lwa ng'wa Gaadi būgwitana ū ng'walīlo gwenūyo lina lya, BŪKAANĪJI HA GATĪ YISE GĪKĪ Ū SEEBA ALĪ MULUNGU.