Read Sukuma Bible 2015 – Bibilia Ilagano Lya Kale 2015 Yoshwa 23 Bible Online

Yoshwa 23 - Sukuma Bible 2015 – Bibilia Ilagano Lya Kale 2015 bible

Yoshwa 23

¹Aho lyabīta ikanza lya shikū ningī, nū SEEBA ūbiza wabifuugije a Baisilaeli ū kū banishi babo a bose abo baalī babapīndije hose hose, ū Yoshwa akongeja ū kūnamhaala.

²Hūna ikanza ilebe ū Yoshwa ūbitana pye a Baisilaeli, a banamhala babo, batogeeji ba ng'anda, balamuji, na a bagunanhi; ūbawīla gīkī, “Ū nene ī haha nanamhaalaga, jajaga ī shikū jaane.

³A bing'we benekīlī ng'wībonile pyī īyo SEEBA Mulungu wing'we wabīītīlile a banhū ba mahanga gose genayo kūlwa nguno ying'we. Ū SEEBA Mulungu wing'we hū ng'wene ūyo walūmulwīlīīlaga.

⁴Mumanile ūmo nīīgabanhīgije pyī ī sī kū ng'anda jing'we ī jose, kūbiza wingīji wing'we; ī yose ī ya mahanga ayo twamalile kūgadima, na a yayo gaasaagile ho, kūfuma kīya kū mongo gwa Yolodani kūshisha kū ng'weli ū kū Nyanza ī Nhaale.

⁵Ū SEEBA Mulungu wing'we, wei ng'wenekīlī akūbasunda a banhū ba mahanga genayo bang'wīngīle; akūbapeeja bīnge ū kū būtongi wing'we, ng'wīdiime bing'we ī sī yabo, gīt'ūmo kūlī kwisagīja kwa ng'wa SEEBA Mulungu wing'we.

⁶Na lūūlū a bing'we handatīlagi dūhū, ng'wīlondeele mu welwang'holò pyī īyo yandīkīlwe ū mu shitabo sha Shilagīlo sha ng'wa Musa; yaya kūgalūka kūja kū būlyo nūūlū kū lūmoso.

⁷Yaya ū kūbiza na būsangī nabo a banhū ba mahanga ayo gaasaagīīlile ū mu bing'we genaya, yaya ū kūgahaya a mina ga baamulungu babo, nūūlū kwilahīla mu mina gabo yaya. Yaya gete ū kūbatūmamīla, nūūlū kwinama kū būtongi wabo a baamulungu benabo.

⁸Alīyo diimanagi na SEEBA Mulungu wing'we, gīt'ūmo mukwītīlaga kūshisha lelo īyī.

⁹Ū SEEBA wamupeegegije mahanga mataale na ga nguzu ningī no; kūshisha haha īyī ataalī kwilonga nūūlū ūmò wa kūng'wīmīla a bing'we.

¹⁰Munhū ūmò ū mu bing'we akūpeejaga banhū shihūmbī shigima, nguno ū SEEBA hū ng'wene ūyo akūmulwīlīīlaga, gīt'ūmo walī wang'wisagīja.

¹¹Na lūūlū ilang'hanagi dūhū a bing'we muntogwe gete ū SEEBA Mulungu wing'we.

¹²Alīyo ūlū ng'ūgalūka, ng'wandya kūnwaana nabo a banhū ba mahanga ayo gaasaagīīlile ū mu bing'we, na ng'wandya kwitooleela nabo a banhū benabo na kūbiza na būsangī nabo;

¹³a henaho deebagi hape gīkī ū SEEBA Mulungu wing'we atūbapeeja bang'wīngīle a banhū ba mahanga genayo. A ha ng'wanya gwaaho bakūbiza lūtu lwa kūmugwasha a bing'we, na nang'ha gwa kūmudīīmūlīla kū ngongo, na magwaata ga kūmukwaala kū miso, kūshisha mukenaagūke mushile gete ū mu sī ī yawiza yenīyī, īyo wang'winhile ū SEEBA Mulungu wing'we.

¹⁴Ū nene ī haha nalī bbihī kūja ūko sī yose ījile; mumanile hape ū mu ng'holò jing'we nū mu būpanga wing'we bose, ī gīkī ū mu yose īyo SEEBA Mulungu wing'we wang'wisagīja, gūtīho nūūlū gūmò ūyo gūtashikīīlile. Būlī kwisagīja kwakwe kwashikīīlile, gūtalebile mhayo nūūlū gūmò yaya.

¹⁵Alīyo gīt'ūmo yashikīīlile pyī īyo waalī wang'wisagīja ū SEEBA Mulungu wing'we, ū SEEBA akūng'wenhela gīko na a mabūbi a gose ayo wamuwīla, kūshisha amukenaagūle mushile ho gete ū mu sī ī yawiza yenīyī īyo wang'winhile.

¹⁶Ūlū ng'ūlīkenaagūla ī lilagane lya ng'wa SEEBA Mulungu wing'we īlo wamulagīla kūlīdima, ng'wandya kūja kūbatūmamīla baamulungu bangī na kwinama kū būtongi wabo, a henaho ū būpelanu bo ng'wa SEEBA būkūng'widīkīla; mukūkenaagūka wangū no mushile ū mu sī ī yawiza īyo wang'winhile.”