Read Sukuma Bible 2015 – Bibilia Ilagano Lya Kale 2015 Yoshwa 3 Bible Online

Yoshwa 3 - Sukuma Bible 2015 – Bibilia Ilagano Lya Kale 2015 bible

Yoshwa 3

¹Ha ntondo yaho ī dilū, ū Yoshwa na a Baisilaeli a bose būbūūka kwīnga ī Shitimu, beegeela kū mongo gwa Yolodani, būūkatūūla ng'hambī kwenūko aho bataalī kūkīla.

²Aho jabīta shikū idatū a bagunanhi būbīta pye a hose ū mu ng'hambī,

³būja bakūbakomigaga a banhū balībawīla, “Ūlū ng'ūbabona a bagabīji, a ba lūganda lwa Lawī, baalībūūcha ī lisandīko lya būlagane bo ng'wa SEEBA Mulungu wing'we, shing'wigelile kwīnga aho mukwikalaga mulīlondeele.

⁴Ū mu gīko hū mukūdeeba ūko mujile, nguno mutaalī ū kūshika a mapandī genaya na kamò yaya. Kwike īkūng'wigeleelwa kūbiza kūle nalyo ī lisandīko, bū kūle wa kwegeela ha kilomiita īmò;[3] yaya ū kūlyegeela bo mumo bbihī.”

⁵Ū Yoshwa ūbawīla a banhū gīkī, “Iyeejagi nguno ū SEEBA akwīta mihayo mitaale ū mu bing'we ī ntondo.”

⁶A bagabīji nabo ūbawīla ū Yoshwa gīkī, “Lībūūchagi ī lisandīko lya būlagane muje nalyo mubatongeele a banhū;” ng'hana būlībūūcha būtongela ū kū būtongi wa banhū.

⁷Hūna ū SEEBA ūng'wīla ū Yoshwa gīkī, “Ī lelo yenīyī nakwandya kūkūgūngūhya ū mu miso ga Baisilaeli bose, bamane gīkī nalī hamò nang'ho gīt'ūmo naalī hamò na Musa.

⁸A bagabīji abo bakalībūūchaga ī lisandīko lya būlagane bawīlage gīkī, ‘Ūlū mulashike a ha minzī ga mongo gwa Yolodani, ingīlagi ū mu mongo ng'wīmīīle mo.’”

⁹Ū Yoshwa ūbawīla a Baisilaeli gīkī, “Egeelagi aha mudegeleke ī mihayo ya ng'wa SEEBA Mulungu wing'we.

¹⁰Nguno hū mukūdeeba gīkī ū Mulungu mpanga alī hamò ning'we, na gīkī akūbapeeja bang'wīngīle gete pye a Bakanaani, na a Bahītī, Bahīvī, Bapelizi, Bagiligashi, Baamooli, na a Bayebusi.

¹¹Mulīlībona ī lisandīko lya būlagane bo ng'wa SEEBA wa sī yose, līkūja līmutongeelile līkashike ū kū mongo gwa Yolodani.

¹²Na lūūlū ī haha solanhyagi banhū kūfuma ū mu ng'anda ikūmi na ibīlī ja Baisilaeli, munhū ūmò būlī lūganda.

¹³A bagabīji abo balībūūkije ī lisandīko lya ng'wa SEEBA, ū SEEBA wa sī yose, ūlū būgakuumya dūhū a minzī ga mongo gwa Yolodani na mhambala jabo, a minzī ga mongo gwenūyo gakūlekaana, ayo galīfuma kū sī ja magūlya gakwīīma, gikīge gītī lūgegu.”

¹⁴Na lūūlū a banhū aho baasambūla ī ng'hambī kwandya lūgendo lwa kūjūkīla mongo gwa Yolodani, a bagabīji abo baalī balībūūkije ī lisandīko lya būlagane būtongela kū būtongi.

¹⁵Ū mongo gwenūyo gūkikalaga gookalile pa gūtaalile, pyī ī likanza lya shikū ja magesa. Alīyo a bagabīji, abo baalī balībūūkije ī lisandīko lya būlagane, aho bashika a ha mongo, ī mhambala jabo aho jagakuumya a minzī ga Yolodani,

¹⁶a minzī ayo gafumaga kū sī ja magūlya gooya ū kūhūūma, gilūndīka ilūndo itaale kūle ū kwīnga a henaho; bbihī na nzengo gwa Adamu, kūīlīīla ipandī liitanagwa Zaletani. A minzī ayo gahūūmaga kūja kū Nyanza ya Alaba (h'ī Nyanza ya Munhu), a gene gūja gete; gūbiza gatīnīka. Na lūūlū a banhū būbīta hasī nyūūmu, h'ipandī lyilolile nū nzengo gwa Yeliko.

¹⁷A bagabīji abo baalī balībūūkije ī lisandīko lya būlagane o ng'wa SEEBA bīmīīla hasī nyūūmu a ha gatī gatī ya mongo gwa Yolodani, ū kūnū a Baisilaeli bakūbītaga, kūshisha pyī ī lihanga lyūgūkīla ū mongo gwa Yolodani.