Read Sukuma Bible 2015 – Bibilia Ilagano Lya Kale 2015 Yoshwa 5 Bible Online

Yoshwa 5 - Sukuma Bible 2015 – Bibilia Ilagano Lya Kale 2015 bible

Yoshwa 5

¹Na lūūlū pye a batemi ba Baamooli a ba kū nkīlo gwa ng'weli ya mongo gwa Yolodani, na a batemi ba Bakanaani a bose abo baalī kū ng'hilimva ya nyanza aho bigwa gīkī ū SEEBA wagūkamije ū mongo gwa Yolodani kūlwa nguno ya Baisilaeli, kūshisha tūūkīla pye a bose, ī ng'holò jabo jikahaahūka, būgayiwa gete ī nguzu ja kūmanhya na a Baisilaeli.

²Hūna ū ng'wikanza lyenīlo ū SEEBA ūng'wīla ū Yoshwa gīkī, “Beejaga shū ja mawe madiimu, ūbasaale hangī a Baisilaeli.”

³Na ng'hana ū Yoshwa ūbeeja shū ja mawe madiimu, ūūkabasaalīla a Baisilaeli Gibeati-haalaloti.[4]

⁴Ū Yoshwa akabasaala kūlwa nguno ya gīkī, pye abo baalī bafuma mu sī ya Misili, a bagosha ba myaka ya kūdūla kūja kū būlūgū, bakachīla ng'witogolo aho balī mu nzīla balīfuma ī Misili.

⁵Pye a banhū abo baalī bafuma Misili baalī baasaalwa; alīyo pye abo bakabyalīlwa ng'witogolo mu lūgendo lwa kūfuma Misili, a bene batasaalilwe.

⁶A Baisilaeli baalī baamal'ikanza lya myaka makūmi anè bakūyūnga yūngaga ū ng'witogolo, kūshisha pye a banhū abo baalī bashikile kūja kū būlūgū būshila kūcha aho balīfuma Misili; nguno baalī batang'wigwile ū SEEBA. Na lūūlū ū SEEBA walī wabilahīlīla gīkī batūdūla ū kwībona ī sī īyo walī wabisagīja bakūlūgenji babo mu kwilahīla, gīkī akūtwinha; ī sī ya būhondo ī ya kūsūlūlūka būkī na mabeele.

⁷Hūna ū SEEBA ūbagūngūmūla bitūnja babo a ha ng'wanya gwabo; a benaba hū bene abo Yoshwa akabasaala. Baalī bataalī ū kūsaalwa, nguno baalī batasaalilwe ū mu nzīla.

⁸Hūna ī lihanga ī lyose aho lyamala kūsaalwa, bikala ha ng'hambī henaho, kūshisha būpīla.

⁹Hūna ū SEEBA ūng'wila ū Yoshwa gīkī, “Ī lelo yenīyī nīpilingītījaga kūle ī minala ya Misili yang'wīngīlaga a bing'we.” Na lūūlū ī lipandī lyenīlo litanwa Giligaali[5] kūshisha lelo īyī.

¹⁰Lwahayūshika ū lūshikū lw'ikūmi na inè lwa ng'weji, a Baisilaeli būlya Pasaka aho balī a ha ng'hambī ya Giligaali yenīyo, ū mu mbūga ya Yeliko.

¹¹Ha ntondo ya lūshikū lwa Pasaka, ū lūshikū lwenūlo, būlya matwajo gamò na gamò ga mu sī yenīyo; migatī ītī na shibimbya, hamò na shilīwa sha būkalange.

¹²Hūna ī eemanu yooya ū kwilonga kwīngīīla ha ntondo yaho, a ha ntondo ya lūshikū lwa kūshilya ī shilwa sha mu sī yenīyo. Kwīngīīla ikanza lyenīlo a Baisilaeli bataliile eemanu hangī, kwike ū ng'waka gwenūyo būlya sha kūfuma mu matwajo ga mu sī ya Kanaani.

¹³Aho balī bbihī na Yeliko, ū Yoshwa wahayūbūūcha a miso, ūmona ngosha īmīīlile kū būtongi wakwe, walī na līlūshū mu nkono gwakwe līsopoolilwe ū mu shilaalo shalyo. Ū Yoshwa ūng'wegeela ūmūūja, “Ū bebe ūlī kū lwande lwise, nūūlū lwa banishi?”

¹⁴Nang'hwe ūhaya, “Yaya ītī gīko; ū nene hū nalī ntaale wa mabità ga ng'wa SEEBA, nashika lūūlū ī haha.” A henaho ū Yoshwa ūgwa hasī achimīgīje kūlwa kūnkūja; ūmūūja, “Ū SEEBA alī na mhayo kī gwa kūng'wīla ū ntūmami wakwe?”

¹⁵Ū ntaale wa mabità ga ng'wa SEEBA ūnshokeja, “Zuulaga ī shilatū shako, nguno a hipaandī īlo wīmīīlaga halī heela.” Ū Yoshwa wīta chene.