Read Sukuma Bible 2015 – Bibilia Ilagano Lya Kale 2015 Yoshwa 6 Bible Online

Yoshwa 6 - Sukuma Bible 2015 – Bibilia Ilagano Lya Kale 2015 bible

Yoshwa 6

¹Na lūūlū ū nzengo gwa Yeliko gūkayikala gūlugalilwe nde nde nde, kūlwa nguno ya Baisilaeli. Walī atīho wa kūfuma mo nūūlū wa kwingīla mo.

²Hūna ū SEEBA ūng'wīla ū Yoshwa, “Managa gīkī ū nzengo gwa Yeliko nagūtūūlaga mu nkono gwako, hamò nū ntemi, pyī na bashilikale baago.

³Ū bebe hamò na a bashilikale bako pye a bose mukūshimīza mukūgwipīndīīlaga kamò būlī lūshikū, kūshisha shikū itandatū.

⁴Tūūlaga ho bagabīji mpungatī baakūja ū kū būtongi w'isandīko, babūkije mhembe ja mapembe ga ng'ondi. Ū mu lūshikū lwa mpungatī mukūgwipīndīīla ū nzengo ng'hangala mpungatī, kūnū a bagabīji bakūjilījaga ī mhembe jabo.

⁵Ūlū ng'wigwa ī lilaka lya mhembe lyalīlīla higūlya no no no mu kūjangīīla ikanza ilīhu, pye a banhū bahoolanīje kūhamuka n'ilaka lya higūlya no no no nabo; a henaho ī ndugu ya nzengo gwenūyo īkūhilimikīla īgwe hasī. Haho na haho a banhū bakūlinha kūja ū mu nzengo; būlī ng'wene akūpeela ajile mo.”

⁶Hūna ū Yoshwa ū ng'witūnja bo ng'wa Nuni ūbitana a bagabīji; ūbawīla, “Līsolagi ī lisandīko lya būlagane o ng'wa SEEBA, bigele na bagabīji mpungatī baakūja ū kū būtongi walyo babūkije mhembe.”

⁷Hanuma ya henaho ūbawīla a banhū gīkī, “Andyagi ī haha yenīyī, muje mukūgwipīndīīlaga ū nzengo; abo babūūkije shilanga batongele ū kū būtongi w'isandīko lya ng'wa SEEBA.”

⁸Ū Yoshwa aho wamala kūlūngalūnga nabo a banhū, a bagabīji abo mpungatī a baakūja babūūkije mhembe kū būtongi bo ng'wa SEEBA, būbūūka bajile, kūnū bakūjilījaga ī mhembe jabo. Na a babūūcha b'isandīko lya būlagane bo ng'wa SEEBA būlībūūcha, būbakūūbīja.

⁹Ū kū būtongi wa bagabīji abo baafuulaga mhembe baalīko bashilikale na shilanga shabo, nū kū numa y'isandīko baalīko balang'hani na shilanga shabo. Pyī ī likanza lyenīlo ī mhembe jalīlaga.

¹⁰Alīyo ū Yoshwa walī wabawīla a banhū gīkī, “Yaya ū kūyoganya, nūūlū kūfunya ilaka ling'we yaya; mutizūyomba mhayo gose gose, kūshisha lūshike ū lūshikū ūlo nakūmuwīla kūhamuka; a henaho hū mukūhamuka!”

¹¹Hūna ūlagīla lyūbūūchiwa ī lisandīko lya ng'wa SEEBA, būgwipīndīīla ū nzengo kamò; hanuma ya henaho a banhū būshoka kū ng'hambī, būūkifuula kūshisha wela ū būjikū.

¹²Ī ntondo yaho ū Yoshwa ūmisha dilū, a bagabīji nabo būlīsola ī lisandīko lya ng'wa SEEBA.

¹³A bagabīji abo mpungatī a babūūcha mhembe mpungtī, būtongela ū kū būtongi w'isandīko, būja bakūjifuulaga ī mhembe jabo. Ū kū būtongi wabo baalīko a bashilikale ba shilanga, pyī nū kū numa y'isandīko lya ng'wa SEEBA. Pyī ī likanza lyenīlo ī mhembe jalīlaga.

¹⁴Nū mu lūshikū lwa kabīlī būgwipīndīīla ū nzengo kamò, būshoka kū ng'hambi; bakamala shikū itandatū bakwītaga gīko.

¹⁵Ū mu lūshikū lwa mpungatī bakabūūka dilū līīmi līlīfuma, būgwipīndīīla ū nzengo ng'hangala mpungatī, bīīta ūmo bīītīlaga na kale; kwike dūhū ū mu lūshikū lwenūlo būgwipīndīīla ū nzengo ng'hangala mpungatī.

¹⁶Bahayūshisha ū lūkangala lwa mpungatī, a bagabīji būlīja ī mhembe n'ilaka lya higūlya no no no lya kūjangīīla ikanza ilīhu. Nang'hwe ū Yoshwa ūbalagīla a banhū ūhaya, “Hamukagi nguno ū SEEBA wang'winhaga ū nzengo gwenūyū.

¹⁷Pyī ū nzengo na a bikaji baamo a bose, shiigelile gūpemve moto kūbiza shakwinha kūlī SEEBA. Lahabu dūhū, ū malahya h'ūyo akūpīla, na a bose abo balīmo ū mu kaya yakwe. Nguno ū wei akababisa a badati abo twalī twabatūma.

¹⁸Alīyo yaya mutizūgema gete ū kūshikuumya ī shikolo īsho shiigeleelilwe kūpemva mu moto, mutiziyenheleja kūyagaala kūlwa kūsola shose shose ū mu shikolo shenīsho. Ūlū ng'wīta gīko, ī ng'hambi ya Baisilaeli mukwīyenhela saalaala, yigeleelwe kūkenaagūlwa, muyenheleje kūkenaagūka.

¹⁹Ī feza nī zahabu ī jose, nī shikolo sha shaba, pyī nī sha chūūma, ī shenīsho shilī sheela kūlwa ng'wa SEEBA; shikūtūūlwa ng'wibīīkīlo lya sabo jakwe.”

²⁰Hūna lūūlū ī lilaka lya mhembe aho lyalīla, a banhū būhoolanīja n'ilaka lya kūhamukīla higūlya; lyahayūlīla ī lilaka lya mhembe na a banhū būhamuka, ī ndugu yūhilimikīla kūgwa hasī. Haho na haho a banhū būpeela bajile mo, būgūdima ū nzengo.

²¹Ū nzengo gwenūyo būgūpemba moto kūbiza shakwinha kūlī SEEBA, ī shose īsho shaalīmo, īsho shikesheemaga būshibūlaga na līlūshū; pye a banhū, bagosha na bakīma, bado na bataale, ng'ombe, ng'holo pyī nī nzobe.

²²Ū Yoshwa ūbawīla a bagosha a babīlī abo baalī baaja kwīdata ī sī, “Jaagi ū mu numba ya ng'wa malahya mukamfunye hanze na a bose abo balīmo ū mu kaya yakwe, gīt'ūmo mukang'wilahīlīla.”

²³Na ng'hana a basūmba abo baalī baaja ū kwīdata ī sī būja ū mu nzengo būkamfunya ū Lahabu nū ise nū nina, na a baana ba ng'wawe, pye na banhū a bangī abo baalī ba mu kaaaya ya ng'wawe. Būyīfunya pyī ī kaya ya ng'wawe bītūūla h'ipandī ilebe, hanze ya ng'hambī ya Baisilaeli.

²⁴Hūna būgūpemba moto pyī ū nzengo nī shose īsho shalīmo, alīyo ī feza nī zahabu nī shikolo sha shaba, nī sha chūūma būshitūūla ng'wibīīkīlo lya sabo, mu numba ya ng'wa SEEBA.

²⁵Ū Yoshwa ūneka wikala mpanga ū Lahabu ū malaaaya, na a banhū ba mu kaya ya ng'wawe; nguno waalī wababisa a banhū abo walī wabatūma ū Yoshwa kūja kwīdata ī Yeliko. Kūshisha nī lelo īyī akwikalaga hamò na Baisilaeli.

²⁶Hūna ū Yoshwa wilahīla alīhaya gīkī, “Ni azumagwe na SEEBA[6] ū munhū wa kūgūzenga ū nzengo gwenūyū, ū gwa Yeliko, ‘A h'ikanza lya kūgūsīmbīla ū nsingi gwaago, akūchīlwa na ng'witūnja wakwe tangī. Hama a h'ikanza lya akwītūūla ī mibita yaago, akūchīlwa na kwangūlīja wakwe.’”

²⁷Ū SEEBA walī hamò nū Yoshwa; ū lūkumo lwakwe lūsambaala pye a hose ū mu sī yenīyo.