Read Sukuma Bible 2015 – Bibilia Ilagano Lya Kale 2015 2 Batesalonike 1 Bible Online

2 Batesalonike 1 - Sukuma Bible 2015 – Bibilia Ilagano Lya Kale 2015 bible

2 Batesalonike 1

¹Nene Paulo, hamò na Silwano na Timotheo; kū kanisa ya Batesalonike, īyo īlī mulī Mulungu Sīswe na Seeba Yesu Kilisito.

²Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisito.

³Badūgū, shitwigeleelilwe kūnūmba Mulungu būlī gwa kūlwa nguno ying'we. Īlī yawiza twīte gīko nguno ū kūzunya kwing'we kūkūjaga kongeja kūkūla na kūbiza na nguzu; nū būtogwa wing'we ūmo ng'witogelilwe būlī munhū na ng'wiye būkūjaga bongeja kūkwīla.

⁴Nose twabizilikumīlīja ū kū kanisa ja ng'wa Mulungu kūlwa nguno ying'we. Ū gwenūyo tūlīgwīta kūlwa nguno ya wiyūmīlīja na kūzunya kwing'we nūūlū aho mukūluhiagwa na kūkoyiwa.

⁵Ī yenīyī īloolecha hape gīkī ū būlamuji bo ng'wa Mulungu būtūngīlīgije. Hūna lūūlū a bing'we mukūbalwa gīkī ng'wigeleelilwe kūbiza mo ū mu būtemi bo ng'wa Mulungu ūbo būkūng'wenhelejaga kūluha.

⁶Alīyo īkī ū Mulungu alī ntūngīlīja, akūbamalīla shiilī abo bakūmuluhyaga.

⁷Lelo a bing'we abo mukūluhiagwa, akūng'wifuuja hamò nise ū ng'wikanza lya kwiza kwa ng'wa Seeba Yesu, kūfuma ng'wigūlū hamò na bamalaika bakwe ba būdūla.

⁸Akwiza mu ndali ja moto abinhe nsango abo bataamanile Mulungu, na a babo batatogilwe kūjanukūla ī Ng'hūlū Jawiza ja ng'wa Seeba wise Yesu.

⁹Bakwinhwa nsango gwa kūyagala welelo bose, bīnjiwe gete ū kū būtongi bo ng'wa Seeba, nū ng'wikūjo lya būdūla bokwe.

¹⁰Ū ng'wikanza lya kwiza kwakwe lyenīlo, a beela bakwe bakūnkumīlīja, nīyo pye a bazunya bakūnyegela; na a bing'we mukūbiza mo, nguno mubūzunije ū būkaanīji wise ūbo tūkang'winha.

¹¹Ū mu mhayo gwenūyū tūkūmulombelaga gwa, gīkī ū Mulungu wise amubale kūbiza ng'wigeleelilwe ū kūbiza mo ū mu witanwa, na gīkī ū mu būdūla bokwe amushikīlīgīje būlī mhayo gose, ūyo gūlī gwawiza mu katūmamīle ka kūzunya kwing'we.

¹²Ū mu gīko ī lina lya ng'wa Seeba wise Yesu līkūkumīlījiwa ū mu bing'we, na a bing'we ū mulī wei, gīt'ūmo shilī shigongo sha ng'wa Mulungu wise na Seeba Yesu Kilisito.