Read Sukuma Bible 2015 – Bibilia Ilagano Lya Kale 2015 1 Timoteo 3 Bible Online

1 Timoteo 3 - Sukuma Bible 2015 – Bibilia Ilagano Lya Kale 2015 bible

1 Timoteo 3

¹Ūlū munhū ūkalalwa nīmo gwa būlang'hani bo kanisa,[1] akūbiza wikūmbagwa nīmo gwawiza; ū mhayo gwenūyū gūlī gwa kūsanyiwa.

²Hūna lūūlū shing'wigelile ū nang'hani wa kanisa abize atī na shilingo, abize ngoshi wa nkīma ūmò, ng'wilang'hani, ng'witegeleja, ngaliili na ng'wiza ng'holò, hangī amanile kūlanga.

³Atizūbiza nkolwa wa shikoji nūūlū ntūji wa banhū, alīyo abize ng'wiyūmīlīja, atī nyombo, atī ng'wikūmvi wa sabo.

⁴Abize amanile kūsuga kaya yakwe, a baana bakwe babize bidohya, hangī banhū b'ikūjo.

⁵(Ūlū munhū atamanile kūsuga kaya yakwe wei ng'wenekīlī, akūdūla ginehe ū kwīsuga ī kanisa ya ng'wa Mulungu?)

⁶Atizūbiza mpya ū mu kūzunya, nguno adūgije kūdoosa agwe mu nsango go ng'wa Shetani.

⁷Na hangī shing'wigeleelilwe abize akūkaanīlagwa chiza na a banhū abo balī hanze ya kūzunya, atizūbiza wa kūyūsaayīlwa mihayo, nguno akwitulwa wagwashiwa na lūtu lwa ng'wanishi.

⁸Na a bagunanhi nabo shibigelile babize banhū abo bigeleelilwe ikūjo, batī na magalū galū, batizūbiza bakolwa walwa, nūūlū batizūbiza bayegelile sabo ja būnyeecha.

⁹Babize bagūdimile ū mhayo gwa mbisīla ya kūzunya mung'holò neela.

¹⁰Nabo a benaba shibigelile bayūgeng'wa tame; ūlū būbonekana batī na shilingo, bagūtūmame ū nīmo gwa būgunanhi.

¹¹Na a bake babo[2] gīko; nabo babize bigeleelilwe ikūjo, batī basong'hanya, babize balembeezu na bishigwa mu yose.

¹²Būlī ngunanhi īng'wigeleelilwe kūbiza atoolile nkīma ūmò, na būlī ng'wene abize amanile kūbalang'hana chiza a baana bakwe, pyī nī kaya yakwe.

¹³Nguno a bagunanhi bawiza bakapandīkaga isumbī lyawiza, hama bakigalīhījaga ū mu mhayo gwa kūnzunya Kilisito Yesu.

¹⁴Ī mihayo yenīyī nalīkwandīkīla, nūūlū īkī nalisagīlwa kwiza wangū ū kūlī bebe.

¹⁵Natogilwe gīkī nūūlū nūdīla ū kwiza, wikale ūmanile ūmo shiigelile kūshimīzīla ū mu numba ya ng'wa Mulungu, ī kanisa ya ng'wa Mulungu mpanga, īyo īlī ng'hīngī na shiganga sha būtūngīlīja.

¹⁶Ī mbisīla ya logohano kūlī Mulungu īlī nhaale no, a henaho ītīho halalī. Akabonekana mu mīlī, oolechiwa na Moyo gīkī alī ntūngīlīja, wiloleelwa na bamalaika; ūkumūchiwa kū mahanga, wanukūlwa mu sī, hama ūtwalwa kwigūlya ng'wikūjo.