Read Sukuma Bible 2015 – Bibilia Ilagano Lya Kale 2015 Tito 1 Bible Online

Tito 1 - Sukuma Bible 2015 – Bibilia Ilagano Lya Kale 2015 bible

Tito 1

¹Nene Paulo nsese o ng'wa Mulungu, na ntūng'wa o ng'wa Yesu Kilisito, kūlwa kūbagunanha basolwa ba ng'wa Mulungu mu kūzunya kwabo; bayitegeleje ī ng'hana īyo yigwīndanije na wela,

²kūlwa nguno ya kwisagīlwa kwa būpanga wa shiku jose, ūbo Mulungu, ūyo atīko kūlomaloma, watwisagīja kūfuma kale, kūko ikanza lītaalī kwandya kūbiza ho.

³Hūna aho lyang'wa ī likanza ūgoolecha ū mhayo gokwe mu nzīla ya būlomeeji ūbo nakinhwa nene gīt'ūmo shilī shilagīlo sha ng'wa Mulungu mpīja wise.

⁴Kūlī Tito, ng'wana wane gete mu būsangī wa kūzunya; shigongo na mhola shibize hamò nang'ho kūfuma kūlī Mulungu Sīswe, na kūlī Seeba Yesu Kilisito Mpīja wise.

⁵Nakakūleka ko ī Kilete gīkī wīgolanye ī milīmo īyo yigelile kwītwa, na gīkī ūyūtūūla banamhala mu būlī nzengo gīt'ūmo nakakūtongeelela.

⁶Ūyo igeleelilwe kūtūūlwa ha būnamhala abize atī na shilingo, atoolile nkīma ūmò. A baana bakwe babize bazunya, na batī na lūkumo lwa būlūūlū, nūūlū būlambu.

⁷Nguno ū nang'hani wa kanisa ng'wene mīkījiwa o ng'wa Mulungu, hūna lūūlū shing'wigelile abize atī na shilingo, atī wa kwiyeja wei ng'wenekīlī dūhū. Atī ng'wangū kūpelana, atī nkolwa walwa, atī ntūji banhū, nūūlū atī nchooji wa shikolo mu nzīla ja minala.

⁸Alīyo abize ng'wiza ng'holò, munhū ūyo atogilwe mihayo yawiza, ng'witegeleja, ntūngīlīja, ng'wela, ng'wilang'hani.

⁹Abize agūdimile mu wishigwa ū mhayo ūmo gūhayīlile; ū mu gīko h'akūdūla kūganikīla mu kalangīle kawiza, na kūbahuumūja a bahalalī.

¹⁰Nguno balīho bingī a bashitiigwa, bayombi ba mihayo ītī mu nzīla, na balomolomo ba balomolomo; ī no no no a ba ng'wigele lya basaalwa.

¹¹Shiigelile bayūhuumūjiwa a benabo, nguno bakūhūmbūūlaga kaya ngima ja banhū, kūlwa kūlanga mihayo ya kwipandīkīla solobo mu nzīla ja minala, mhayo ūyo gūtigelile bagwīte.

¹²Ūmò wa bahangi babo ahayile gīkī, “A bana Kilete bene balomolomo pyī ī shikū, shiinū ja malofu, balaku ba balaku, nīyo hangī boolo!”

¹³Ū būkaanīji wenūbū būtūngīlīgije. Hūna lūūlū bahamage na būkalī bagoloole ū kūzunya kwabo.

¹⁴Booye ū kwikala būdegeleka ngano ja Bayudaya, na shilagīlo sha banhū abo bakwīhūbyaga ī ng'hana.

¹⁵Pye ī shikolo shilī sheela ū kū beela, alīyo ū kū basoso na bashitiigwa shitīho ī sheela, nguno a maganiko gabo masoso, pyī nū wiyangūji wa mung'holò jabo.

¹⁶A banhū gītī benaba batogilwe ū kwihaya gīkī bandeebile ū Mulungu, alīyo ū mu shītīle shabo banemile. Banhū ba malofu na bashitiigwa, nīyo batigeleelilwe mu nīmo gose gose ū gwawiza!