Read Sukuma Bible 2015 – Bibilia Ilagano Lya Kale 2015 Filimoni 1 Bible Online

Filimoni 1 - Sukuma Bible 2015 – Bibilia Ilagano Lya Kale 2015 bible

Filimoni 1

¹Nene Paulo ntungwa kūlwa ng'wa Kilisito Yesu, na ndūgū Timotheo. Kūlī ntūmami ng'wichiswi ntogwa Filimoni,

²n'ilūmbū lise Afia, hamò na nshilikale ng'wichiswi Alikipo; nī kanisa īyo īkibilingaga mu kaya yako.

³Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisito.

⁴Nakūnūmbaga ū Mulungu wane, būl'ikanza ūlū nalīkūhaya ū mu kūlomba kwane.

⁵Nguno nakūjiigwaga ī ng'hūlū ja kūzunya kwako, nū būtogwa wako ūmo ūntogelilwe ū Seeba Yesu, na a beela pye a bose.

⁶Na lūūlū nalīkūlomba ū būzunya wako ūbūtūmamīle mu būsangī, hūna ūkwīdeeba mu ng'hana pyī ī yawiza īyo īlī yise mulī Kilisito.

⁷Naayegile no, hangī naalūngūjiwe no ndūgū wane, kūlwa būtogwa wako; nguno ojizalabanije īng'holò ja beela.

⁸Hūna lūūlū, nūūlū īkī ū mulī Kilisito nalī nabo ū būgimu bo kūkūlagīla īyo yigelile wīyīte,

⁹alīyo īlī yawiza nakūlombe, kūlwa nguno ya būtogwa. Ū nene Paulo na būnamhala bone gīkī, ūyo ī haha nalī ntungwa kūlwa ng'wa Kilisito Yesu.

¹⁰Nalīkūlomba kūlwa nguno ya ng'wa Onesimo, ū ng'wana wane mulī Kilisito; ūyo naamyalile mu būtungwa bone.

¹¹Na ng'hana walī atī na solobo ū kūlī bebe ī kwandya; alīyo ī haha alī na solobo ū kūlī bebe nū kūlī nene.

¹²Ū munhū ng'wenūyo nūūlū īkī nalīkūshokeja; alīyo ī chene ū wei alī būpanga bone gete.

¹³Nīyo naalī natogilwe kwikala nang'hwe nene, ayūnigunanha ha ng'wanya gwako ū mu nīmo gwa Ng'hūlū Jawiza, aho nataalī natungilwe.

¹⁴Kwike naabonile ītī chiza nīīte mhayo gose gose aho nataalī kūgamana a maganiko gako; ūtizīīta mhayo gwawiza mu būhadīkījiwa, alīyo wīte mu kwifunya.

¹⁵Nguno hamo h'ī chene akakwīngīla ng'wikanza iguhī, gīkī abize wako shikū jose ja shiku jose;

¹⁶alīyo ītī mu būsese. Ī haha akīlile a ha būsese; ū kūlī nene alī ndūgū ntogwa, lelo ū kūlī bebe na kūtinda ho, ū mu mīlī nū mulī Seeba!

¹⁷Hūna lūūlū, ūlū ūlīnisanya gīkī nalī ntūmami ng'wiyo, ng'wanukūlage gītī ūlīnanukūla nene.

¹⁸Hama nūūlū wakūhūba mhayo gose gose, nūūlū hamo alī na būgasa kūlī bebe, būbalīlage kūlī nene.

¹⁹Nene Paulo nandīka na nkono gwane ng'wenekīlī gīkī nakūlīpa, natī na nguno ya kūhaya gīkī ū bebe hū ūlī na būgasa ū kūlī nene.

²⁰Alichene ndūgū wane, nigunanhage mu gīko ū mulī Seeba, ūbūyeje mulī Kilisito ū būpanga bone.

²¹Nalīkwandīkīla mu kūsanya gīkī ūkwīta na kūtinda ūmo nalīkūwīlīla, nguno nabūmanile ū wigwi boko.

²²Hama nīyo nalisagīlwa nakūshoshiwa kū bing'we kūlwa kūlomba kwing'we; ali lūūlū, nilonja longejage na ha kūshikīla.

²³Ū Epafra ū ntungwa ng'wichane mulī Kilisito Yesu alīkūgīsha,

²⁴na a batūmami bichane a ba Maliko nū Alisitako nū Dema, hamò nū Luka, nabo balīkūgīsha.

²⁵Shigongo sha ng'wa Seeba Yesu Kilisito shibize hamò na moyo gwako: Alichene.