Read Sukuma Bible 2015 – Bibilia Ilagano Lya Kale 2015 Bahebulania 1 Bible Online

Bahebulania 1 - Sukuma Bible 2015 – Bibilia Ilagano Lya Kale 2015 bible

Bahebulania 1

¹Ī kale ū Mulungu walūngalūngaga nabo a bakūlūgenji bise ng'hangala ningī mu nzīla ja mbika na mbika, kūbītīla mu bahangi.

²Alīyo ū mu shikū ja kū būkalīkījo īji, walūngalūngile nise mu nzīla ya Ng'wana, ūyo antūūlile kūbiza ng'wingīji wa shikolo shose; nīyo ī shiseeng'wa shose pye akashibeeja mu nzīla yakwe ū ng'wenūyo.

³Ū wei alī kwaaka kw'ikūjo lya ng'wa Mulungu, na suso yakwe ūmo alī gete; hama pyī ī shikolo ashidimile na mhayo gwa būdūla bokwe. Aho wamala kūtūūla nzīla ya kweja shibi, wigasha kū nkono gwa būlyo; kwikūjo lya būsugi bo ng'wigūlū.

⁴Hū ng'wene ū ntaale kūkīla pye a bamalaika, nguno ū wei alī ng'wingīji wa lina itaale kūtinda lyabo.

⁵Ū gīsī ū Mulungu wabīta kūng'wīla malaika kī gīkī, “Ū bebe ūlī Ng'wana wane, Ī lelo īyī naakūbyalaga?” Nūūlū hangī gīkī, “Ū nene nakūbiza Ise; ū wei akūbiza Ng'wana wane?”

⁶Na a haho wang'wenha mu sī ū Myalwa wa kwandya ūhaya gīkī, “Pye a bamalaika ba ng'wa Mulungu banamye wei.”

⁷Lelo ū kū bamalaika alīhaya, “Hū ng'wene akīītaga bamalaika bakwe kūbiza myoyo, a batūmami bakwe kūbiza ndali ja moto.”

⁸Alīyo ū kūlī Ng'wana alīhaya gīkī, “Ū lisumbī lyako lya būtemi Mulungu, līl'isumbī lya welelo bose; nū nang'ha gwako gwa būtemi gūlī nang'ha gwa būtūngīlīja.

⁹Ee Mulungu, ū būtūngīlīja ūbūtogilwe, alīyo ū būshitiigwa ūbūkolilwe; h'ī nguno yene ū Mulungu wako wakūbilile maguta ga būyegi kūtinda a biyo.”

¹⁰Alīhaya na gīkī, “Seeba a ha wandījo wa yose ūkagūtūūla bebe ū nsingi gwa sī, nī ligūlū līlī nīmo gwa makono gako.

¹¹Ū shenīshi shikūbīta, alīyo ū bebe ūlī wa kūshinga ho; Ī shingī pyī shikūkūlūhala gītī shizwalo.

¹²Nīyo ūkūshilingalinga gītī myenda, na shikūgalūchiwa gītī shizwalo. Alīyo ū bebe ūlī gīt'ūmo ūlī dūhū, nī myaka yako ītī ya kūshila.”

¹³Na hangī ong'wīla malaika kī ikanza lyose lyose gīkī, “Igashaga kū nkono gwane gwa būlyo, kūshisha nabatūūle a banishi bako ha sīlīlī ya mhambala jako?”

¹⁴Angū, a bamalaika a bose batī myoyo mitūmami, īyo īkatūmagwa kūlwa nguno ya babo bakūbiza bingīji ū mu būpīji?