Read Sukuma Bible 2015 – Bibilia Ilagano Lya Kale 2015 Bahebulania 11 Bible Online

Bahebulania 11 - Sukuma Bible 2015 – Bibilia Ilagano Lya Kale 2015 bible

Bahebulania 11

¹Ali lūūlū, ū kūzunya kūlī kūbūsanya ū būng'hana bo mihayo īyo tūkwīyisagīlagwa, kūmana gete gīkī īlīho, nūūlū aho tūtaalī ū kwībona.

²Nguno a bataale hū bakaanīlilwe mu mhayo gwenūyo.

³Kūlwa kūzunya tūmanile gīkī pyī ī shiseeng'wa shikabeejiwa mu nzīla ya mhayo go ng'wa Mulungu, hū kūhaya ī shikolo īsho shikūbonagwa shitafumile mu shikolo sha kūbonwa.

⁴Kūlwa kūzunya ū Abeli akamfunīja shitambo shawiza ū Mulungu, kūtinda īsho akafunya Kaini, ū mu mhayo gwenūyo ūkaanīlwa kūbiza ntūngīlīja, nguno ū Mulungu ng'wenekīlī akashikaanīla ī shakwinha shakwe. Hūna lūūlū, ū mu mhayo gwenūyo ū Abeli ataalī akūlūngalūngaga, nūūlū īkī wamala kūcha.

⁵Kūlwa kūzunya ū Enoka akīnjiwa atabītile mu kūcha. Atilongile nguno ū Mulungu akang'wīnja, īkī aho ataalī kwīnjiwa wakaanīlagwa gīkī walī anyegije ū Mulungu.

⁶Alīyo ūlū ītī mu kūzunya, ītūdūlīkana ū kūnyeja ū Mulungu. Na lūūlū abo batogilwe kwiza kūlī we, shibigelile kūzunya gīkī alīho, na gīkī akabinhaga mheela abo bakankoobaga.

⁷Kūlwa kūzunya ū Noa akabeeja ngalaba nguno akahūgūlwa na Mulungu, nūūlū īkī ī mihayo īyo akawīlwa yalī ītabonekanaga; wīpīja ī kaya yakwe nguno walī na logohano. Ūbiza wingīla mu būtūngīlīja kūlwa kūzunya, alīyo ī sī ūyenheleja kūgwisījiwa nsango.

⁸Kūlwa kūzunya ū Abulahamu aho wawīlwa kūja kwipandī īlo alanukūle kūbiza wingīji bokwe, akazunya ūja nūūlū īkī walī atamanile ūko wajaga.

⁹Kūlwa kūzunya aho alī ū mu sī ya kwisagījiwa yenīyo walī gītī nshimīzi; wikalaga mu maheema, pye nū Isaka nū Yakobo, abo nabo baalī bingīji ū mu wisagījiwa wenūbo.

¹⁰Nguno walī agwisagīlilwe ū nzengo ūyo gūlī na misingi; ūyo meeja na nzengi wago alī Mulungu ng'wenekīlī.

¹¹Kūlwa kūzunya nū Saala nang'hwe īkī akansanya ūyo akabisagījaga, akapandīka būdūla bo kūbūūcha nda, nūūlū īkī a makanza gakwe gaalī gamala kūbīta.

¹²Hūna lūūlū ū kūfuma ū mulī munhū ūmò ng'wenūyo, ūyo nīyo walī sumva na mfu, wilonga būhī na būhī bo banhū, ū wingī wabo gītī sonda ja ng'wigūlū, nūūlū gītī maseni ga ha nyanza.

¹³Pye a bose benaba bakachīla mu kūzunya, ī shikolo īsho baalī bisagījiwa bashiloleelaga bū kūle būyūshiyegela. Alīyo būūcha bataalī ū kūshanukūla, būbiza bakaanīji gīkī baalī bageni na bashimīzi ū mu sī.

¹⁴Abo bakahayaga mihayo īlī gīko, bakoolechaga hape gīkī balī bachooji ba sī yabo ya wikomangīle.

¹⁵Nguno ūlū ni bikale bakūgwiganikaga ū nzengo ūyo baalī bafuma, nose ni bapandīke ng'wanya gwa kūshoka ko.

¹⁶Alīyo bakasangwa balī na ng'hūmbū ja kūbiza mu nzengo gwawiza kūtinda, h'ū ng'wigūlū; h'ī nguno yene ū Mulungu atī na minala ū kwitanwa gīkī alī Mulungu wabo, nguno wamala kūbalonja longeja nzengo.

¹⁷Kūlwa kūzunya, ū Abulahamu akamfunya ū Isaka aho wageng'wa; ū wei ūyo walī winhwa wisagījiwa, ūzunya kūmfunya ū ng'wana wakwe ūyo walī ūmò dūhū ng'wenūyo, gīkī abize shitambo;

¹⁸nūūlū īkī walī wawīlwa gīkī, “Ū būbyīle wako būkwitanīlwa mulī Isaka.”

¹⁹Akabala gīkī ū Mulungu adūgije kunhimbula kūfuma mu bafu; na ng'hana ūbiza gītī wang'wanukūla kūfuma mu bafu.

²⁰Kūlwa kūzunya, ū Isaka nang'hwe ūbafuuha a ba Yakobo nū Esau, akūbalombelaga lubango kūlwa mihayo ya shikū ja kū būtongi.

²¹Kūlwa kūzunya, ū Yakobo aho wegeela kūcha akamfuuha būlī ng'witūnja o ng'wa Yosefu, kūnū alīlamya widimīlījaga ha nang'ha gwakwe.

²²Kūlwa kūzunya, ū Yosefu aho wegeela kūcha akabizūkīja a Baisilaeli ī mihayo ya kwīnga mu Misili, ūbalagīla nī mihayo ya maguha gakwe.

²³Kūlwa kūzunya, a babyaji ba ng'wa Musa aho wabyalwa, bakamisa ikanza lya myeji idatū, nguno bakamona gīkī walī ng'wana wawiza; būleka ū kūshogoha ī shilagīlo sha ntemi.

²⁴Kūlwa kūzunya, ū Musa aho wakūla ūlema ū kwitanwa gīkī ng'witūnja wa nshīke wa ng'wa Falao.

²⁵Ūbona īlī hambū hambū kūluhiwa hamò na banhū ba ng'wa Mulungu, kūtinda kūyegela mu shibi ng'wikanza iguhī.

²⁶Nguno akabona gīkī, ū būsondagūlwa bo ng'wa Kilisito būlī sabo nhaale kūtinda būsabi wa mu Misili, īkī walī waloleela mheela ū kū būtongi.

²⁷Akīnga ī Misili kūlwa kūzunya, ūleka ū kūbogoha ū būpelanu wa ntemi; wiyūmīlīja nguno walī wamona ūyo atabonagwa.

²⁸Kūlwa kūzunya, akabeeja pasaka ūseeseebela na mininga, gīkī ū nyagaja wa babyalwa ba kwandya atizūbakuumya a babo.

²⁹Kūlwa kūzunya bakabīta ū mu Nyanza ī Yaza balīshimīza, gītī balī ha sī nyūmu; aho bihamba a Bamisili yūbamila.

³⁰Kūlwa kūzunya, ī ndugu ja Yeliko bakajipīndīīla ikanza lya shikū mpungatī, jūgwa.

³¹Kūlwa kūzunya, ū malahya ū Lahabu atayagalile hamò nabo a bashitiigwa, nguno akabanukūla mu mhola a badati.

³²Ī gīsī nahaye mhayo kī hangī? Nguno lītūniigelaga ī likanza lya kūbahaya banhū gītī: Gidioni, Balaka, Samusoni, Yefuta, Daūdi, Sang'weli; pye na a bahangi,

³³abo kūlwa kūzunya baalī bapyeni, būyūpyena mabūtemi na kūbeeja ya būtūngīlīja, banukūla īyo baalī bisagījiwa. Hangī būbiza na būdūla bo kūyūkundīkīja na milomo ya shimba,

³⁴na kūjimya būsebu wa moto; būyūpūlūgūka na kūbūlagwa bo malūshū. Bangī būyūguzuhiwa kūfuma mu būgokolo, bapandīka būdūla bo kūheeba mabita ga banishi mu būlūgū.

³⁵Na bakīma babīta kwanukūla bafu babo, abo bakayūjūūchiwa. Bangī batūlagwa kūshisha kūbūlagwa, alīyo ū gwa kūlekejiwa baalī bagūlemile, nguno baalī bamanile gīkī bakwanukūla būjūūko būsoga kūtinda.

³⁶Bangī bagwaga mu būgeng'wa būtaale no bo kwineenelegejiwa na kūtūlwa, hamò na kūyūtungwa baponyiwa mu jeela.

³⁷Bangī bapondagwa mawe, na bangī bakeleshiagwa na misumeno; bingī baacha bo līlūshū. Bangī ū mu kūpeela kwabo bajaga bakūyūngaga hose hose, bazwalile ndīlī ja ng'holo na ja mbūli. Baalī mu būgayiwa na būluhiwa būtaale no; īyo bīītīlagwa yalī yabūbi no!

³⁸Ū sī yababonaga gīkī batī na ngofyoolo nūūlū hado; bajaga bakūyūngaga mu matogolo, na kwisweng'ha mu mahalo ga mu ngūlū na mu myobo ya ha sī!

³⁹Pye a benaba bakaanīlilwe chiza ū mu kūzunya kwabo, alīyo batawanukūlile ū wisagījiwa.

⁴⁰Nguno ū Mulungu walī atūbīkīlile a bise mhayo gwawiza no; ībize gīkī ū būshikanyiwa wabo būjīlanīje nū wise.