Read Sukuma Bible 2015 – Bibilia Ilagano Lya Kale 2015 Bahebulania 4 Bible Online

Bahebulania 4 - Sukuma Bible 2015 – Bibilia Ilagano Lya Kale 2015 bible

Bahebulania 4

¹Nose īkī ū wisagījiwa bo kwifuula būtaalī būlīho, togohagi atizilonga nūūlū ūmò wing'we wa kūleba ū kwingīla mo.

²Nguno na a bise tūkūlomeelagwa ī Ng'hūlū Jawiza gīt'ūmo yajīlaga nū kūbo; kwike ū mhayo ūyo bakagwigwa gūtabagunanhile, nguno gūtamanhije na kūzunya ū mubo a badegeleki.

³Alīyo a bise abo tūzunije tūlīmo ū mu kwifuula, gīt'ūmo ahayīlile; gīkī, “Kūshisha nakilahīla kūlwa būpelanu bone nūhaya, ‘Batīko kwingīla ū mu kwifuula kwane.’” Ū milīmo ī yene yamala majiwa kūfuma kale ha kūseeng'wa kwa sī.

⁴Nguno līlīho ipandī ilebe alīlūhaya lūshikū lwa mpungatī gīkī, “Hūna ū mu lūshikū lwa mpungatī ū Mulungu akifuula pyī ī milīmo yakwe.”

⁵Alīyo hangī na a henaha alīhaya gīkī, “Batīko kwingīla ū mu kwifuula kwane!”

⁶Hū kūhaya ītaalī īdūlīkanile bamò na bamò kwingīla moi, nūūlū īkī abo bakalomeelwa ī kale bakaduuma ū kwingīla kūlwa būshitiigwa wabo.

⁷H'ī chene atūūlile lūshikū lūngī hangī ūlo alīlūhaya gīkī, “Lelo,” gīt'ūmo akahayīla mulī Daūdi ha numa ya kūbīta ikanza ilīhu. Ūmo ahayīlile kūfuma kale gīkī, “Ū lelo ūlū muliigwe ilaka lyakwe, yaya ū kūgang'hanaja īng'holò jing'we.”

⁸Nguno ū Yoshwa ūlū ni wabifuuja, ū Mulungu ni atahayile mihayo ya lūshikū lūngī hangī a ha numa ya henaho.

⁹Hū kūhaya ītaalī ho sabato ya kwifuula kūlwa banhū ba ng'wa Mulungu.

¹⁰Nguno ūyo alingīle mu kwifuula kwa ng'wa Mulungu nang'hwe akwifuula ū mu milīmo yakwe.

¹¹Hūna lūūlū tūdīlīlagi, nise twingīle ū mu kwifuula kwenūko; atizilonga wa kūgwa gīt'ūmo bakīītīla kūlwa nguno ya būshitiigwa.

¹²Ū mhayo go ng'wa Mulungu gūlī mpanga, na gūlī na būdūla; hangī ng'ūgī kūtinda līlūshū lyose lyose, nūūlū līkabiza lya būūgī būbīlī. Gūkachimaga gwingīla mu gatī kūshisha kūlekanya ng'holò na moyo, nūūlū būlūngīlo na mhongo; hama gūdūgije kūgamana a maganiko nū kwikūmva kwa mu ng'holò.

¹³Nīyo shitīho shiseeng'wa nūūlū shimò īsho shiibisile ū kū būtongi bokwe, ī shose shilī ng'waje; shiitendile ha ng'wape ū kūlī we, ūyo shiigelile twibūūle kū būtongi bokwe mu yose ī ya kikalīle kise!

¹⁴Hūna lūūlū īkī tūlī na Ngabīji Ntaale, ū Yesu Ng'wana wa ng'wa Mulungu, ūyo wamala kwingīla ng'wigūlū, tūbūhandatīlagi ū būkaanīji wise.

¹⁵Nguno tūtī na Ngabīji Ntaale ūyo atabūmanile ū būgokolo wise, īkī nang'hwe akageng'wa mu būlī mhayo gīt'ūmo tūkagemelagwa a bise, kwike ū wei atīītile shibi.

¹⁶Nose hū kūhaya tūbizagi bashisha ng'holò, twegeele ū kwisumbī lya būtemi ī lya shigongo, tūkachīlwe shigongo; na kwanukūla nguzu ja kūtūgunanha ng'wikanza lya makoye.