Read Sukuma Bible 2015 – Bibilia Ilagano Lya Kale 2015 Yakobo 1 Bible Online

Yakobo 1 - Sukuma Bible 2015 – Bibilia Ilagano Lya Kale 2015 bible

Yakobo 1

¹Nene Yakobo, nsese wa ng'wa Mulungu na wa ng'wa Seeba Yesu Kilisito, kū ng'anda ikūmi n'ibīlī ījo jisambaalile hose hose: Nalīmugīsha.

²Badūgū bane, ūlū ng'ūgwa mu būgeng'wa bo mbika yose yose, balagi gīkī būyegi ū wenūbo.

³Nguno mumanile gīkī, ū būgeng'wa bo kūzunya kwing'we būkenhaga wiyūmīlīja.

⁴Ū wiyūmīlīja shiigelile būbize na nīmo gwa kūmushikanya, mubize bashikanu na banhū bajaamu, abo batī na būgehelwa mu mhayo gose gose.

⁵Alīyo ūlū ūmò wing'we ūgehelwa masala, ni anombage Mulungu akwinhwa, nguno ū ng'wene akabinhaga pye a bose mu būtūgugīla, hangī ataayīhīlaga.

⁶Kwike alombe mu kūzunya, yaya ū kūsusanya; nguno ū nsusanya abizile gītī ihuuli lya mu nyanza, īlo līkalibangūlagwa na kūselengetiwa nyaga.

⁷Ū munhū ūyo alī gīko atiziganika gīkī akwanukūla shose shose kūfuma ū kūlī Seeba.

⁸Nguno ū wa magalū galū atalembeelaga ū mu nzīla jakwe pyī ī jose.

⁹Ū ndūgū ūyo adalahilwe ni ayegage, nguno ū kūlī Mulungu ngūngūhiwa ū ng'wenūyo.

¹⁰Alīyo ū nsabi ni ayegelage mu būdohelejiwa, īkī akūbīta gītī bonji bo maswa.

¹¹Nguno ī līīmi ūlū lyūfuma līkapembekaga lyagoocha a maswa, bolagala ū bonji wago, gaamala ū wiza wago ūbo būkabonagwa; h'ūmo alī nū nsabi, nang'hwe akūūmila mo ū mu myatīla yakwe!

¹²Ūlū munhū wiyūmīlīja mu būgeng'wa, akūbiza na lubango, nguno ūlū ūpyena, akwanukūla ngikili ya būpanga, īyo Mulungu abisagīgije abo bantogilwe.

¹³Kwike munhū ose ose ūlū ūgeng'wa atizūhaya gīkī, “Nalīgeng'wa na Mulungu,” nguno ū Mulungu atīko kūgeng'wa na būbi, nū wei atagemaga munhū ose ose.

¹⁴Alīyo būlī munhū akagemagwa na kwikūmva kwakwe, kūnū akūdutagwa na būlemva lemva.

¹⁵Hūna ū kwikūmva ūlū kūbiza nda kūkabyalaga shibi, ī shibi nasho ūlū shūkomeela shikenhaga icha.

¹⁶Yaya ū kūlemva lemva badūgū bane batogwa;

¹⁷būlī kanong'helwe kawiza, na būlī inong'ho ishikanu līkafumaga kwigūlya, kūlī Sīswe w'isana, ūyo atī na magalū galū nūūlū hado; ndūhū nūūlū nengeeji gwago ū mhayo gwenūyo.

¹⁸Akatūbyala mu mhayo gwa ng'hana kūlwa kasolele kakwe wei ng'wenekīlī, gīkī ū mu shiseeng'wa shakwe tūbize mbika ya matwajo ga wandījo.

¹⁹Bing'we badūgū bane batogwa, natogilwe ng'witegeleje gīkī, īlī yawiza būlī munhū abize ng'wangū ū kwigwa, alīyo atizūbiza ng'wangū ū kūyomba, nūūlū ng'wangū kūpelana.

²⁰Nguno ū būpelanu bo ng'wa munhū būtīko kūbeeja mhayo mu būtūngīlīja bo ng'wa Mulungu.

²¹Nose hū kūhaya lekanagi nabo pyī ū būsoso bo kashimīzīle, nī mihayo ya malofu īyo īkasosohajaga. Ū mhayo ūyo gwahambilwe mu bing'we gwanukūlagi mu widohya, nguno gūdūgije kūbūpīja ū būpanga wing'we.

²²Bizagi bashikīlīja bago ū mhayo, ītī badegeleki dūhū; kūnū mukwilembaga bing'we benekīlī.

²³Nguno ū munhū ūlū ūbiza ng'wigwi wa mhayo dūhū, alīyo atī ng'wīti wago, ū ng'wenūyo atikīlile na munhū ūyo akilolaga ihanga lya būshū bokwe ng'wilole.

²⁴Wa kūhayūmala ū kwilola, ūlū wīnga ho wība na kwība ūmo alī!

²⁵Alīyo ū wa kūshilola chiza ī shilagīlo sha wiyabī ī shishikanu, hūna ūshimīzīla musho akūshishikīlījaga, ūbiza atī wa kūgelela kwigwa dūhū na kwība, ū munhū ng'wenūyo akūbiza na lubango ū mu īyo akwīyītaga.

²⁶Ūlū munhū akwiganikaga gīkī alī na dini, alīyo ūbiza atadūgije ū kūlūlang'hana ū lūlīmi lokwe, ū munhū ng'wenūyo akwilembaga ū mung'holò; ī dini yakwe ītī na solobo.

²⁷Ī dini neela, īyo ītī na shilingo kū būtongi bo ng'wa Mulungu ūyo alī Sīswe, yene īlī gīkī, kūja kūbalola bapīna na bachīlwa, na kūbagunanha mu makoye gabo. Na kwilang'hana ng'wenekīlī ūtizūsosohajiwa na būbi bo mu sī.