Read Sukuma Bible 2015 – Bibilia Ilagano Lya Kale 2015 Yakobo 2 Bible Online

Yakobo 2 - Sukuma Bible 2015 – Bibilia Ilagano Lya Kale 2015 bible

Yakobo 2

¹Badūgū bane, ū mhayo gwa kūnzunya Seeba wise Yesu Kilisito, ū Seeba w'ikūjo, mutabizage nago mu kūbasolanhya a banhū.

²Nguno banhū babīlī bashikile kwingīla ng'wisinagogi ling'we; ūmò azwalile pete ya zahabu kū lwala, na shizwalo sha nyasabi; ūngī kunese, azwalile ng'wenda gūshila shilile.

³Ūyo azwalile shizwalo sha nyasabi ūlū ng'ūng'wīla gīkī, “Igashaga a ha soga aha ū bebe.” Lelo ū kunese ng'wene ng'ūng'wīla, “Ū bebe jaga ūkīmīīle wishishinīke aho.” Nūūlū gīkī, “Nzūgū wigashe ha sī, hihī na mhambala jane aha!”

⁴Angū, ū mu gīko numho mutisolanhyaga bing'we bike, na kūbiza balamuji ba maganiko mabi?

⁵Alidegelekagi badūgū batogwa, ū Mulungu atabasolile a bahabī ba mu sī gīkī babize basabi ū mu kūzunya, na babize bingīji ba mu būtemi ūbo abisagīgije abo abatogilwe!

⁶Alīyo a bing'we mundalahile ū ng'habī! Tūhaya a basabi hū bene abo bakamuluhyaga, na kūmudutanja kūmutwala kū mabanza?

⁷Batī bene abo bakalīsondagūlaga nī lina ling'we ī lyawiza īlo mukitanīlagwa?

⁸Hūna lūūlū ūlū ng'ūshishikīlīja ī shilagīlo sha nyatemi ūmo shandīkwa shihayīlile gīkī, “Ntogagwe nzenganwa ng'wiyo gīt'ūmo witogelilwe bebe,” mukūbiza mulītūngīlīja.

⁹Alīyo ūlū muyūbasolanhya a banhū, mukūbiza mulīhūba; ū mu gīko shikūmukaanīla ī shilagīlo gīkī mulī bakenaagūji.

¹⁰Nguno ū wa kūshidima ī shilagīlo ī shose alīyo wipama mu mhayo gūmò, wabizaga nkenaagūji wa yose.

¹¹Īkī ūyo ahayile gīkī, “Yaya ū kūshihya,” hū ng'wene ūyo ahayile nī gīkī, “Yaya ū kūbūlaga.” Nose hū kūhaya ūlū ūtī nshihani alīyo ūlī mūlagi, ū bebe ūlī nkenaagūji wa shilagīlo shose.

¹²Hūna lūūlū, ūlū mulīyomba nūūlū mulīīta mhayo, bizagi gītī banhū abo bakūlamulwa mu nzīla ya shilagīlo sha wiyabī.

¹³Nguno shitīho shigongo ū mu būlamulwa bokwe ūyo atachīlaga shigongo; alīyo ī shigongo shilī na nguzu kūtinda būlamulwa.

¹⁴Ī gīsī lūūlū badūgū bane, īkūbiza ho solobo kī ūlū munhū akwihayaga gīkī ū wei alī na kūzunya, alīyo atī na shītwa. Ū kūzunya kwakwe kwenūko kūdūgije kūmpīja?

¹⁵Ūlū ng'wanong'wing'we ngosha nūūlū nkīma alī na makoye ga būzuuka hama alī nzala;

¹⁶hūna ūmò wing'we ūng'wīla gīkī, “Jaga mhola ong'wise, ūkūlūngūja dūhū, nīyo ūkwigūta!” Ūlū mutang'winhile ī sha kwigunanhīla ū mu mīlī, īlīho solobo kī ū mu mihayo yenīyo?

¹⁷H'ūmo īlī nū kūzunya, ūlū kūlī iyene gīko dūhū na shītwa yaya, kūkūbiza kūchile!

¹⁸Hūna lūūlū munhū ūngī ashikile kūkūwīla gīkī, “Ū bebe ī chene ūlī na kūzunya, ū nene nalī na shītwa;” alinoolekejage ū kūzunya kwako ūko kūtī na shītwa, nane nakoolekeje ū kūzunya kwane mu nzīla ya shītwa!

¹⁹Na ng'hana ūzunije gīkī ū Mulungu alī ūmò wike, ūtūngīlīgije gete; alīyo na a masamva gagūzunije ū mhayo gwenūyo, nīyo gakadetemaga na kūdetema!

²⁰Bebe mbūūlī, hamo ūtogilwe kūmana gīkī ū kūzunya ūko kūtī na shītwa kūtī na ngofyoolo?

²¹Ī gīsī ū sīswe ū Abulahamu atabalīlilwe būtūngīlīja kūlwa nguno ya kūntūūla ha ng'walīlo ū ng'witūnja wakwe ū Isaka, gīkī amfunye kūbiza shitambo?

²²Ūlībona gīkī ū kūzunya kwakwe kūkatūmama hamò nasho ī shītwa shakwe, nī gīkī ū kūzunya kwakwe kūkashikanyiwa mu shītwa?

²³Ū mu mhayo gwenūyū shilīshikīīla ī shandīkwa īsho shihayile gīkī, “Ū Abulahamu akansanya Mulungu ūbalīlwa būtūngīlīja.” H'ūmo īkajīla nose witanwa gīkī nwani ng'wiye o ng'wa Mulungu.

²⁴Na lūūlū managi gīkī, ū munhū akabalīlagwa būtūngīlīja kūlwa shītwa, ītī mu kūzunya dūhū.

²⁵H'ūmo īkajīla nī mihayo ya ng'wa Lahabu, ū nkīma ūyo walī malahya. Ī gīsī nang'hwe atabalīlilwe būtūngīlīja kūlwa shītwa, īkī akabagunanha abo baalī batūng'wa, ūbafunya būja, būbītīla nzīla yīngī?

²⁶Gīt'ūmo mīlī gūlī, ūlū gūtī na moyo gūkabizaga gūchile; nū kūzunya h'ūmo kūlī, nako ūlū kūtī na shītwa numho kūchile!