Read Sukuma Bible 2015 – Bibilia Ilagano Lya Kale 2015 Yakobo 4 Bible Online

Yakobo 4 - Sukuma Bible 2015 – Bibilia Ilagano Lya Kale 2015 bible

Yakobo 4

¹A mabūlūgū na a mawilwisha ayo gakūmukoyaga, ni gakūfumaga halī? Gatenhelejiagwa na malusu ga mbika na mbika ayo gakalwaga ū mu bing'we?

²Mukikūmbagwa, alīyo mutapandīkaga; nūūlū ng'wabona wilu na kūbūlaga, nahene ū kūpandīka ī shikolo yaya! Ng'wakwīta ng'wikenya na kwilwisha būlūgū, alīyo nahene ndūhū dūhū ū kūpandīka, nguno mutalombaga!

³Mukīītaga ng'walomba alīyo mutanukūlaga shose shose, nguno mukalombaga kībi, gīkī mupandīke sha kwiyeja bing'we benekīlī dūhū!

⁴Bing'we bashihani, mutamanile gīkī ū kūbiza na būnwani na sī būlī wanishi ū kūlī Mulungu? Ali lūūlū managi gīkī, būlī ng'wene ūyo ūnwana na sī, ū ng'wenūyo wiyītaga kūbiza ng'wanishi wa ng'wa Mulungu!

⁵Nūūlū hamo mukwiganikaga ī shandīkwa shikwihayīlaga dūhū ī gīkī, “Ū Mulungu ankūmbūlile mu wilu būtaale no ū Moyo ūyo alī mu bise?”

⁶Alīyo akūtwinhaga būdūla būtaale no kūlwa shigongo shakwe, h'ī nguno yene ī shandīkwa shihayile gīkī, “Ū Mulungu akabahangījaga a bikumīlīja, alīyo a bidohya akabīīlūkīlaga lubango.”

⁷Hūna lūūlū idohyagi ū kūlī Mulungu, alīyo ū Shetani ng'hangījagi, akūmupeela.

⁸Ng'wegeelagi ū Mulungu, nang'hwe akūng'wegeela. Bing'we banhū ba shibi, kalabagi a makono ging'we; bing'we banhū ba magalū galū, jeejagi īng'holò jing'we.

⁹Pīnīhalagi mulīle na kūtūla ng'hūngū, ī seko jing'we jigalūke kūbiza ng'hūngū, nū būyegi wing'we būgalūke kūbiza būpīna.

¹⁰Idohyagi ū kūlī Seeba, hū nang'hwe akūmugūngūhya.

¹¹Badūgū bane, yaya ū kwisondagūla bing'we bike. Ūlū munhū wandya kūnsondagūla ndūgūye nūūlū kūnamula, numho alīshisondagūla na kūshilamula shilagīlo. Hūna lūūlū, ū bebe ūlū wandya kūshilamula shilagīlo, numho wabizaga ūtī nshikīlīja washo, ūlī namuji washo.

¹²Ū ng'winhi wa shilagīlo alī ūmò, nīyo hū ng'wene ū Namuji, ūyo adūgije kūpīja na kūyagaja. Al'ū bebe nang'ho ūlī nani nose ūnamule nzenganwa ng'wiyo?

¹³Ali lūūlū degelekagi a bing'we abo mukwikalaga ng'ūhaya gīkī, “Ī lelo nūūlū ntondo tūkūja mu nzengo nebe tūkamale mo ng'waka tūkūsūlūjaga, tūkūgwasha dūhū ī solobo!”

¹⁴Ī yenīyo mukwihayīlaga dūhū, alīyo mutīmanile īyo īlang'wilongele ū mu būpanga wing'we a ha ntondo. Nguno mubizile gītī gabugabu, īyo īkilongaga ng'wikanza ido dūhū, hama yasambaala haho na haho!

¹⁵Ūlī hambū hambū muyūhaya gīkī, “Ūlū Seeba ūtogwa tūbiza ho, tūkūgwīta ū mhayo gwenūyū, nūūlū ūyo.”

¹⁶Alīyo ī haha mukūdooshiagwa wikumīlīja wing'we dūhū; kwike pyī ū wikumīlīja ūbo būlī gīko būlī shibi.

¹⁷Hūna lūūlū ūyo amanile mhayo gwawiza ūyo shiigelile agwīte alīyo ūleka ū kūgwīta, ī shenīsho shilī shibi ū kūlī we!