Read Sukuma Bible 2015 – Bibilia Ilagano Lya Kale 2015 1 Petelo 1 Bible Online

1 Petelo 1 - Sukuma Bible 2015 – Bibilia Ilagano Lya Kale 2015 bible

1 Petelo 1

¹Nene Petelo ntūng'wa wa ng'wa Yesu Kilisito, kū basolwa abo bakwikalaga mu sī gītī bageni, basambaalile hose hose mu Ponto, Galatia, Kapadokia, Asia, na Bithinia;

²abo basolilwe kūfuma kale kūlenganīla na būmani bo ng'wa Mulungu Sīswe, gīkī beejiwe na Moyo; na babize bigwi kūlwa kūseeseebelwa mininga ga ng'wa Yesu Kilisito. Shigongo na mhola shibize hamò ning'we na shimukwīlīle.

³Akumīlījiwe ū Mulungu, Ise wa ng'wa Seeba wise Yesu Kilisito; ūyo kūlwa shigongo shakwe shitaale watwingīgije mu kwisagīlwa kūpanga, ūtwīta kūbyalwa būpya mu nzīla ya būjūūko bo ng'wa Yesu Kilisito kūfuma mu bafu.

⁴Ū mu gīko watūtūūlile mu wingīji ūbo būtī bo kūkenaagūka, būtī bo kusosohala nūūlū kūkūlūhala. Ūbo būbīkilwe ng'wigūlū kūlwa nguno ying'we;

⁵a bing'we abo mulang'hanilwe na nguzu ja ng'wa Mulungu mu nzīla ya kūzunya; gīkī mubize mo ū mu būpīji ūbo būlindīīlile koolechiwa, ūlū lyūshika ha būkalīkījo ī likanza.

⁶Ū mu mhayo gwenūyo mukūyegelaga mo, nūūlū īkī ū ng'wikanza ī liguhī īlī mukwītaga ng'waluha ūlū yaja chene, kūlwa nguno ya būgeng'wa bo mbika na mbika,

⁷ūbo būkūng'wizīīlaga kūlwa kūkūgema ū kūzunya kwing'we, ūko kūlī kwa mpango ntaale, kūtinda zahabu, ījo jikagemagwa bo kūbītiwa mu moto, jimanīke ū mpango gwajo, nūūlū īkī jilī ja kūkenaagūka. Na a bing'we mukūgemagwa ī haha, gīkī ūlū lyūshika ī likanza lya koolechiwa kwa ng'wa Yesu Kilisito, ū kūzunya kwing'we kwigengeleke gīkī kwigeleelilwe mu mhayo gw'ikūjo na kūkumīlīja na kūgongoola.

⁸Nguno muntogilwe nūūlū īkī mutaalī ū kūmona, na munsanije nūūlū īkī mutūmonaga ī haha. Nīyo mukūyegaga na būyegi būtaale w'ikūjo īlo lītī na kasomboolele.

⁹Nguno ī ng'halīlo ya kūzunya kwing'we īlī kūpījiwa kwa būpanga wing'we.

¹⁰A bahangi bīkoobaga na kwīgīsīlīja ī mihayo ya būpīji wenūbū; būshihanga ī shigongo īsho shilabize ho kūlwa nguno ying'we.

¹¹Baalī batogilwe kūlitegeleja nī likanza, balīmane līkūbiza nanalī na lya mbika kī, īlo waboolekejaga ū Moyo wa ng'wa Kilisito ūyo walī mubo, aho akūbamanīkījaga ī mihayo ya būluhiwa bo ng'wa Kilisito, kūko ītaalī kūshika, nī ya makūjo ayo galabize ho a ha numa yaho.

¹²Bakoolekejiwa gīkī baalī batitūmamīlaga boi benekīlī, alīyo batūmamaga kūlwa nguno ying'we. Basomboolaga mihayo īyo mukūwīlagwa ī haha na a babo bakūmulomeelaga Ng'hūlū Jawiza, mu nguzu ja ng'wa Moyo Ng'wela, ūyo wenhilwe kūfuma ng'wigūlū. Ī mihayo yenīyo na a bamalaika balī na ng'hūmbū ja kwībona.

¹³Hūna lūūlū, ikalagi mumalīīlile ū mu maganiko ging'we, nīyo mubize balembeezu; mushiisagīlwe mu būshikanu ī shigongo īsho shikwenhwa kūlwa nguno ying'we ng'wikanza lya koolechiwa kwa ng'wa Yesu Kilisito.

¹⁴Bizagi baana bigwi, yaya ū kūlondeela nhūngwa jing'we ja kale, ja kwikūmva; ūmo ng'washimīzīlaga aho ng'walī mutaalī kūmana mhayo gose gose.

¹⁵Alīyo īkī alī ng'wela ūyo wang'witana, ning'we bizagi beela ū mu nhūngwa jing'we jose.

¹⁶Nguno gwandīkilwe gīkī, “Bizagi beela īkī ū nene nalī ng'wela.”

¹⁷Nose ūlū mukūng'witanaga Baba, ūyo akalamulaga būlī munhū gīt'ūmo shilī shītīle shakwe mu būtūsolanhya, shimīzagi na logohano ū ng'wikanza lya būgeni wing'we aho mutaalī mu sī.

¹⁸Nguno mumanile gīkī mutakomoolilwe mu nzīla ya shikolo sha kūkenaagūka, gītī, feza nūūlū zahabu, ū kwīnga ū mu nhūngwa jing'we ījo jitī na matwajo, ījo ng'walī ng'wanukūla kūfuma kū bakūlūgenji bing'we.

¹⁹Alīyo mukomoolilwe mu nzīla ya mininga ga mpango ntaale, ga ng'wa Kilisito, ū Ng'wana wa Ng'holo ūyo atī na kabi nūūlū shilingo,

²⁰ūyo atūūlilwe ho kūfuma kale kūko sī ītaalī kūseeng'wa; nīyo ī haha ū mu shikū īji oolechiwe kūlwa nguno ying'we.

²¹A bing'we ū mulī we munsanije Mulungu ūyo akanjūūcha kūfuma mu bafu; ūng'winha ikūjo, gīkī ū kwisagīlwa kwing'we kūbize kūnsendamīlile Mulungu.

²²Nose īkī ū būpanga wing'we wamalile kwela kūlwa kwīzunya ī ng'hana, itogagwi mu būtogwa bo nyadūgū ūbo būtī na wibeeleja, itogagwi mu ng'hana kūfuma mu gatī ya ng'holò.

²³“Nguno ng'wamalile kūbyalwa būpya, ītī kūfuma mu mbīyū ng'henagūku, alīyo īyo ītī na kūkenaagūka, mu nzīla ya mhayo mpanga go ng'wa Mulungu, ūyo gūlī gwa kūshinga ho.

²⁴Nguno pyī ī mibīlī īlī gītī maswa, nī likūjo lyayo ī lyose līlī gītī lya bonji bo maswa; a maswa ūlū gūnyaala būkalagalaga ū bonji.”

²⁵Alīyo ū mhayo go ng'wa Seeba gūlī gwa kūshinga ho. Ū mhayo gwenūyo h'ī Ng'hūlū Jawiza ījo ng'walomeelilwe.