Read Sukuma Bible 2015 – Bibilia Ilagano Lya Kale 2015 1 Petelo 3 Bible Online

1 Petelo 3 - Sukuma Bible 2015 – Bibilia Ilagano Lya Kale 2015 bible

1 Petelo 3

¹Ning'we a bakīma abo mutoolilwe shiigelile kwidohya ū kū bagoshi bing'we, ūlū balīho bamò batagūzunije ū mhayo, ūlū yūdūlīka badutwe kūlwa nhūngwa ja bake babo, nūūlū īkabiza shilambu ū mu nzīla ya mhayo.

²Nguno bakūyūbūbona ū wela wa nhūngwa jing'we ja logohano.

³Ū būlenji wing'we būtizūbiza wa kūkoyiwa mihayo ya higūlya gūlya gītī kūshiba nzwīlī na kūzwalīla zahabu, nūūlū myenda ya mpango ntaale.

⁴Alīyo ū wiza wing'we būbize būbisilwe mu ng'holò, mu būmunhū ūbo būtī bo kūkenaagūka, mu moyo gwa widohya na būlembeezu, ūyo gūlī gwa mpango ntaale kūlī Mulungu.

⁵Nguno h'ūmo jalī nī nhūngwa ja bakīma ba kale a beela, abo baalī bidohya kū bagoshi babo kūlwa kūnsanya Mulungu.

⁶H'ūmo walī nū Sara; walī ng'widohya ū kūlī Abrahamu, kūshisha wang'witanaga, baba! Mukūbiza bashīke bakwe ūlū ng'ūbeeja yawiza, ng'ūleka kūsugwa na booba.

⁷Na a bing'we bagosha ning'we ikalagi chiza nabo a bake bing'we, a kalombele king'we katizūhangījiwa; managi gīkī ū nkīma alī gītī shiseme shigokolo. Binhagi ikūjo, nguno nabo balī bingīji hamò ning'we ū mu shakwinhwa sha būpanga.

⁸Ū mhayo gwa kūmalīja gūlī gīkī, bizagi na gwīnda pye a bose ū mu kiganikīle, mubize banhū ba kwisaatwa na kwichīla shigongo, na kwitogwa nyadūgū; hangī mubize bidohya ū mu maganiko ging'we.

⁹Yaya ū kwishokeja yabūbi kūlwa yabūbi, nūūlū shidūki kū shidūki, alīyo ng'wilombela lubango, nguno a bing'we ng'witanwa kūlwa mhayo gwenūyo, mubize na wingīji mu lubango.

¹⁰“Īkī ūyo atogilwe būpanga na kūbona shikū jawiza, ni alūlemejage ū lūlīmi lokwe ū kūyomba yabūbi, nū nomo gokwe ū kūhaya ya būlomolomo.

¹¹Na hangī shiigelile alekane nayo ī ya malofu; Īīte yawiza, akoobe mhola, na ashimīzīle muyo.

¹²Nguno a miso ga ng'wa Seeba gabalolile a batūngīlīja, na a matū gakwe gakigwaga ū būlombi wabo. Alīyo ū Seeba atabatogilwe a bakenaagūji.”

¹³Ī gīsī nani ūyo alang'wītīle yabūbi ūlū ng'ūbiza bakomeezu mu kwīta yawiza?

¹⁴Alīyo nūūlū mukaluhiwa ūlū īlī kūlwa nguno ya būtūngīlīja, mukūbiza na lubango; kwike yaya ū kogoha īyo bakūyogohaga ba mu sī, yaya nūūlū kwikala ng'wibakīla.

¹⁵A bing'we bene nkūjagi Kilisito ū mu myoyo ying'we, nguno alī Seeba ng'wela. Būl'ikanza mubize mumalīīlile kūnshokeja ose ose ūyo alamubūje mhayo kūlwa kwisagīlwa kwing'we.

¹⁶Kwike mubize na widohya hamò na logohano, hangī mubize beela ū mu myoyo ying'we; nūūlū bakigela banhū ba kūmuhaya kībi mu kūkasondagūla a kajīle king'we a kawiza ū mulī Kilisito, bayūding'wa minala.

¹⁷Īkī īlī hambū hambū kūluhiwa kūlwa nguno ya kwīta yawiza ūlū būlī būtogwa bo ng'wa Mulungu, kūtinda kūluhiwa kūlwa nguno ya kwīta yabūbi.

¹⁸Nguno nū Kilisito akacha lūkangala lūmò dūhū kūlwa shibi shing'we; ū Ntūngīlīja ūcha kūlwa nguno yabo abo batī batūngīlīja, gīkī ang'wenhe a bing'we kūlī Mulungu. Akabūlagwa ū mu mīlī alīyo ū mulī Moyo wītwa kūbiza mpanga.

¹⁹Hūna ū mu mbika yenīyo, ūja kwīlomeela ī myoyo ya banhū abo balugalīlilwe mu būtungwa.

²⁰A benabo hū bene abo baalī batazunije mu shikū ja ng'wa Noa, aho wiyūmīlīja bo ng'wa Mulungu walī būlindanile ū ng'wikanza lya kūbeejiwa kwa ngalaba, īyo īkabapīja bo minzī banhū bagehu, banaane dūhū.

²¹Ū mhayo gwenūyū ī haha ū kū bing'we gūlī būlolelo ū mu būbatīījiwa ūbo būkūmupījaga, ītī kūlwa kwīnja būsoso wa mīlī, alīyo kūlwa kūnūmba Mulungu mu moyo gwape; kūlwa būjūūko bo ng'wa Yesu Kilisito,

²²ūyo alī ng'wigūlū ī haha kū nkono gwa būlyo go ng'wa Mulungu, higūlya ya bamalaika na mabūsugi na mabūdūla.