Read Sukuma Bible 2015 – Bibilia Ilagano Lya Kale 2015 1 Petelo 4 Bible Online

1 Petelo 4 - Sukuma Bible 2015 – Bibilia Ilagano Lya Kale 2015 bible

1 Petelo 4

¹Nose īkī ū Kilisito wamala kūluhiwa ū mu mīlī, na a bing'we līsolagi ī liganiko lyenīlo lībize shilanga shing'we; nguno ū munhū ūlū ūlinda ūluhiwa mu mīlī akūbiza oyaga ū kwīta ī shibi.

²Ī likanza īlo lyasaagaga ū mu būpanga bo mīlī, atīko kūlītūmamīla hangī mu mihayo ya kwikūmva ūko kūkabakoyaga banhū, akūlīmalīla mu mihayo ya kūnyeja Mulungu.

³Nguno ligelile lūūlū ī likanza īlo lyabītile mulī mu nhūngwa ja banhū ba mahanga; gītī shimīzīle ya saasa boya, kwikūmva kwabūbi, būsoso, būkolwa walwa, būlaku, malika ga būng'wi būngī na būngī, na būlamya bo mashiikolile ūbo būtī mu nzīla.

⁴Ī haha balīyūmukumya kūnū būmusondagūla, īkī balībona gīkī ng'ooyile ū kwikala mukūseesejaga hamò nabo kūja ū kū mihayo ya būyaga būyaga yenīyo, īyo ītī na būkalīkīle.

⁵Alīyo īyo bakwīyītaga yenīyo bakwīsomboola ū kū būtongi bokwe ūyo alindīīlile kūbalamula a bapanga na a bafu.

⁶H'ī nguno yene na a bafu bakalomeelwa Ng'hūlū Jawiza, gīkī nabo balamulwe gītī banhū ba mu mīlī, alīyo ū mu moyo babize bapanga kūlī Mulungu.

⁷Ali lūūlū, ī ng'halīlo ya yose yegeelaga; bizagi balembeezu na ba masala madeekanu mu ū kūlomba.

⁸Ū mhayo ū ntaale itogagwi mu būtogwa bo ng'hana, nguno ū būtogwa būkakundīkījaga shibi sha mbika ningī.

⁹Ng'wigunanha ītī mu kwidugumīla.

¹⁰Būlī ūmò wing'we alī na kinhīlwe ako wanukūla; ng'wigunanha īkī mulī babīkījiwa bawiza ba mbika jose ja kinhīle ka ng'wa Mulungu.

¹¹Būlī ng'wene ūlū alīyomba, ī mihayo ībize gītī ya ng'wa Mulungu. Nū yūyo alītūmama, abize gītī alīfunya kūlī Mulungu ū būdūla. Ū mu gīko ū Mulungu akūkumīlījiwa mu mihayo yose mulī Yesu Kilisito, ūyo ikūjo na nguzu shilī hamò nang'hwe shikū ja shiku jose.

¹²Bing'we batogwa, mutabūkumyage ū būgeng'wa ū būsebu gītī moto, ūbo būkūmugwīlaga. Mutabizage gītī mukwilongelagwa mhayo ngeni.

¹³Alīyo a bing'we yegagi īkī mukūsangīlaga mu būluhiwa bo ng'wa Kilisito, nguno ū ng'wikanza lya koolechiwa kw'ikūjo lyakwe mukūyega na būyegi būtaale no.

¹⁴Ūlū mulīsondagūlwa kūlwa lina lya ng'wa Kilisito ibalagi gīkī mulī na lubango, nguno ū Moyo w'ikūjo na wa ng'wa Mulungu alī hamò ning'we.

¹⁵Kwike atizilonga nūūlū ūmò wing'we wa kūluhiwa kūlwa būbūlagi nūūlū wibi, nūūlū wishatya mu mihayo ya bangī.

¹⁶Alīyo ūlū ūluhiwa īkī alī wa ng'wa Kilisito, ni ankumīlījage Mulungu ū mu lina lyenīlo; yaya ū kūcha soni.

¹⁷Nguno ī likanza lya kūlamulwa lyashikaga, nīyo ū mhayo gwenūyo gūkwandīja mu kaya ya ng'wa Mulungu. Nose ūlū gwandīja mu bise, īkūbiza ginehe ī ng'halīlo yabo abo bakūjiisaasamulaga ī Ng'hūlū Jawiza ja ng'wa Mulungu?

¹⁸Na hangī ū ntūngīlīja ūlū ūpīla bo kūpūlūgūka, a bahūnga na a bakenaagūji bakwilongela halī a bene?

¹⁹Hū kūhaya abo bakūluhaga kūlwa kwīta īyo Mulungu atogilwe, ni bongejage ū kwīta ī yawiza, babūbīke ū būpanga wabo kūlī Nseemi nsanyiwa.