Read Sukuma Bible 2015 – Bibilia Ilagano Lya Kale 2015 2 Petelo 2 Bible Online

2 Petelo 2 - Sukuma Bible 2015 – Bibilia Ilagano Lya Kale 2015 bible

2 Petelo 2

¹Kwike ahene na a bahangi a balomolomo baalīho ū mu banhū, gīt'ūmo nū mu bing'we bakwandya kwilonga balangi balomolomo; bayenha mu nyasala sala malange ga, nyakenaagūji, biyenhele wangū boi benekīlī mihayo ya kūbakenaagūla kūlwa kūnema ū Seeba ūyo wabagūla.

²Bingī bakūyūlondeela nhūngwa jabo ja malofu, ū mu gīko ī nzīla ja būtūngīlīja jikūyūsondagūlwa kūlwa nguno yabo.

³Na bakūyūtūmamīla mihayo mikondooku kūlwa nguno ya kwikūmva kwabo, bipandīkīla solobo; ū nsango gwabo a benabo gūtūūlilwe kūfuma kale na kale, nūgo gūtūdīla ū kūshika, nū kūkenaagūka kwabo kūtatindīlile!

⁴Ū Mulungu atūbaleka gīko dūhū; gīt'ūmo atabalekile a bamalaika abo bakīīta shibi, abo akabaponya mu kūlimu, ūbalugalīla mu machongo ga giiti balang'hanwe ng'wenūmo balindīīle nsango.

⁵Nī sī ya kale atīlekile gīko dūhū, akīkenaagūla n'ihūūma; ūbayagaja pye a banhū, nguno baalī na nhūngwa ja malofu, ūneka Noa dūhū ūyo walī ntangaja wa būtūngīlīja, na bangī mpungatī.

⁶Hama ī mizengo ya Sodoma na Gomola, nayo akīgwisīja nsango, wīpemba. Wīgalūcha kūbiza mabu, yūbiza būlolelo wa mhayo ūyo akūbīītīla abo batogilwe kwikala mu nhūngwa jabūbi.

⁷Ūmpīja Lutu, ūyo walī ntūngīlīja; munhū ūyo boolī bompīnīhaja ū būsoso bo nhūngwa ja bakenaagūji benabo.

⁸(Nguno īkī walī ntūngīlīja ū munhū ng'wenūyo, aho wikalaga hamò nabo a bakenaagūji benabo, walī waluha no ū mung'holò yakwe, ū kwikala ūjibona na kūjiigwa būlī lūshikū ī nhūngwa jabo ja malofu).

⁹Nose hū kūhaya ū Seeba amanile chiza no ū kūbapīja a beela, bīnge ū mu kūgeng'wa. Alīyo abo batī batūngīlīja, a bene abalang'hanile kūshisha līshike ī likanza lya nsango, ū mu lūshikū lo kūlamulwa.

¹⁰Bakūluha no ū mu nsango gwenūyo abo bakisosohajaga kūlwa kūkūūbīlīja mihayo ya kwikūmva kwa mīlī, na a badalahīja ba būsugi. Nguno a banhū benabo bagimu, nīyo bikumīlīja; hangī batogohaga nūūlū kūbasondagūla abo bigelile kūkūjiwa.

¹¹Bakīītaga īyo nūūlū bamalaika batagimaga kwīyīta, nūūlū īkī a bene balī na nguzu na būdūla kūtinda. A boi batababūūlaga a benabo ū kū būtongi bo ng'wa Seeba mu kūbasondagūla.

¹²Alīyo a benaba balī gītī shiinū ījo jitī na masala, ījo jikabyalagwa kūlwa kūding'wa na kūkenaagūlwa dūhū; nguno bakasondagūlaga mihayo īyo batayitegelegije nūūlū hado. Ū mhayo ūyo bakagwītaga gwenūyo gūlī gwa kūbakenaagūla boi benekīlī; na ng'hana bakūkenaagūka.

¹³Bakwanukūla mheela yabūbi kūlwa nhūngwa jabo ja malofu, nguno bakwītaga mihayo misoso na līīmi hose, kūlwa kwiganika gīkī balīīta ya kūyeja. A banhū benabo balī mabbado ga kūdimya minala. Ūlū balī hamò ning'we mu makanza ga būyegi ba kwikala bakwilembagūlaga mihayo yabo ya kwikumīlīja!

¹⁴Banhū ba miso gokalile būshihani, nū kwikūmva kwabo kwa kwīta ī yabūbi kūtashilaga. Balemba lembi ba banhū abo bataalī kūbiza na nguzu ū mu kūzunya. Balī nang'holò jimanīlījiwe mhayo gwa kwikūmva shibi; baana ba ng'wizumo!

¹⁵Batīmo ū mu nzīla ī ngololoku nūūlū hado, bahūbīkile; balī balondeeji ba nhūngwa ja ng'wa Balaamu ng'witūnja o ng'wa Beoli, ūyo akatogwa mheela ya nyabbūūlī.

¹⁶Alīyo ū mu būhahaalīzu bokwe wenūbo ūhang'wa, nzobe īyo ītayombaga yūnyombya n'ilaka lya banhū; yūbiza yakaga lūtūga lo ng'hangi!

¹⁷A banhū benaba balī nzwinzī ng'halamuku jitī na minzī, malunde mabbūūpu, ga kwikala gakūhūhūūjiagwa nyaga; balindīīlilwe giiti sha gamha, īsho batūūlīlilwe.

¹⁸Bakikumīlījaga kūnū bakūyombaga mihayo mitaale alīyo midūhū, nūūlū īkī īkadutaga maganiko ga banhū abo kwikūmva kwabo kwa mīlī kūbaheebile; hūna ū mu gīko bayūbagwasha abo bakūpūlūgūkaga kwīnga mu makono ga banhū ba nhūngwa ja malofu.

¹⁹Bakabisagījaga wiyabī, alīyo a boi benekīlī balī mu būsese wa shibi, nguno ūyo aheebilwe na mhayo gose gose, ū ng'wenūyo nsese ū kū mhayo gwenūyo.

²⁰Īkī ūlū gīkī bakapūlūgūka bīnga ū mu būsoso bo mu sī aho bang'witegeleja ū Seeba na Mpīja wise Yesu Kilisito, alīyo hangī ī mihayo yenīyī yūbaheeba yūbitaligīnja, ī ng'halīlo yabo īlī yabūbi kūtinda ū wandījo wabo.

²¹Nguno īlī hambū hambū ūlū ni baalī batīmanile gete ī nzīla ya būtūngīlīja, kūtinda kwīmana hūna būgalūka na kūlekana nasho ī shilagīlo sheela īsho bakinhwa.

²²Ū mu gīko bakwīshikīlījaga ī mihayo ya lūsumo lwa ng'hana ūlo lūhayile gīkī, “Ī mva īkashokelaga malūki gayo!” Na gīkī, “Ī ngulubī nūūlū yoojiwa īkashokaga hangī kūgalagala mu tembe!”