Read Sukuma Bible 2015 – Bibilia Ilagano Lya Kale 2015 1 Yohana 3 Bible Online

1 Yohana 3 - Sukuma Bible 2015 – Bibilia Ilagano Lya Kale 2015 bible

1 Yohana 3

¹Mulībūbona ū būtogwa bokwe ū Sīswe ūmo atūtogelilwe, gīkī twitanwe tūlī baana ba ng'wa Mulungu, na ng'hana h'ūmo tūlī! H'ī chene ī sī ītīko ū kūtwitegeleja, nguno yalī ītang'witegelegije ū wei.

²Batogwa, ī haha tūlī baana ba ng'wa Mulungu, kwike gūtaalī ū koolechiwa hape ūmo tūkūbizīla; alīyo tūmanile dūhū gīkī ūlū oolechiwa tūkūbiza gīt'ūmo alī ū wei, nguno tūkūmona ūmo alī gete.

³Kūlwa yenīyī, būlī ng'wene ūyo alī nako ū kwisagīlwa kwenūkū mulī we, akwiyeejaga ng'wenekīlī abize ng'wela gīt'ūmo alī ū wei ū mu wela.

⁴Būlī ng'wene ūyo akīītaga shibi akīītaga mhayo gwa būgomi, nguno ī shibi būlī būgomi.

⁵Hangī tūmanile gīkī ū wei akilonga kūlwa kwīnja shibi, na gīkī ū mulī wei shitīmo shibi.

⁶Būlī ng'wene ūyo akikalaga mulī we atīītaga shibi, alīyo būlī ng'wene ūyo akīītaga shibi ataalī ū kūmona, na hangī ataamanile na hado yaya!

⁷Bing'we baana, yaya ū kūlemva lemva, nguno ūyo akīītaga ya būtūngīlīja nang'hwe ntūngīlīja gīt'ūmo wei alī ntūngīlīja.

⁸Ūyo akīītaga shibi ng'wene wa ng'wa Shetani, nguno ū Shetani ng'wene wa shibi kūfuma haho wandījo, h'ī nguno yene ū Ng'wana wa ng'wa Mulungu akilonga, gīkī ayīkenaagūle ī milīmo ya ng'wa Shetani.

⁹Būlī ng'wene ūyo abyalilwe na Mulungu atīītaga shibi, nguno ū mulī we būlīmo būdūla bo ng'wa Mulungu, atūdūla ū kwīta ī shibi īkī abyalilwe na Mulungu.

¹⁰Ū mu mhayo gwenūyū a baana ba ng'wa Mulungu bamanīkile, na a baana ba ng'wa Shetani nabo bamanīkile. Būlī ng'wene ūyo atīītaga ya būtūngīlīja, nū yūyo atantogilwe ndūgūye, atī o ng'wa Mulungu!

¹¹Hū kūhaya itogagwi būlī ng'wene na biye, nguno hū mhayo ūyo ng'wamalile kūgwigwa kūfuma ha wandījo.

¹²Yaya ū kūbiza gītī Kaini ūyo walī wa Mi, kūshisha nose ūmūlaga nzunaye. Ī gīsī nibūlī akamūlaga? Angū akamūlaga īkī ī milīmo yakwe yalī yabūbi, lelo ī ya nzunaye yalī ītūngīlīgije.

¹³Hūna lūūlū badūgū, yaya ū kūkumya ūlū yūmukolwa ī sī.

¹⁴A bise tūmanile gīkī ī haha tūtīmo ū mu kūcha, tūlī mu būpanga īkī tūbatogilwe a badūgū; ūyo atī na būtogwa akwikalaga mu kūcha!

¹⁵Būlī ng'wene ūyo ankolilwe ndūgūye alī mūlagi, hama a bing'we mumanile gīkī būlī mūlagi atī na būpanga ū mulī we.

¹⁶Ū būtogwa tūbūmanile mu mhayo ūyū, gīkī ū wei akafunya būpanga bokwe kūlwa nguno yise. Hūna lūūlū na a bise shitwigeleelilwe twifunye ū būpanga wise kūlwa nguno ya badūgū.

¹⁷Ī gīsī ūlū munhū alī na shiigunanhīlo sha mu sī, hūna ūmona ndūgū alī na makoye, alīyo ūleka ū kūnchīla shigongo, angū numho ū būtogwa bo ng'wa Mulungu būkūbiza būkwikalaga ginehe ū mulī munhū ng'wenūyo?

¹⁸Bing'we baana, yaya ū kūtogwa mu mihayo nūūlū ha lūlīmi dūhū, alīyo mu shītwa na mu ng'hana.

¹⁹Ū mu mhayo gwenūyū tūkūmana gīkī twīmīīlile ha ng'hana; nū booba ū kūlī we tūkwīnja ū mung'holò jise,

²⁰nūūlū jūbiza jikūtūbūūlaga īng'holò jise. Nguno ū Mulungu alī ntaale kūjitinda īng'holò jise, hangī ayīmanile pyī ī mihayo.

²¹Batogwa, īng'holò jise ūlū jitūtūbūūlaga tūkūbiza na wiyabī ū kūlī Mulungu.

²²Nīyo shose shose īsho tūlalombe tūkwanukūla nguno tūshidimile ī shilagīlo shakwe, na tūkwītaga īyo yīnyegije.

²³Ī shilagīlo shakwe shilī gīkī, tūlīzunye ī lina lya Ng'wana wakwe ū Yesu Kilisito, na twitogwe bise benekīlī na benekīlī, gīt'ūmo shilī ī shilagīlo īsho watwinha.

²⁴Abo bashidimile ī shilagīlo shakwe bakikalaga mulī we, nū wei akikalaga mubo. A bise tūmanile gīkī akikalaga ū mu bise, nguno tūlī na Moyo Ng'wela ūyo wamala kūtwinha.