Read Sukuma Bible 2015 – Bibilia Ilagano Lya Kale 2015 Balamuji 10 Bible Online

Balamuji 10 - Sukuma Bible 2015 – Bibilia Ilagano Lya Kale 2015 bible

Balamuji 10

¹Aho lyabīta ī likanza lya ng'wa Abimeleki, ūbūūka ngosha wa kūbapīja a Baisilaeli, wa kūfuma mu lūganda lwa ng'wa Isakaali, lina lyakwe Toola ng'witūnja o ng'wa Pua ng'wana Dodo. Ū wei walī azengile Shamili, mu sī ya magūlya ya Efulaimu.

²Ū ngosha ng'wenūyo akabatongeela a Baisilaeli ikanza lya myaka makūmi abīlī n'idatū, hūna ūcha, ūjīkwa mu Shamili.

³Ū ng'wenūyo ūlondeelwa na Yaili wa Gileadi; nang'hwe ūbatongeela a Baisilaeli ikanza lya myaka makūmi abīlī n'ībīlī.

⁴Walī na bitūnja makūmi adatū, baalī na ndamhī ja nzobe makūmi adatū. A bitūnja benabo ū mu Gileadi baalī basugile mizengo makūmi adatū, īyo kūshisha lelo ītaalī īkwitanagwa Havoti-yaili.[13]

⁵Ū Yaili aho waacha ūjīkwa mu nzengo gwa Kamoni.

⁶A Baisilaeli bīīta hangī yabūbi ū kū būtongi bo ng'wa SEEBA; bandya kūgatūmamīla Maabaalī na Maashitoleti, na baamulungu ba Alaamu, baamulungu ba Sidoni, baamulungu ba Moabu, baamulungu ba Baamoni, na baamulungu ba Bafilisiti. Na lūūlū īkī a Baisilaeli bakang'wīība ū SEEBA, booya ū kūntūmamīla,

⁷akabapelanīla no. Ūbajinja mu makono ga Bafilisiti na Baamoni.

⁸Ū ng'waka ngwenūyo būbaponda ponda na kūbakenaagūla kībi no. Yūbīta myaka ikūmi n'īnaane bakūbaluhyaga pye a Baisilaeli ba kū ntambūko gwa kīya ya mongo gwa Yolodani, ū kū sī ya Gileadi; ī ya Baamooli.

⁹A Baamoni nabo būyūgūkīla ū mongo gwa Yolodani kwiza kwilwisha būlūgū na a banhū ba lūganda lwa ng'wa Yuda, na a ba lūganda lwa ng'wa Benjamini, na a ba ng'wa Efulaimu; a Baisilaeli būbiza mu makoye madito no.

¹⁰Hūna a Baisilaeli būnīlīīla ū SEEBA balīhaya, “Twakūhūbile nguno twanekile ū Mulungu wise twandya kūgatūmamīla Maabaalī.”

¹¹Ū SEEBA ūbashokeja alīhaya, “A Bamisili, na a Baamooli, na a Baamoni, na a Bafilisiti,

¹²na a Basidoni, na a Baamaleki, pye na a Bamoabu aho baamukoyaga no no no, nose ng'ūnilīlīīla gīkī namugunaane, natamupīgije ū mu makono gabo?

¹³Alīyo ī haha ng'wanilekile ng'wandya kūtūmamīla baamulungu bangī; na lūūlū natūshokeela hangī kūmuguna.

¹⁴Jaagi mukabalīlīīle a baamulungu abo ng'wabasola, a benabo hū bene bakūmupīja ūlū mulī mu makoye.”

¹⁵Alīyo a Baisilaeli būnshokeja ū SEEBA gīkī, “Twahūbile; twītīlage mhayo gose gose ūyo ūlīgūbona gīkī gūlī gwawiza. Kwike tūlīkwikūmbīlīja ī haha ūtūpīje.”

¹⁶Hūna būgīnja a maamulungu ga nyageni ayo baalī nago, bandya kūntūmamīla SEEBA. Ūlemeelwa ū kwiyūmīlīja kūwiloleela ū būluhi wa Baisilaeli ntondo na ntondo.

¹⁷A Baamoni aho bihela kwamba būlūgū, būtūūl'ī ng'hambī yabo mu Gileadi; a Baisilaeli nabo bikuminga, a bene būtūūla ī ng'hambī yabo Misipa.

¹⁸A batongeeji ba bana Gileadi būyilūnja lūnja boi bike balīhaya, “Nani akwandya ū kūlwa na a Baamoni? Ū ng'wenūyo akūbiza ntongeeji wa bana Gileadi bose.”