Read Sukuma Bible 2015 – Bibilia Ilagano Lya Kale 2015 Balamuji 12 Bible Online

Balamuji 12 - Sukuma Bible 2015 – Bibilia Ilagano Lya Kale 2015 bible

Balamuji 12

¹A banhū ba lūganda lwa ng'wa Efulaimu būkobya mabità gabo, hūna būkīla kūja Zafoni, būshika būng'wīla ū Yefuta gīkī, “Nibūlī waajile kwilwisha būlūgū na Baamoni ūleka ū kūtūlaalīka a bise ū kūja nang'ho? Tūkwītiima ī numba yako tūkūpembeele mumo nū bebe!”

²Yefuta nang'hwe ūbashokeja ūhaya, “Ū nene na a banhū bane twalī mu wilwisha būtaale na a Baamoni, aho naang'witana kwiza kūnangūhīla, mutizile ū kūniguna ū mu makono gabo.

³Nahayūbona gīkī mutizaga ū kūnigunanha, niifunya būpanga wane kūcha na kūpīla, nūūkīla najile ko kwilwisha nabo a Baamoni; nang'hwe ū SEEBA ūninha būtindi nūbapyena. Hama hangī ī lelo ng'wiza kwilwiisha būlūgū naane kūlwa nguno kī?”

⁴Hūna ū Yefuta ūbitana a bana Gileadi, biza kwamba būlūgū kwilwisha na a banhū ba lūganda lwa Efulaimu; nguno bakandya kūbasondagūla a bana Gileadi balībahaya gīkī, “Angū nīyo a bing'we mulī mabūsoso dūhū ga kūponyiwa kūfuma mu lūganda lwa ng'wa ng'wa Efulaimu na lwa ng'wa Manase!” A bana Gileadi būbiza bapyeeni.

⁵Hūna būja a ha mongo gwa Yolodani būūkadima a ha būkīlīlo wa kūja kū sī ya lūganda lwa ng'wa ng'wa Efulaimu, a ba lūganda lwa ng'wa Efulaimu abo bakasaagīīla, būlī ng'wene ūlū wahayagīkī, “Bing'we nizunīlījagi nakīle,” a bana Gileadi bamūjaga, “Hamo ūlī wa lūganda lwa Efulaimu?” Ūlū ūhaya, “Mm yaya,”

⁶bang'wīlaga, “Būgatū alihayaga ī gīkī, ‘Shiboleeti.’” Ūlū ūhaya “Siboleeti” kūlwa kūlemeelwa kūgūhaya ū mhayo gwenūyo ūmo gūlī, bandiimaga bamūlagīla a ha būkīlīlo wa Yolodani henaho. Ī likanza lyenīlo būbūlagwa banhū shihūmbī makūmi anè na shibīlī, ba kūfuma ū mu lūganda lwa ng'wa Efulaimu.

⁷Ū Yefuta akabatongeela a Baisilaeli ikanza lya myaka ītandatū. Hūna ū Yefuta ū muna Gileadi ūcha, ūjīkwa mu nzengo gūmò gwa mu Gileadi.

⁸Aho wabīta ū ng'wenūyo, Ībizani wa Betelehemu ūbatongeela a Baisilaeli.

⁹Walī na bitūnja makūmi adatū na bashīke makūmi adatū; a bashīke bakwe akabafunya batoolwe na bagosha ba kūfuma mu ndūgū jingī. Na a bitūnja bakwe ūbatooja bakīma ba kūfuma mu ndūgū jingī najo. Ū Ībizani akabatongeela a Baisilaeli ikanza lya myaka mpungatī,

¹⁰hūna ūcha ū Ībizani, ūjīkwa mu Betelehemu.

¹¹Aho wabīta ū ng'wenūyo, Eloni wa lūganda lwa ng'wa Zabuloni ūbatongeela a Baisilaeli ikanza lya myaka ikūmi.

¹²Nang'hwe ū Eloni ūcha, ūjīkwa mu nzengo gwa Aijaloni mu sī ya lūganda lwa ng'wa Zabuloni.

¹³Wahayūbīta ū ng'wenūyo, Abudoni ng'witūnja o ng'wa Hileli wa kūfuma Pilasoni ūbatongeela a Baisilaeli.

¹⁴Walī na bitūnja makūmi anè, na bizūkūlū makūmi adatū; a bose baalī na ndamhī ja nzobe makūmi mpungatī. Nang'hwe ū ng'wenūyo akabatongeela a Baisilaeli ikanza lya myaka īnaane.

¹⁵Hūna ū Abudoni ng'witūnja o ng'wa Hileli ūcha, ūjīkīlwa Pilasoni mu sī ya ngūlū ja Baamaleki, ya lūganda lwa ng'wa Efulaimu.