Read Sukuma Bible 2015 – Bibilia Ilagano Lya Kale 2015 Balamuji 15 Bible Online

Balamuji 15 - Sukuma Bible 2015 – Bibilia Ilagano Lya Kale 2015 bible

Balamuji 15

¹Mu shikū ja magesa ga ngano, ū Samsoni ūsola kabūli kasongi, ūja ū kū būkwiiye kūūnola ū nke wakwe. Aho washika ūhaya, “Naje ū mu maji ūmo, ū mulī nke wane.” Alīyo ū ise wa nkīma atanzunīlīgije ū kwingīla mo.

²Ūng'wīla, “Ū nene nakabona gīkī ī gete wankolilwe no, nūng'wina ū nwani ng'wiyo ūyo walī nsheesha wako. Alīyo naaheene ūlībona kinehe ūlū kūnsola ū nzunaye, angū nīyo ū ng'wene wawiza kūtinda?”

³Nang'hwe ū Samsoni ūhaya gīkī, “Ū lūkangala ūlū natī na kabi ū kū Bafilisiti, bakūnibona nakūbagoloola dūhū.”

⁴Na lūūlū ūja kū masaka ūūkatega nyamhawa, ūjigwasha magana adatū; hūna ūjitunganīja ibīlī bīlī jiinhīla mikīla. Ī mikīla būbīlī wayo wīītunganīja hamò na līchenge.

⁵Hūna ūlībacha moto ī līchenge, ūjilekela ī nyamhawa jenījo jūbbūmbūgala jijile sagala, mu migūnda ya shilīwa sha Bafilisiti shalī shitaalī mu malaale. Shūūjiga pye gete, īsho shalī shitaalī shīmīīlile, nī shisho shalī shabbutagūlwa shūlūndīkwa mu migūnda; pyī nī migūnda ya mizabibu, nī ya mizeituni.

⁶A Bafilisiti aho baabūūja gīkī, “Nani wagwītile ū mhayo gwenūyū?” Būwīlwa, “Samsoni ū nkwīlīma wa mu Timuna; nguno wataajiwe ū nke, winhwa ū nwani ng'wiye ūyo walī nsheesha wakwe.” A Bafilisiti būnsanga ū nkīma ng'wenūyo nū ise, būbapemba mu moto būcha.

⁷Ū Samsoni nang'hwe ūbawīla, “Ūlū h'ūmo mulīītīla ūmu, naane natooya kūshisha namumalīle shiilī gete.

⁸Hūna ūbasalīla kūbatūlagūla, būcha bingī no; hanuma wīnga ū kwenūko, ūja ūūkingīla ng'wihalo lyiwe lya Etamu.”

⁹A Bafilisiti būlinha bajile kū sī ya banhū ba lūganda lwa ng'wa Yuda, būūkatūūla ng'hambī yabo bbihī na Lehi.

¹⁰A banhū ba lūganda lwa ng'wa Yuda būbabūūja gīkī, “Ni kinehe ng'wiza kūtūdumīla?” Nabo būbawīla, “Twizaga kūnsola Samsoni tūntwaale tūkang'wītīle gīt'ūmo watwītīlile a bise.”

¹¹Na lūūlū banhū shihūmbī shidatū ba lūganda lwa ng'wa Yuda būja ū kwihalo lya kwiwe ī Etamu, būūkang'wīla ū Samsoni, “Bebe ūtamanile gīkī a Bafilisiti batūsugile? Watwītīlile mhayo kī ū gwenūyū?” Nang'hwe ūbashokeja alīhaya, “Ū nene naabīītile gīt'ūmo baanīītīlile dūhū a boi.”

¹²Hūna būng'wīla, “Alilūūlū twizaga kūkūdima tūkakūtūūle mu makono gabo a Bafilisiti.” Nang'hwe ū Samsoni ūbawīla, “Niilahīlīlagi taame gīkī mutūnibūlaga a bing'we.”

¹³Būng'wīla, “Būgatū a bise tūtūūkūbūlaga, tūkūkūtunga dūhū tūkūtwaale ū kūbo.” Hūna būntunga na ngoye ibīlī mhya, būntonja bantwaalile ū kūfuma ū kwiwe.

¹⁴Aho beegeela ī Lehi, biza a Bafilisiti kūmanhya nang'hwe kūnū bakūyoganyaga. Hūna ū Moyo o ng'wa SEEBA ūng'wizīīla na nguzu ningī. Ī ngoyī ījo jalī jitungilwe kū makono gaakwe jūbiza gītī būlūba būkūpyaga moto; īsho walī atungilwe ū mu makono gaakwe shūlagala.

¹⁵Ūbona iguha lyisaya lya nzobe lyalī lītaalī idoto, ūlīsola ūyūbatūla; ūbūlaga bagosha shihūmbī shimò.

¹⁶Hūna ū Samsoni wandya kūhaya, “Naabasendeka makīgo makīgo n'iguha lyisaya lya nzobe. Bagosha shihūmbī shigima, nababūlaga n'iguha ly'isaya lya nzobe.”

¹⁷Aho wamala ū kūhaya ī gīko ūlīponya ī liguha lyisaya lya nzobe; ī lipandī lyenīlo linhwa lina lya Lamati-lehi.[16]

¹⁸Akakolwa notà no, na lūūlū ūnīlīīla ū SEEBA alīhaya, “Ū ntūmami wako wang'winhaga būtindi būtaale gīkī, hū nabūlagwe notà kūshisha nagwe mu makono ga banhū abo batasaalilwe aba?”

¹⁹Ī Lehi ng'wenūmo lyalīho ipandī itubīzu lya nyashimu, ū Mulungu ūtandūla ho gilonga minzī. Ū Samsoni aho wang'wa jūshoka ī nguzu jakwe ūdaama; ū lwinzī lwenūlo lwitanwa Eni-hakole,[17] nī lelo lūlīho ī Lehi.

²⁰Ū Samsoni akabatongeela a Baisilaeli ikanza lya myaka makūmi abīlī ū mu shikū ja Bafilisiti.