Read Sukuma Bible 2015 – Bibilia Ilagano Lya Kale 2015 Balamuji 19 Bible Online

Balamuji 19 - Sukuma Bible 2015 – Bibilia Ilagano Lya Kale 2015 bible

Balamuji 19

¹Ū mu shikū jenījo a Baisilaeli aho batī na ntemi, Nnawī nebe waalī waasaamīla mu sī ya banhū ba lūganda lwa ng'wa Efulaimu, ūūkiikala kū magūlya ga kū gatī gete. Ū Nnawī ng'wenūyo akalehya ng'wanikī kūfuma Betelehemu, mu sī ya banhū ba lūganda lwa ng'wa Yuda.

²Alīyo ū nkīma ng'wenūyo ūsola nhūngwa ja būshiihani, waanoga wīnga, ūja Betelehemu kū ng'wa ise ūūkikalaa kwenūko. Ūmala ko myeji īnè,

³hūna ū ngoshi ūnkūūbīja kūng'wikūmbīlīja ashoke ha ng'wakwe. Akaja na ntūmami okwe, ūjaana na nzobe ibīlī; ū ng'wanikī wahayūmona ūnsūng'wanha ūntwaala mu numba ya ng'wa ise; ū ise aho wamona ūng'wanukūla na būyegi.

⁴Ū ise būkwi, ū ise wa ng'wanikī ng'wenūyo ūnemeja ū kwīnga; ūlenda shikū idatū akūlyaga na kūng'wa nū ū kūlaala henaho.

⁵A ha lūshikū lwa kanè būbūūka dilū kwandya kūlonja lonaja lūgendo lwabo gīkī baje; alīyo ū ise wa ng'wanikī ūng'wīla ū nkwīlīma wakwe gīkī, “Lembeelaga ho hado mupandīke shilīwa mukūja dūhū.”

⁶Na lūūlū bigaasha ng'hana būbīlī wabo, būlya na kūng'wa; kwimanīla ū ise wa ng'wanikī wang'wīla, “Ī gete ni wazunya mulaale baba muyeje ng'holò jing'we ū būjikū wa lelo.”

⁷Ū ngosha ng'weenūyo aho wabūūka gīkī baje, ū ise būkwi ūng'wikūmbīlīja kwikala, ng'hana ūlenda nū būjikū wenūbo.

⁸Ū mu lūshikū lwa kataano lwaho ūbūūka dilū gīkī bandye lūgendo, ū ise wa ng'wanikī ūng'wīla, “Baba ka ni ng'wazalabanya mate; mukūbūūka ūlū līlaaheehe ī līīmi.” Ng'hana bigaasha būbīlī wabo būlya shilīwa.

⁹Hūna ū ngosha ng'wenūyo aho wabūūka gīkī aje nū ntūmami wakwe hamò nū nke, ū ise būkwi, ū ise wa ng'wanikī ūhaya, “Baba ūlībona gīkī wila ū būjikū ī haha, laalagi nū būjikū bo lelo nguno ī likanza lyashilaga. Ntondo būkwela mubūūke dilū muje ū kū kaya ying'we.”

¹⁰Alīyo ū ngosha ūlema gete ū kūlaala būjikū būngī a ha kaya henaho; na lūūlū būjitūūlīla myenda ya kwigaasīja ī nzobe, hūna ūbūūka nū ntūmami wakwe, hamò nū nke wakwe; būshimīza kūshisha ipandī lyilolile na Yebusi (h'ī Yelusalemu).

¹¹Aho beegeela ī Yebusi ī līīmi lyūūdema gete, ū ntūmami wakwe ūng'wīla, “Hambū hambū ni twabīta mu nzengo gwa Bayebusi ūmu tūlaale ng'wene.”

¹²Ū ise būgonzo ūng'wīla, “Yaya ī gīko, tūtūdūla kwingīla mu nzengo gwa banhū babisa, abo batī Baisilaeli; tūjagi tūshikīīle Gibea.”

¹³Ongeja kūng'wīla ū ntūmami wakwe gīkī, “Tūkajagi tūgeme ū kūshika ī Gibea nūūlū ī Lama, tūkalaale mu gūmò gwa mizengo yenīyo.”

¹⁴Ng'hana būja; aho beegeela ī Gibea ya mu sī ya banhū ba lūganda lwa ng'wa Benjamini, lyūlibīla ī līīmi.

¹⁵Būūlenda henaho gīkī balaale ho; būja hipandī lyape lītī na shose shose būūkigaasha, gīkī baweegeje henaho ū būjikū; nguno atigelile munhū wa kūbeegeleja mu kaya yakwe balaale ū būjikū wenūbo.

¹⁶Ī mhīndī yenīyo namhala nebe, walī waasaamīla mu Gibea kūfuma kū magūlya ga sī ya banhū ba lūganda lwa ng'wa Efulaimu a banhū ba ng'wenūmo baalī ba lūganda lwa ng'wa Benjamini ūsangwa nang'hwe alīshikīīla kūfuma kū milīmo kū malaale.

¹⁷Aho walola chiza a h'itogolo lyaape īlo līlī ū mu nzengo, ūbabona a bashimzi benabo. Ū namhala ūbabūūja, “Mujile halī? Ng'wafuma he?”

¹⁸Ūshosha alīhaya, “Tūlīfuma Betelehemu ya mu sī ya banhū ba lūganda lwa ng'wa Yuda, tūlīīja kū sī ya banhū ba lūganda lwa ng'wa Efulaimu, kū magūlya ga kū gatī, h'ūko nakikalaga. Naalī naajile Betelehemu mu sī ya banhū ba lūganda lwa ng'wa Yuda, ī haha najile kū numba ya ng'wa Seeba; alīyo atīīho munhū wa kūnanukūla mu kaya yakwe.

¹⁹A maswa nī shilīīwa sha kūlisha ī nzobe jise tūlī nago, na a bise basese bako; ū ntūmami wako nkīma ūūyū, nū sūmba ūyo alī hamò nise ng'wenūyū, tūlī nasho ī shakūlya, tūlī na migatī hamò na divai. Tūtī na makoye na shikolo shose shose.”

²⁰Ū namhala ng'wenūyo ūbawīla, “Īnjagi ū boobà, ū nene nakūmugunanha ū mu yose īyo īlīmugeehela; ū mhayo ū ntaale mutizūlaala hanze.”

²¹Hūna ūng'wegeleja mu kaya yakwe ū munhū ng'wenūyo, nī nzobe jakwe ūjinha shilīwa. Booja mhambala hūna būtengelwa shilīwa, bandya kūlya na kūng'wa.

²²Aho balī mu kaya bakūyegaga, bamò ba bagosha ū mu nzengo, abo baalī na nhūngwa jamalofu, bīpīndya ī numba yenīyo. Bandya kūgūtūla ū nyango kūnū bakūng'witanaga ū ng'wenekīlī kaya, ū namhala ng'wenūyo balīhaya, “Nfunyage hanze ū ngosha ūyo wizaga mu ng'wako, twize tūng'wiguushe!”[19]

²³Ū ng'wenekīlī kaya ūfuma hanze ūbawīla gīkī, “Bing'we badūgū bane, yaya ī gīko; lekagi ū kūgwīta ū mhayo gwamalofu gwenūyo, nguno nīyo mulībona gīkī ū munhū ng'wenūyū alī ngeni wane.

²⁴Alilolagi, baaba bakīma babīlī aha, ūmò nshīke wane ataalī nūūlū kūlaala na ngosha ose ose, nū nke wakwe ū munhū ng'wenūyū; leki nang'wenele a benabo mubīītīle ūmo mutogelilwe, nū mumo mumanīlile bing'we benekīlī. Alīyo ū munhū ng'wenūyū, yaya gete ū kūng'wītīla mhayo gwamalofu gīko.”

²⁵Kwike a banhū benabo batandegelekile īyo wīīhayaga; na lūūlū nose ū Nnawī ng'wenūyo ūnsola ū nke wakwe ūbafunīja, būnjaana būūkang'wiguusīja balīng'wisangīīla būjikū pe; ū ng'wikingilima būneka wīnga.

²⁶Aho līlīfuma ī līīmi, ūja ū kū numba īyo waalī ū ngoshi, ūūkashikīla kūgwa a ha nyango, ūlambalala henaho kūshisha wangalūka.

²⁷Ū ngoshi aho wamisha ī dilū, ūgūlugūla ū nyango gwa numba gīkī aje nū lūgendo lwakwe; ūmona ū nke alambalalile a ha nyango gwa numba, a makono gaakwe galī a ha nyango.

²⁸Ūnyombya alīng'wīla, “Bebe būkaga tūje.” Ū nkīma atafunije mhayo gose gose. Ū ngosha ng'wenūyo ūntūūla ha nzobe yakwe ūja nang'hwe kaya.

²⁹Aho washika ī kaya ūsola lūshū, ūmutagūla ū nke wakwe a magūlū na a makono, mapingili ikūmi na abīlī; ūgatwaala būlī kwene ū mu sī ya Baisilaeli.

³⁰Būlī munhū ūyo akabona wahayaga gīkī, “Ū mhayo gwenūyū gūtaalī kwilonga, nūūlū gūtaalī kwītwa na kamò yaya kūfuma aho Baisilaeli bīngīīla Misili. Gūlolagi mugwideedeeng'hanye chiza, mutūwīle ū gwa kwīta!”