Read Sukuma Bible 2015 – Bibilia Ilagano Lya Kale 2015 Balamuji 2 Bible Online

Balamuji 2 - Sukuma Bible 2015 – Bibilia Ilagano Lya Kale 2015 bible

Balamuji 2

¹Ū Malaika o ng'wa SEEBA wīnga ī Giligaali ūja Bokimu; aho alī kwenūko ūbawīla a Baisilaeli gīkī, “Nakang'wīnja ī Misili nūng'wenha kūūnū, kū sī īyo naalī naabilahīlīla bakūlūgenji bing'we gīkī nakūbinha. Naalī nahaya gīkī, ‘Natalalīkenaagūla ī lilagane lyane ū kū bing'we,

²hama na a bing'we yaya ū kūbeeja ilagane nabo a banhū ba mu sī yenīyī; nūmukomeleja kwīkenaagūla gete ī myalīlo yabo.’ Alīyo ng'walekile ū kūniigwa. Nibūlī ng'wītile gīko?

³Na lūūlū leki namuwīle, ī haha natūbapeeja bang'wīngīle; bakūbiza ming'hwa ū mu mbazu jiing'we, hama a baamulungu babo nabo bakūbiza lūtu lwa kūmugwasha.”

⁴Ū Malaika o ng'wa Seeba aho wabawīla a Baisilaeli ī mihayo yose yenīyī, būlīla ng'hūngū.

⁵Ī lipandī lyenīlo būlitana Bokimu;[3] hūna būmfunīja shitambò ū SEEBA.

⁶Ū lūshikū lwene ū Yoshwa aho wabalagaga a Baisilaeli, bahayīnga a henaho būja būlī bene kūdima sī ya wingīji wabo.

⁷A banhū būntūmamīla SEEBA ū mu shikū ja būlamu o ng'wa Yoshwa ī jose, hamò nī ja bataale abo akabaleka ho ū Yoshwa, abo baalī bīībona pyī īyo SEEBA walī wabīītīla a Baisilaeli.

⁸Hūna ū Yoshwa ū ntūmami o ng'wa SEEBA ūcha alī na būlamu wa myaka igana na ikūmi līmò.

⁹Būnjīka ū mu sī ya wingīji wakwe, mu nzengo gwa Timuna-sela, mu sī ya magūlya ya banhū ba lūganda lwa Efulaimu, sukuma ya lūgūlū lwa ng'wa Gaashi.

¹⁰A banhū ba shibyalīlwe shenīsho aho baakumingwa pye a bose kū bataale babo, shikilonga shibyalīlwe shingī, īsho shaalī shitandeebile ū SEEBA, nūūlū īyo walī wabīītīla a Baisilaeli.

¹¹Na lūūlū a Baisilaeli bandya kwīta yamalofu ū kū būtongi bo ng'wa SEEBA, būyūgalamya[4] Maabaalī.

¹²Būng'wība gete ū Seeba ū Mulungu wa bakūlūgenji babo, ūyo walī wabīnja mu sī ya Misili. Būyūlondeela na kūtūmamīla baamulungu ba būlī mbika ba mahanga ayo biikalaga hamò nago. Bakansayīcha no ū Seeba,

¹³nguno bakaneka būbiza balamya ba ng'wa Baalī na Maashitaloti.

¹⁴Na lūūlū īkī ū Seeba akabapelanīla a Baisilaeli, akabatūūla mu makono ga biboneeji, būyūbiboneela. Ūbajinja kū banishi babo abo baalī babapīndīlīgije hose hose; būlemeelwa gete ū kūbaheeba a banishi benabo.

¹⁵Yūbiza būlī ikanza ūlū baaja kū būlūūgū a Baisilaeli, ū nkono go ng'wa Seeba gwilwishaga nabo gīkī bapyenwe gīt'ūmo walī wabahūgūlīla. Bakabiza mu kwihīga kūtaale no.

¹⁶Kwike makanza malebe na malebe ū Seeba wababūūkījaga balamuji,[5] kūlwa kūbapīja kūbīnja ū mu makono ga biboneeji benabo.

¹⁷Alīyo baalī batabadegelekaga na a balamuji babo nguno ya būmalahya wabo, wa kwikala bakūtūmamīlaga baamulungu bangī. A banhū benabo bakagalūka wangū no, bīnga gete ū mu nzīla īyo babyaji babo bashimizīlaga; booya ū kwīta ūmo bīītīlaga a babyaji babo, ū kūshidīīlīīla ī shilagīlo sha ng'wa Seeba.

¹⁸Būl'ikanza ū Seeba wabizaga ūlū wababūkīja namuji, walī hamò nū namuji ng'wenūyo; na lūūlū ū ng'wikanza lyose īlo walī mu sī hamò nabo ū namuji ng'wenūyo, wabapījaga kūfuma ū mu makono ga banishi babo; nguno ū SEEBA wabasaatagwa no ūlū wabalīja ū būluhi ūbo biboneeji babo baabūtūmamīlaga kūbaluhya.

¹⁹Alīyo ūlū waacha dūhū ū namuji ng'wenūyo, ī likanza lyenīlo baashokaga kū mihayo yamalofu kūtinda ūmo baalī a baasaabo; baalondeelaga baamulungu bangī na kūbatūmamīla, hamò na kūbalamya. A banhū benabo baalī baalema gete ū kūjileka ī nhūngwa jabo ī jabūbi nū būdiimu wa ntwe.

²⁰Na lūūlū ū Seeba akabapelanīla no a Baisilaeli ūhaya gīkī, “A banhū ba ihanga lyenīlī īkī baalīkenaagūlile ī lilagane īlo naalī naabatūūlīla a bakūlūgenji babo, na baalemile gete ū kūnidegeleka,

²¹Ī haha lūūlū natūbīngījaga nūūlū līmò ū mu mahanga ayo akagaleka Yoshwa aho waacha.

²²Nakūgatūmamīla kūbalola a Baisilaeli nababone, ūlū bakwīdima ī nzīla ya ng'wa Seeba bashimizīle mo gīt'ūmo bīītīlaga bakūlūgenji babo.”

²³Na lūūlū ū Seeba ūgazunīlīja a mahanga genanyo kwikala ho; atagapeegije haho na haho mu nzīla ya ng'wa Yoshwa.